Mutton Dum Biryani Recipe in Telugu :వీకెండ్ వచ్చిందంటే చాలు చాలా మంది ఇళ్లలో నాన్వెజ్, బిర్యానీ వంటకాలు ఘుమఘుమలాడుతుంటాయి. అయితే, మీరు ఇప్పటివరకు వివిధ రకాలుగా బిర్యానీలు తయారు చేసి ఉంటారు. కానీ, ఎప్పుడైనా ఈ స్టైల్లో ట్రై చేశారా? అదే, "చిట్టి ముత్యాలతో అద్దిరిపోయే మటన్ దమ్ బిర్యానీ". దీని తయారీకి హైదరాబాదీ దమ్ బిర్యానీకి కావాల్సినన్ని పదార్థాలు, సమయం అవసరం లేదు! చాలా తక్కువ ఇంగ్రీడియంట్స్తో ఎవరైనా ఈజీగా ప్రిపేర్ చేసుకోవచ్చు. టేస్ట్ అద్దిరిపోతుంది! మరి, అందుకు కావాల్సిన పదార్థాలేంటి? తయారీ విధానం ఎలాగో ఇప్పుడు చూద్దాం.
కావాల్సిన పదార్థాలు :
- చిట్టి ముత్యాల బియ్యం - రెండున్నర కప్పులు(1 కప్పు = 195గ్రాములు)
- మటన్ - అరకిలో
- నూనె - ముప్పావు కప్పు
- నెయ్యి - పావు కప్పు
- దాల్చిన చెక్క - 3 అంగుళాలు
- అనాస పువ్వులు - 2
- యాలకులు - 7
- లవంగాలు - 12
- షాజీరా - 1 టేబుల్స్పూన్
- బిర్యానీ ఆకులు - 4
- స్టోన్ ఫ్లవర్ - 1
- జీడి పప్పు పలుకులు - పావు కప్పు
- ఉల్లిపాయలు - 2(పెద్ద సైజ్వి)
- అల్లంవెల్లుల్లి పేస్ట్ - ఒకటిన్నర టేబుల్స్పూన్లు
- టమాటాలు - 2
- కొత్తిమీర తరుగు - పిడికెడు
- పుదీనా తరుగు - పిడికెడు
- ఉప్పు - రుచికి సరిపడా
- వేయించిన జీలకర్ర పొడి - 1 టేబుల్స్పూన్
- ధనియాల పొడి - 1 టేబుల్స్పూన్
- కారం - రుచికి తగినంత
- గరంమసాలా - 1 టేబుల్స్పూన్
- పెరుగు - అర కప్పు
- పచ్చిమిర్చి - 3
మటన్ త్వరగా ఉడకాలంటే ఇలా చేయండి - ఎంత ముదిరినా చక్కగా ఉడికిపోద్ది!
తయారీ విధానం :
- ఇందుకోసం ముందుగా చిట్టిముత్యాల బియ్యాన్ని శుభ్రంగా కడిగి గంటపాటు నానబెట్టుకోవాలి. అలాగే మటన్ని శుభ్రంగా కడిగి నీరు లేకుండా ఒక ప్లేట్లోకి తీసుకొని పక్కన ఉంచుకోవాలి. అదేవిధంగా రెసిపీలోకి కావాల్సిన ఉల్లిపాయ, టమాటాలు, పచ్చిమిర్చిని కట్ చేసుకొని పక్కనుంచాలి.
- ఇప్పుడు స్టౌపై అడుగు మందంగా ఉండే బిర్యానీ గిన్నె పెట్టి నూనె, నెయ్యి వేసుకోవాలి. ఆ మిశ్రమం వేడయ్యాక అందులో దాల్చిన చెక్క, అనాస పువ్వులు, యాలకులు, షాజీరా, లవంగాలు, బిర్యానీ ఆకులు, రాతి పువ్వు వేసి కాసేపు వేయించుకోవాలి.
- అవి వేగాక జీడిపప్పు పలుకులు వేసి ఫ్రై చేసుకోవాలి. అనంతరం అందులో ముందుగా తరిగి పెట్టుకున్న ఉల్లిపాయ చీలికలు వేసి అవి కాస్త మెత్తబడే వరకు వేపుకోవాలి.
