Beetroot Poori Recipe in Telugu : బీట్రూట్ ఆరోగ్యానికి ఎంతో మేలు చేస్తుంది. దీనిలో శరీరానికి కావాల్సిన పోషకాలు, ఖనిజాలు పుష్కలంగా ఉంటాయి. కానీ, కొంతమంది బీట్రూట్ నేరుగా తినడానికి ఇబ్బందిగా ఫీల్ అవుతుంటారు. జ్యూస్ తాగడాన్ని కూడా ఇష్టపడరు. అలాంటి వారికోసం ఒక సూపర్ బ్రేక్ఫాస్ట్ రెసిపీ తీసుకొచ్చాం. అదే, "బీట్రూట్ పూరీ". ఎప్పుడూ ఒకే రకమైన టిఫెన్ తిని బోర్ కొట్టిన వారికి ఇది సరికొత్త రుచిని అందిస్తుంది.
అంతేకాదు, ఈ విధంగా పూరీలు చేసి పెట్టారంటే ఇష్టంలేని వాళ్లూ ఎంతో ఇష్టంగా తినేస్తారు. అలాగే ఈ పూరీలు తక్కువ ఆయిల్ని పీల్చుకుంటాయి. దీనిని తినడం వల్ల రుచితో పాటు మంచి ఆరోగ్య ప్రయోజనాలు సొంతం అవుతాయి! పైగా వీటిని చేసుకోవడం కూడా చాలా ఈజీ. మరి, ఈ టేస్టీ అండ్ హెల్దీ బీట్రూట్ పూరీలకు కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- గోధుమపిండి - 2 కప్పులు
- ఉప్పు - రుచికి సరిపడా
- రవ్వ - 1 టేబుల్స్పూన్
- బీట్రూట్ - 1
- కారం - అర చెంచా
- ధనియాల పొడి - అర చెంచా
- నూనె - వేయించడానికి సరిపడా
ఎప్పుడూ ఫ్రెంచ్ ఫ్రైస్ బోర్ - వెరైటీగా "బీట్రూట్ ఫ్రైస్" చేయండి - మళ్లీ మళ్లీ కావాలంటారు!
తయారీ విధానం :
- ఇందుకోసం ముందుగా బీట్రూట్ని శుభ్రంగా కడిగి, పొట్టు తీసుకోవాలి. ఆపై దాన్ని మీడియం సైజ్ ముక్కలుగా కట్ చేసుకోవాలి.
- ఆ తర్వాత స్టౌపై ఒక గిన్నెలో బీట్రూట్ ముక్కలు వేసి తగినన్ని వాటర్ పోసుకొని ఉడికించుకోవాలి.
- అనంతరం ఉడికించుకున్న బీట్రూట్ ముక్కలు చల్లారాక మిక్సీ జార్లో వేసుకొని మెత్తని పేస్ట్లా గ్రైండ్ చేసుకొని పక్కనుంచాలి.
- ఇప్పుడు ఒక మిక్సింగ్ బౌల్ తీసుకొని గోధుమపిండి, రవ్వ, మిక్సీ పట్టుకున్న బీట్రూట్ పేస్టు వేసుకొని ఒకసారి చక్కగా కలుపుకోవాలి.
- ఆ తర్వాత కొన్ని నీళ్లు, కారం, ధనియాల పొడి, ఉప్పు యాడ్ చేసుకొని పూరీ పిండిలా కలుపుకోవాలి. ఆపై చిన్న చిన్న ఉండలుగా చేసుకోవాలి.
- అనంతరం చపాతీ పీటపై ఒక్కో ఉండను ఉంచి పూరీ మాదిరిగా రోల్ చేసుకోవాలి. ఇలా అన్నింటినీ చేసుకొని పక్కన పెట్టుకోవాలి.
- ఇప్పుడు స్టౌపై కడాయి పెట్టుకొని వేయించడానికి సరిపడా ఆయిల్ వేసుకోవాలి. నూనె వేడయ్యాక పూరీలను ఒక్కొక్కటిగా వేసుకొని రెండువైపులా చక్కగా కాలేంత వరకు వేయించుకోవాలి.
- ఆ తర్వాత ప్లేట్లోకి తీసుకొని వేడివేడిగా సర్వ్ చేసుకుంటే చాలు. అంతే, ఎంతో రుచికరంగా ఉండే "బీట్రూట్ పూరీలు" రెడీ!
- వీటిని కొబ్బరి, పల్లీల చట్నీ, పప్పు, రైతా, ఇంకేదైనా కర్రీతో తిన్నా చాలా రుచికరంగా ఉంటాయి. ఒక్కసారి తింటే మళ్లీ మళ్లీ తినాలనిపిస్తుంది!
- మరి, నచ్చితే మీరూ ఓసారి ఇలా బీట్రూట్ పూరీలు ట్రై చేయండి.
నూనె లేకుండానే పూరీలు పొంగుతాయి! - హెల్దీ టిఫెన్ ఇలా ప్రిపేర్ చేసుకోండి!
