Lyric Writer Anantha SriRam : ప్రేమ గురించి తప్ప ఇతర ఏ పాటలు ప్రస్తుత చిత్రాల్లో ఉండట్లేదని సినీ గేయ రచయిత అనంత శ్రీరామ్ తన అసంతృప్తిని వ్యక్తం చేశారు. సినిమా పాటల విషయంలో పోకడ మారాల్సిన అవసరం ఉందని ఆయన తన అభిప్రాయాన్ని తెలిపారు. ఆంధ్రప్రదేశ్లోని విజయవాడలో జరిగిన 6వ ప్రపంచ తెలుగు మహాసభల్లో అనంత శ్రీరామ్ పాల్గొని మాట్లాడారు. సినిమాల కోసం కాకుండా అప్పుడప్పుడు తన సంతృప్తి కోసం కొన్ని పాటలు రాసుకుంటానని ఆయన వెల్లడించారు.
పెద్ద సినిమాలైతే కండిషన్స్? : సినిమా పాటలు రాస్తున్నప్పుడు ఎక్కడో ఒక చోట అసంతృప్తి ఉంటుందని అనంత శ్రీరామ్ అన్నారు. అది పెద్ద సినిమా అయితే హీరో పరిచయ గీతం, హీరోయిన్‌ హీరోను చూసినప్పుడు వచ్చే ఓ ప్రేమ పాట, హీరో హీరోయిన్‌కి ప్రేమ కుదిరినప్పుడు వచ్చే ఒక యుగళగీతం, రెండో అర్ధ భాగంలో హీరో పోరాటానికి వెళ్తున్నప్పుడు నువ్వు సింహం, పులి అని పొగిడే పాట, ఆ తర్వాత సినిమాకి ఒక ఆట విడుపు ఇవ్వాలి కాబట్టి, ఐటమ్‌ సాంగ్‌ ఆఖర్లో అంతా సంతోషం వైపు పయనిస్తున్నామని హీరో, హీరోయిన్లు నిర్ణయించుకుంటున్నప్పుడు వచ్చే ఉత్సాహభరితమైన పాటతో రాయాల్సివస్తుందని అనంత శ్రీరామ్ అసహనం వ్యక్తం చేశారు.
సంక్రాంతికి వస్తున్నాం : ఈ సూత్రంతోనే పెద్ద సినిమాలు నడుస్తున్నాయని, చిన్న సినిమాలైతే ప్రేమ పుట్టినప్పుడు, వికసించినప్పుడు, ప్రేమ భగ్నమైనప్పుడు, మళ్లీ కలుసుకున్నప్పుడు వచ్చే పాటలు తప్పితే ఇంతకు మించిన సన్నివేశాల సృష్టి జరగట్లేదని శ్రీరామ్ అన్నారు. అదృష్టవశాత్తు ఈ సంక్రాంతికి విడుదలవుతున్న అనిల్ రావిపూడి దర్శకత్వం వహించిన ‘సంక్రాంతికి వస్తున్నాం’ అనే సినిమాలో గురువుపై అద్భుతమైన పాట రాసే అవకాశం లభించిందన్నారు. త్వరలో మీరు కూడా ఆ పాటను వింటారని అనంత శ్రీరామ్ తెలిపారు.
సముద్రంపై పాట : అంతర్వేది వద్ద గోదావరి సముద్రంలో కలుస్తున్నప్పుడు, కృష్ణానది హంసలదీవి వద్ద సముద్రంలో కలిసే ప్రాంతాన్ని చూస్తే T ఆకారంలో కనిపిస్తుందని, ఆ అద్భుత దృశ్యాన్ని చూసినప్పుడు పాట రాయాలనిపించి "ఎన్ని నదులు కలిస్తే ఎన్నెన్ని నదులు కలిస్తే ఏ లాభం. కడలిలో ఉప్పదనం కాస్త కూడా తగ్గనప్పుడు. ఎన్ని నదులు కలిస్తే ఏం లాభం. ఎన్నెన్ని గుడులు వెలిస్తే ఏ లాభం" అంటూ తాను రాసినట్లు ఆ పాటను సభలో ఉన్నవారికి శ్రీరామ్ వినిపించారు. ఆయన ఆలపించిన గేయాలను సభికులను అలరించడంతో పాటు ఆలోచించే పరిస్థితి వైపు మళ్లించాయి.
Singer Anantha sriram at Bapatla : 'ప్రేక్షకుల మదిలో పాట నానితే గొప్ప పురస్కారమే..!'
