టేస్టీ అండ్​ స్పైసీ "పెరుగు ఊర కారం పచ్చడి"- వేడివేడి అన్నంలో నెయ్యితో తింటే అమృతమే!

-ఇడ్లీ, వడ, దోశ, బజ్జీల్లోకి సూపర్​ కాంబినేషన్​ -ఈ పద్ధతిలో చేస్తే రెండు వారాల పాటు నిల్వ

Perugu Oora Karam Pachadi Recipe :కొంతమందికి భోజనంలో ఎన్ని కూరలున్నా కూడా ఏదోక పచ్చడితో.. రెండు ముద్దలు తింటేనే తృప్తిగా ఉంటుంది. అలాంటి వారి కోసం కాస్త కారంగా ఎంతో రుచికరంగా ఉండే ఒక సూపర్​ పచ్చడినిపరిచయం చేయబోతున్నాం. అదే 'పెరుగు ఊర కారం పచ్చడి'. పెరుగులో ఎండుమిర్చిలను ఊర బెట్టి ఈ పచ్చడి తయారు చేస్తారు. ఈ పచ్చడిని ఇడ్లీ, వడ, దోశ, బజ్జీ వంటి అన్ని టిఫెన్ల నుంచి వేడివేడి అన్నం వరకు అన్నింటితోనూ తినొచ్చు. వేడివేడి అన్నంలో కాస్త నెయ్యి వేసుకుని ఈకారం పచ్చడితోతింటే టేస్ట్​ సూపర్​గా ఉంటుంది. మరి ఇక లేట్​ చేయకుండా.. ఈజీగా ఈ పెరుగు ఊర కారం పచ్చడి ఎలా చేయాలో ఇప్పుడు చూద్దాం.

కావాల్సిన పదార్థాలు..

• ఎండు మిర్చి-20
• రుచికి సరిపడా ఉప్పు
• జీలకర్ర-టేబుల్​స్పూన్
• వెల్లుల్లి రెబ్బలు-15
• పెరుగు-కప్పు
• ధనియాలు-2 టేబుల్​స్పూన్లు
• బెల్లం పొడి-టేబుల్​స్పూన్

తాలింపు కోసం..

• నూనె - 2 టేబుల్​స్పూన్లు
• జీలకర్ర-అర టీస్పూన్​
• ఆవాలు-అర టీస్పూన్
• అల్లం తురుము-టీస్పూన్
• పచ్చిశనగపప్పు-​టీస్పూన్
• కరివేపాకు
• ఎండుమిర్చి-2
• ఇంగువ-అర టీస్పూన్
• పసుపు - చిటికెడు

తయారీ విధానం..

• ముందుగా ఎండుమిర్చిలను చిన్నచిన్న ముక్కలుగా చేసుకోవాలి. అందులోని గింజలను పూర్తిగా తీసేసుకుని ఓ గిన్నెలోకి తీసుకోవాలి. ఈ పచ్చడిలోకి మిర్చి గింజలు వేసుకోకూడదు.
• ఇప్పుడు ఎండుమిర్చి ముక్కలున్న గిన్నెలో బాగా చిలికిన పెరుగును మిర్చి ముక్కలు మునిగేంత వరకు పోయాలి. ఆ తర్వాత గిన్నెపై మూత పెట్టి గంటపాటు అలా వదిలేయాలి. ఆ తర్వాత ధనియాలను వేయించి తీసుకోవాలి.
• తర్వాత ఒక మిక్సీ జార్లోకి పెరుగులో ఊరెబట్టిన ఎండు మిర్చిలను వేసుకోవాలి. అలాగే అందులోకి ఎండు మిరపకాయను ఊరబెట్టగా మిగిలిన పెరుగు కొద్దిగా, రుచికి సరిపడా ఉప్పు, జీలకర్ర, వెల్లుల్లి రెబ్బలు, వేయించిన ధనియాలు వేసుకోవాలి. వీటిన్నింటినీ మెత్తగా గ్రైండ్​ చేసుకోవాలి.
• ఇప్పుడు తాలింపు కోసం పాన్​ పెట్టి ఆయిల్​ వేయాలి. నూనె వేడయ్యాక ఆవాలు, జీలకర్ర, పచ్చిశనగపప్పు, అల్లం తురుమువేసి వేయించుకోవాలి.
• అలాగే ఎండుమిర్చి, కరివేపాకు, పసుపు, ఇంగువ వేసి కాస్త ఫ్రై చేసుకోవాలి. ఇవన్నీ వేగిన తర్వాత గ్రైండ్ చేసుకున్న ఎండుమిర్చి మిశ్రమాన్ని వేసుకుని బాగా కలుపుకోవాలి.
• అలాగే మిగిలిన పెరుగు వేసుకుని కలుపుకోవాలి. స్టౌ మీడియం ఫ్లేమ్​లో పెట్టుకుని పచ్చడి 10 నిమిషాలు ఉడికించుకోవాలి. పచ్చడి దగ్గర పడి.. నూనె పైకి తేలిన తర్వాత బెల్లం పొడి వేసి కలుపుకోండి. (కొద్దిగా బెల్లం వేయడం వల్ల పచ్చడి చాలా రుచిగా ఉంటుంది.)
• తర్వాత స్టౌ ఆఫ్​ చేయాలి. అంతే ఇలా చేసుకుంటే ఎంతో రుచికరమైన పెరుగు ఊర కారం పచ్చడి రెడీ. ఇది రెండు వారాల పాటు నిల్వ ఉంటుంది. నచ్చితే మీరు కూడా ఇంట్లో ఈ పచ్చడి ట్రై చేయండి.