- ఉల్లిపాయలు వేగి కాస్త పింక్ కలర్లోకి మారాక అల్లం వెల్లుల్లి పేస్ట్ వేసి కలిపి కాసేపు వేయించుకోవాలి. అలా వేయించుకునేటప్పుడే శుభ్రంగా కడిగి పక్కన పెట్టుకున్న మటన్ వేసి ఇంగ్రీడియంట్స్ అన్నీ ముక్కలకు పట్టేలా మిక్స్ చేసుకోవాలి.
- ఆపై స్టౌను హై ఫ్లేమ్లో ఉంచి గరిటెతో కలుపుతూ మటన్ ముక్కలపై కాలినట్టు ఎర్రటి మచ్చలు ఏర్పడే వరకు వేయించుకోవాలి.
- ఆవిధంగా ఉడికించుకున్నాక టమాటా ముక్కలు, కొత్తిమీర, పుదీనా తరుగు, ఉప్పు వేసి కలిపి కాసేపు వేయించాలి. ఆ తర్వాత వేయించిన జీలకర్ర పొడి, ధనియాల పొడి, గరంమసాలా, కారం వేసి మొత్తం కలిసేలా ఒకసారి బాగా మిక్స్ చేసుకోవాలి.
- ఆపై పెరుగు వేసి కలిపి మూతపెట్టి మిశ్రమంలో ఆయిల్ పైకి తేలేంత వరకు మీడియం ఫ్లేమ్ మీద మధ్యమధ్యలో కలుపుతూ ఉడికించుకోవాలి.
- ఆవిధంగా ఉడికించుకున్నాక అందులో ముందుగా నానబెట్టుకున్న రైస్, పచ్చిమిర్చి చీలికలు వేసుకుని కలిపి బియ్యంలోని చెమ్మ ఆరిపోయేంత వరకు వేయించుకోవాలి.
- ఆ తర్వాత 5 కప్పుల వేడి నీరు పోసి మిక్స్ చేసుకోవాలి. ఈ టైమ్లోనే బిర్యానీలో ఉప్పు, కారం సరిపోయిందో లేదో చెక్ చేసుకుని అవసరమైతే యాడ్ చేసుకోవాలి.
"ఫిష్ ఫ్రై బిర్యానీ" ఎప్పుడైనా ట్రై చేశారా? - ఈ టేస్ట్ అస్సలు మర్చిపోలేరు!
- అనంతరం దమ్ చేయడానికి గిన్నెపై మూతపెట్టి దానిపై అల్యూమినియం ఫాయిల్ ఉంచాలి. ఆపై దాని మీద ఎర్రటి బొగ్గులు లేదా కొబ్బరి పెంకులు వేయాలి. ఒకవేళ మీ ఇంట్లో ఇవి లేకపోతే మామూలుగా బిర్యానీనిదమ్ చేసుకోవచ్చు.
- బొగ్గుల మీద దమ్ చేసుకునే వారైతే 8 నిమిషాలు హై ఫ్లేమ్లో, 6 నిమిషాలు లో ఫ్లేమ్లో దమ్ చేసుకుని స్టౌ ఆఫ్ చేసి 30 నిమిషాల పాటు అలా వదిలేయాలి.
- అదే మామూలుగా దమ్ చేసుకునేవారైతే 12 నిమిషాలు హై ఫ్లేమ్లో, 10 నిమిషాలు లోఫ్లేమ్లో దమ్ చేసుకుని స్టౌ ఆఫ్ చేసి అరగంట పాటు అలా ఉండనివ్వాలి.
- అరగంట తర్వాత మూత తీసి బిర్యానీలో కొద్దిగా నెయ్యి వేసుకుని కలిపి 5 నుంచి 10 నిమిషాలు అలా ఉంచి ఆపై సర్వ్ చేసుకుంటే చాలు. అంతే.. ఎంతో రుచికరంగా ఉండే ఘుమఘుమలాడే "చిట్టిముత్యాల మటన్ దమ్ బిర్యానీ" రెడీ!
బ్యాచిలర్స్ రెసిపీ "చికెన్ టిక్కా బిర్యానీ" - వంట రాని వారు కూడా ఈజీగా చేసేస్తారు!
