How to Make Vada with Idli Batter:ఇడ్లీలు - పరిచయం అక్కర్లేని బ్రేక్ఫాస్ట్. ఇవి లైట్గా ఉండి హెల్దీ కావడంతో చాలా మంది రెగ్యులర్గా ఇంట్లో చేస్తుంటారు. ఈ క్రమంలోనే చాలా మంది మూడు నాలుగు రోజులకు సరిపడా పిండి ప్రిపేర్ చేసుకుని ఫ్రిడ్జ్లో సోర్ట్ చేసుకుని కావాల్సినప్పుడు ఇడ్లీలు వేసుకుంటారు. అయితే రోజూ ఇడ్లీలు తినాలనిపించదు. దీంతో ఇడ్లీ పిండి వేస్ట్ అవుతుంది. ఇకపై ఇడ్లీలు తినబుద్ధి కానప్పుడు ఇలా వడలు వేసుకోండి. సూపర్గా వస్తాయి. వడలు వేసుకునే సమయంలో ఇది ఒక్కటి కలిపితే నూనె అస్సలు పీల్చవు. పైగా ఈ వడలు పైన క్రిస్పీగా, లోపల సూపర్ సాఫ్ట్గా ఉంటాయి. మరి లేట్ చేయకుండా ఇడ్లీ పిండితో వడలు ఎలా తయారు చేసుకోవాలి? కావాల్సిన పదార్థాలు ఈ స్టోరీలో చూద్దాం.
కావాల్సిన పదార్థాలు:
- ఇడ్లీ పిండి - 2 కప్పులు
- బొంబాయి రవ్వ - అర కప్పు
- ఉల్లిపాయ - 1
- పచ్చిమిర్చి - 2
- ఉప్పు - రుచికి సరిపడా
- జీలకర్ర - అర టీ స్పూన్
- కరివేపాకు - 2 రెమ్మలు
- బేకింగ్ సోడా - చిటికెడు(ఆప్షనల్)
తయారీ విధానం:
- స్టవ్ ఆన్ చేసి పాన్ పెట్టి బొంబాయి రవ్వను సిమ్లో దోరగా వేయించుకోవాలి. ఇలా వేయించుకున్న రవ్వను చల్లారిన తర్వాత మిక్సీజార్లో వేసి మెత్తగా గ్రైండ్ చేసుకోవాలి. ఇడ్లీ పిండిలో రవ్వ వేసుకోవడం వల్ల వడలకు నూనె పట్టదు. పైగా క్రిస్పీగా వస్తాయి.
- ఓ బౌల్లోకి ఇడ్లీ పిండిని తీసుకోవాలి. అందులోకి మిక్సీ పట్టిన రవ్వను వేసుకుని బాగా కలిపి ఓ 10 నిమిషాలు పక్కన ఉంచాలి.
- ఈ లోపు పచ్చిమిర్చి, ఉల్లిపాయ, కరివేపాకును సన్నగా కట్ చేసుకోవాలి.
- 10 నిమిషాల తర్వాత పిండిలోకి రవ్వ నాని వడ మిశ్రమం రెడీ అవుతుంది. వడలు వేసుకునేందుకు పిండి పర్ఫెక్ట్గా ఉందో లేదో చూసుకోవాలి. ఒకవేళ పిండి మరీ గట్టిగా అనిపిస్తే మరికొంచెం ఇడ్లీ పిండిని కలుపుకోవచ్చు.
- ఇప్పుడు ఈ పిండి మిశ్రమంలోకి ఉల్లిపాయ, పచ్చిమిర్చి, కరివేపాకు సన్నని తరుగు, జీలకర్ర, రుచికి సరిపడా ఉప్పు, బేకింగ్ సోడా వేసుకోవాలి. ఆల్రెడీ ఇడ్లీ పిండిలో ఉప్పు ఉంటే చూసుకుని వేసుకోవాలి.
- వీటన్నింటిని ఓ 5 నిమిషాల పాటు ఒకే డైరెక్షన్లో బాగా కలుపుకోవాలి. ఇలా కలుపుకోవడం వల్ల పిండి ప్లఫ్పీగా అవుతుంది.
- స్టవ్ ఆన్ చేసి కడాయి పెట్టి డీప్ ఫ్రైకి సరిపడా నూనె పోసి వేడి చేసుకోవాలి. ఆయిల్ హీటెక్కిన తర్వాత వడ పిండిని మరొక్కసారి కలిపి కొద్దిగా పిండి తీసుకుని అరటి ఆకు లేదా బటర్ పేపర్ మీద వడలుగా వత్తుకుని నూనెలో వేసుకోవాలి.
- ఇలా కడాయిలో ఓ నాలుగైదు వేసుకుని మీడియం ఫ్లేమ్లో రెండు వైపులా గోల్డెన్ బ్రౌన్ కలర్ వచ్చే వరకు గరిటెతో తిప్పతూ ఫ్రై చేసుకోవాలి. ఇలా వేయించుకున్న వడలను ఓ ప్లేట్లోకి తీసుకోవాలి.
- ఇలా పిండి మొత్తాన్ని వడలుగా వేసుకుని వేడి వేడిగా సర్వ్ చేసుకుంటే సరి. ఎంతో రుచికరంగా ఉండే ఇడ్లీ పిండి వడలు రెడీ. చట్నీ లేకపోయినా ఇవి సూపర్గా ఉంటాయి. నచ్చితే కొబ్బరి పచ్చడితో తినొచ్చు.
ఇడ్లీ పిండితో రుచికరమైన "పునుగులు" - ఇలా చేస్తే టేస్ట్ అద్దిరిపోతాయి!
పప్పు రుబ్బే పనిలేదు - చిటికెలో "సేమియా ఇడ్లీ" - టేస్ట్ అద్దిరిపోతాయి!
