How to Wash Velvet Saree at Home:వెల్వెట్ చీరలను కట్టుకోవడానికి చాలా మంది మహిళలు ఇష్టపడతారు. ఇది కట్టుకునేటప్పుడు ఆనందంగానే ఉన్నా.. ఉతికేటప్పుడు మాత్రం ఇబ్బందిగా ఉంటుంది. ఇక దానిపై మరకలు పడితే అంతే. చాలాసార్లు డ్రై క్లీనింగ్ కు ఇవ్వాల్సి వస్తుంది. అయితే.. ఈ చిట్కాలు పాటిస్తే ఎలాంటి ఇబ్బందీ లేకుండా సులభంగా ఉతుక్కోవచ్చని ఫ్యాషన్ నిపుణులు సలహా ఇస్తున్నారు. ఆ వివరాలు ఇప్పుడు చూద్దాం.
చీర ఉతికేటప్పుడు తీసుకోవాల్సిన జాగ్రత్తలు..
- మొదటగా ఓ టబ్ను తీసుకుని చల్లటి లేదా గోరువెచ్చటి నీటిని నింపాలి. (వేడి నీటిని అసలు వాడొద్దు)
- 1-2 చెంచాల తేలికపాటి డిటర్జెంట్ను నీటిలో కలపాలి.
- ఈ సబ్బు నీటిలో వెల్వెట్ చీరను చేతితో మృదువుగా జాడించాలి. ఇలా 5-6 సార్లు చేయాలి.
- ఆ తర్వాత శుభ్రమైన నీటిని తీసుకుని అందులో డిటర్జెంట్ పోయేంతా వరకు ఉతకాలి.
- అయితే, ఈ చీరలు ఉతికే సమయంలో మెలిపెట్టడం, బలవంతంగా పిండడం లాంటివి చేయకూడదు.
మరకలు పోగొట్టడం ఇలా..
ఒక చెంచా బేకింగ్ సోడా, ఒక చెంచా నిమ్మరసం, ఒక చెంచా నీటిని కలిపాలి. ఈ మిశ్రమాన్ని మరకలు అంటిన చోట పోసి చేతి వేళ్లతో రుద్దాలి. ఆ తర్వాత మరక తొలిగిపోయే వరకు మైక్రోఫైబర్ క్లాత్‌తో మెల్లగా రుద్దాలని చెప్పారు. ఇలా మరకలు పోయేవరకు మృదువుగా చేయాలని నిపుణులు చెబుతున్నారు. ఇలా కాకపోతే మరకలు ఉన్న ప్రదేశంలో కొద్దిగా నీటిని పోసి.. దానిపై డిటర్జెంట్ పౌడర్ లేదా లిక్విడ్ పోయాలి. ఆ తర్వాత చేతివేళ్లతోనే మృదువుగా రుద్దుతూ చల్లటి నీటిలో ముంచాలి. అయినా కూడా మరకలు పోకపోతే డ్రైక్లీనింగ్కు ఇవ్వాలని సలహా ఇస్తున్నారు.