Makhana Masala Curry:హెల్దీ స్నాక్ ఐటమ్స్లో తామర గింజలు ముందు వరుసలో ఉంటాయి. ఫూల్‌ మఖానాగాపిలుచుకునే ఈ గింజల్లో బోలెడన్ని పోషకాలు నిండి ఉంటాయి. ప్రొటీన్లు, కార్బోహైడ్రేట్లు, యాంటీ ఆక్సిడెంట్లు పుష్కలంగా లభించే ఈ గింజలు ఆరోగ్యానికెంతో మేలని నిపుణులంటున్నారు. అయితే వీటిని కొందరు పచ్చిగానే తీసుకుంటే.. మరికొందరు వేయించుకొని, ఉడకబెట్టుకొని, స్వీట్లలో భాగం చేసుకుంటారు. అయితే, ఇవే కాకుండా ఈ మఖానాతో ఎంతో రుచికరమైన మసాలా కర్రీ కూడా ప్రిపేర్ చేసుకోవచ్చు.వేడివేడి అన్నం, చపాతీలు, పుల్కా.. ఇలా ఎందులోకైనా ఈ రెసిపీ అద్దిరిపోతుంది. మరి ఇక లేట్ చేయకుండా మఖానా మసాలా కర్రీ ఎలా తయారు చేయాలో ఇప్పుడు చూద్దాం.
కావాల్సిన పదార్థాలు..
- మఖానా-50 గ్రాములు
- టమాటలు -2
- ఉల్లిపాయలు-2
- బిర్యానీ ఆకు- 1
- షాజీరా-అరటీస్పూన్
- ఉప్పు రుచికి సరిపడా
- గసగసాలు-అరటీస్పూన్
- జీడిపప్పు-పావుకప్పు
- నూనె
- అల్లం వెల్లుల్లి పేస్ట్-టేబుల్స్పూన్
- కరివేపాకు-2
- పచ్చిమిర్చి-3
- పసుపు-చిటికెడు
- కారం- టేబుల్స్పూన్
- గరం మసాలా-టీస్పూన్
- పెరుగు -పావు కప్పు
- కసూరీ మేథీ- కొద్దిగా
తయారీ విధానం..
- ముందుగా స్టౌ ఆన్ చేసి పాన్లో కొద్దిగా ఆయిల్ వేయాలి. నూనె వేడైన తర్వాత మఖానా వేసి రెండు నిమిషాలు వేయించి ప్లేట్లోకి తీసుకోవాలి.
- అలాగే గసగసాలను నీటిలో నానబెట్టుకోవాలి. కొద్దిగా జీడిపప్పు కూడా నానబెట్టుకోవాలి.
- ఇప్పుడు ఒక పాన్లో 2 టేబుల్స్పూన్ల ఆయిల్ వేసి వేడి చేయండి. నూనె వేడైన తర్వాత బిర్యానీఆకు, షాజీరా వేసి వేయించండి.
- ఇప్పుడు ఉల్లిపాయ ముక్కలు వేసుకోవాలి. ఉల్లిపాయ ముక్కలు గోల్డెన్ బ్రౌన్ కలర్లో వేగిన తర్వాత కొన్ని ఉల్లిపాయ ముక్కలను ప్లేట్లోకి తీసుకుని స్టౌ మీడియం ఫ్లేమ్లో పెట్టుకోండి.
- ఇప్పుడు ఒక మిక్సీ గిన్నెలోకి టమాటా ముక్కలు, నానబెట్టుకున్న జీడిపప్పు కొన్ని, గసగసాలు, పక్కకు పెట్టుకున్న ఉల్లిపాయల మిశ్రమం వేసి మెత్తగా గ్రైండ్ చేసుకోవాలి.
- ఈ మిశ్రమాన్ని పాన్లో వేసి బాగా మిక్స్ చేయండి. అలాగే అల్లం వెల్లుల్లి పేస్ట్ వేసి పచ్చి వాసన పోయి నూనె పైకి తేలెంతవరకు ఫ్రై చేసుకోవాలి. ఆ తర్వాత కరివేపాకు, పచ్చిమిర్చి, రుచికి సరిపడా ఉప్పు వేసుకుని బాగా కలపండి.
- తర్వాత గరం మసాలా, కారం వేసి నిమిషం ఫ్రై చేయండి. ఇప్పుడు పెరుగు వేసి మిక్స్ చేయండి. తర్వాత గ్రేవికి సరిపడా వాటర్ పోసి కర్రీని ఉడికించండి.
- గ్రేవీ కాస్త చిక్కబడిన తర్వాత వేయించుకున్న మఖానా వేసి బాగా మిక్స్ చేయండి.
- ఇప్పుడు నానబెట్టుకున్న కొన్ని జీడిపప్పులు, కొద్దిగా కసూరీ మేథీ చల్లుకుని మూత పెట్టాలి.
- ఒక రెండు నిమిషాల తర్వాత స్టౌ ఆఫ్ చేస్తే సరి. ఎంతో రుచికరమైన మఖానా మసాలా కర్రీ మీ ముందుంటుంది.
- నచ్చితే మీరు కూడా ఈ విధంగా మఖానాతో సరికొత్త రెసిపీ ట్రై చేయండి.
హోటల్లో దొరికే సూపర్ టేస్టీ సాంబార్.. ఇప్పుడు మీ ఇంట్లోనే! - ఈ చిన్న టిప్స్ పాటిస్తే ఘుమఘుమలాడిపోద్ది
వంకాయ పచ్చి కారం - రొటీన్గా కాకుండా వెరైటీగా చేసుకోండిలా!
