రొటీన్ పులావ్​లు తిని బోర్​ కొట్టిందా? - వెరైటీగా నవరతన్ పులావ్ చేసుకోండి - రెస్టారెంట్​ టేస్ట్​ పక్కా! - Navratan Pulao Recipe in Telugu

Navratan Pulao: మీకు పులావ్​ తినాలని ఉందా..? కానీ మీరు ప్యూర్ వెజ్​ ప్రియులా..? అయితే నో టెన్షన్​. కేవలం చికెన్​, మటన్​తో చేసినవే కాకుండా వెజ్​లోనే వెరైటీగా టేస్టీ పులావ్​ను చేసుకోవచ్చు. మరి ఇకెందుకు ఆలస్యం దీనిని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.

Navratan Pulao Recipe in Telugu:రకరకాల పులావ్​లు తినాలని ప్రతి ఒక్కరికీ ఉంటుంది. కానీ చేసుకోవడం రాదు. దీంతో ఎప్పుడూ చేసుకునే చికెన్​, మటన్​తో పులావ్​లు చేసుకుని తింటుంటారు. అయితే అలాంటి వారికోసం నాన్​వెజ్​లో మాత్రమే కాకుండా వెజ్​లో అదిరిపోయే రెసిపీని తీసుకువచ్చాం. ఇది ఉత్తర భారతదేశంలో సాధారణమే అయినా.. దక్షిణాదిలో మాత్రం రెస్టారెంట్ లేదా పార్టీల్లో మాత్రమే ఎక్కువగా చేస్తుంటారు. 9 రకాల పండ్లు, కూరగాయలతో దీని టేస్ట్ మిక్స్​డ్ ఫ్లేవర్​తో ఉంటుంది. దీంతో ఏదైనా పనీర్ కర్రీ, మెతి చమన్ కర్రీతో తింటే టేస్ట్ సూపర్​గా ఉంటుంది. ఎక్కువ శాతం రెస్టారెంట్​లో మాత్రమే లభించే ఈ రెసిపిని ఇంట్లోనే ఈజీగా చేసుకోవచ్చు. మరి ఈ టేస్టీ పులావ్​ను ఎలా ప్రిపేర్ చేసుకోవాలి? దానికి కావాల్సిన పదార్థాలు ఏంటో ఇప్పుడు చూద్దాం.

కావాల్సిన పదార్థాలు

• 2 టేబుల్ స్పూన్ల నెయ్యి
• 4 టేబుల్ స్పూన్ల నూనె
• ఒక బిర్యానీ ఆకు
• 4 యాలకులు
• 4 లవంగాలు
• ఒక ఇంచున్నర దాల్చిన చెక్క
• 2 అనాస పువ్వులు
• ఒక నల్ల యాలక
• ఒక టేబుల్ స్పూన్ షాజీరా
• పావుకప్పు ఉల్లిపాయ ముక్కలు
• 2 పచ్చిమిరపకాయ ముక్కలు
• అర కప్పు క్యారెట్ ముక్కలు
• పావు కప్పు బీన్స్
• అర కప్పు కాలీ ఫ్లవర్ ముక్కలు
• పావు కప్పు బంగాళ దుంప ముక్కలు
• ఒక టేబుల్ స్పూన్ అల్లం వెలుల్లి పేస్ట్
• 2 టేబుల్ స్పూన్ల జీడిపప్పు
• కొద్దిగా కొత్తిమీర తరుగు
• కొద్దిగా పుదీనా తరుగు
• ఒక టీ స్పూన్ పంచదార
• రుచికి సరిపడా ఉప్పు
• ఒక కప్పు బాస్మతి బియ్యం
• కొన్ని గులాబీ రేకులు లేదా టీ స్పూన్ రోజ్ వాటర్
• రెండు టేబుల్ స్పూన్ల పచ్చి బఠానీలు
• 2 టేబుల్ స్పూన్ల మొక్క జొన్నలు
• 7 పైనాపిల్ ముక్కలు
• 8 యాపిల్ ముక్కలు
• పావు కప్పు పనీర్ ముక్కలు
• కుంకుమ పువ్వు నానబెట్టిన పాలు

తయారీ విధానం

• ముందుగా స్టౌ ఆన్ చేసుకుని కాస్త అడుగు మందం ఉన్న గిన్నె పెట్టి అందులో నెయ్యి, నూనె పోసి వేడి చేసుకోవాలి.
• ఇప్పుడు ఇందులోనే బిర్యానీ ఆకును తుంచి వేసి.. ఆ తర్వాత యాలకులు, లవంగాలు, దాల్చిన చెక్క, అనాస పువ్వులు, నల్ల యాలక, షాజీరా, ఉల్లిపాయ ముక్కలు వేసి సుమారు నిమిషం పాటు వేయించుకోవాలి.
• ఇప్పుడు పచ్చిమిరపకాయ ముక్కలు, క్యారెట్, కాలీ ఫ్లవర్, బీన్స్, అలూగడ్డల ముక్కలు వేసి రంగు మారేంత వరకు వేయించుకోవాలి.
• రంగు మారిన తర్వాత అల్లం వెల్లుల్లి పేస్టే వేసి పచ్చి వాసన పోయేంత వరకు వేయించుకోవాలి.
• అనంతరం జీడిపప్పు, కొత్తిమీర, పుదీనా తరుగు వేసి వేయించుకోవాలి.
• ఇప్పుడు ఇందులోనే ఒకటిన్నర కప్పు వేడి నీరు, పంచదార, ఉప్పు వేసి బాగా మరగనివ్వాలి. (హై ఫ్లేమ్​లో పెట్టి వేడి చేయాలి)
• ఆ తర్వాత గంటపాటు నానబెట్టుకున్న బాస్మతి బియ్యం వేసి బాగా కలిపి ఎండిపోయిన గులాబీ రేకులు లేదా రోజ్ వాటర్ వేసి సుమారు 8 నిమిషాల పాటు మూత పెట్టి వదిలేయాలి.
• ఇప్పుడు పచ్చి బఠానీలు, మొక్కజొన్నలు, పైనాపిల్, యాపిల్, పనీర్ ముక్కలు వేసి బాగా కలిపాలి.
• వెచ్చటి పాలలో చిటికెడు కుంకుమ పువ్వు వేసి నానబెట్టుకున్న పాలు పోసి కలిపి దమ్ బయటికి పోకుండా మూత పెట్టాలి. (టిష్యూ, విస్తారాకు ఇలా ఏదైనా పెట్టుకోవచ్చు)
• మూత పెట్టాక 5 నిమిషాలు హై ఫ్లేమ్​లో మరో 5 నిమిషాలు లో ఫ్లేమ్​పై దమ్ ఇచ్చి స్టౌ ఆఫ్ చేయాలి.
• ఇప్పుడు సుమారు 30 నిమిషాల పాటు పక్కకు పెట్టుకుని ఆ తర్వాత సర్వ్ చేసుకుంటే టేస్టీ నవరతన్ పులావ్ రెడీ!