How To Make Badam Milk At Home: మార్చి రాకముందే ఉష్ణోగ్రతలు పెరుగుతోన్నాయి. ఈ క్రమంలోనే ఉక్కపోత నుంచి బయటపడేందుకు, ఎండ నుంచి ఉపశమనం పొందేందుకు చాలా మంది కూల్కూల్గా ఉండే జ్యూసులు, డ్రింక్లను ఆశ్రయిస్తున్నారు. మరికొద్దిమంది బాదంపాలకు ఓటేస్తున్నారు. అయితే బయట షాపుల్లో లభించే బాదం పాలు అంత చిక్కగా ఉండవు. పైగా వాటిలో బాదం పప్పులు బదులు వాటి ఫ్లేవర్ తెలిసేలా ఏవేవో కెమికల్స్ కలుపుతుంటారు. అలా అని వాటిని తాగలేకుండా కూడా ఉండలేరు. ఇకపై బాదం పాలు తాగలనుకున్నవారు ఎటువంటి టెన్షన్ లేకుండా ఇంట్లోనే చేసుకోవచ్చు. పైగా ఇవి ఎంతో టేస్టీగా ఉంటాయి. అలాగే హెల్దీ కూడా. ఒక్కసారి ఈ పాలను రెడీ చేశారంటే పిల్లల నుంచి పెద్దల వరకూ అందరూ ఒకటికి రెండు గ్లాసులు తాగడం పక్కా! మరి దీనికి కావాల్సిన పదార్థాలు, తయారీ విధానం ఇప్పుడు చూద్దాం.
కావాల్సిన పదార్థాలు:
- బాదం పప్పులు - 20
- చిక్కటి పాలు - 1 లీటర్
- కుంకుమ పువ్వు - చిటికెడు
- కస్టర్డ్ పౌడర్ - ఒకటిన్నర స్పూన్
- యాలకులు పొడి - అర టీ స్పూన్
- పంచదార - 5 టేబుల్ స్పూన్లు
- సన్నగా కట్ చేసిన బాదం - 1 టీ స్పూన్లు
- సన్నగా తరిగిన పిస్తా - 1 టీ స్పూన్
- జీడిపప్పు పలుకులు - 1 టీ స్పూన్
తయారీ విధానం:
- ఓ గిన్నెలోకి బాదం పప్పులు వేసి కొన్ని నీళ్లు పోసి రాత్రంతా నానబెట్టాలి. ఒకవేళ అంత టైమ్ లేదంటే వేడి నీటిలో ఓ గంట నాననివ్వాలి. నానిన బాదం పప్పుల పొట్టు తీసి ఓ గిన్నెలోకి తీసుకోవాలి.
- స్టవ్ ఆన్ చేసి మందపాటి, వెడల్పు గిన్నె పెట్టి చిక్కటి పాలు పోసుకోవాలి. హై ఫ్లేమ్లో పాలు రెండు పొంగులు వచ్చే వరకు మరిగించుకోవాలి. ఆ తర్వాత సిమ్లో పెట్టి అందులోనుంచి ఓ అర కప్పు పాలను ఓ గిన్నెలోకి తీసుకుని పక్కన పెట్టాలి.
- ఈ లోపు పాలను కలుపుతూ మరిగించుకోవాలి. పాలు మరిగిస్తున్నప్పుడు గిన్నెకు అంటుకున్న మీగడను తీసి పాలలో వేస్తూ మరిగించుకోవాలి.
- పాలు మరుగుతున్నప్పుడు కుంకుమ పువ్వు వేసి కలిపాలి. ఒకవేళ మీ దగ్గర కుంకుమ పువ్వు లేకపోతే స్కిప్ చేయవచ్చు. లేదంటే ఫుడ్ కలర్ వేసుకున్న సరిపోతుంది.
- పాలు మరుగుతున్న సమయంలో మిక్సీ జార్ తీసుకుని అందులో పొట్టుతీసిన బాదం పప్పులు, పక్కకు తీసిన పాలలో ఓ రెండు టేబుల్ స్పూన్ల మిల్క్ పోసి మెత్తని పేస్ట్లా చేసుకోవాలి.
- ఇప్పుడు మిగిలిన పాలలో కస్టర్డ్ పౌడర్ వేసి ఉండలు లేకుండా కలపాలి. పాలు వేడిగా ఉంటే కస్టర్డ్ పౌడర్ గడ్డకడుతుంది. కాబట్టి పాలు చల్లారిన తర్వాత ఈ పొడి వేసి కలపాలి.
- మరుగుతున్న పాలు చిక్కబడిన తర్వాత యాలకుల పొడి వేసి కలపాలి. ఆ తర్వాత కస్టర్డ్ పౌడర్ కలిపిన పాలను మరుగుతున్న పాలల్లో కొద్దికొద్దిగా పోసుకుంటూ కలిపి ఓ మూడు నిమిషాలు కలుపుతూ మరిగించుకోవాలి.
- ఆ తర్వాత గ్రైండ్ చేసుకున్న బాదం పేస్ట్ వేసి మరొక్కసారి కలిపి మరో 5 నిమిషాలు కాగబెట్టాలి.
- ఇప్పుడు పంచదార వేసి కలపాలి. ఇక్కడ పంచదార అనేది మీరు తీపి తినేదానికి అనుగుణంగా వేసుకుంటే సరి. ఆ తర్వాత సన్నగా తరిగిన బాదం, పిస్తా, జీడిపప్పు పలుకులు వేసి మరో 5 నిమిషాలు లో ఫ్లేమ్లో మరిగించాలి.
- బాదం పాలు చిక్కగా మారిన తర్వాత స్టవ్ ఆఫ్ చేసి పూర్తిగా చల్లారనివ్వాలి. పూర్తిగా చల్లారిన తర్వాత ఓ గాజు జార్లోకి తీసుకుని మూత పెట్టి ఫ్రిజ్లో ఉంచాలి. వీలైతే రాత్రంతా లేదంటే 3 గంటల పాటు ఫ్రిజ్లో ఉంచాలి.
- 3 గంటల తర్వాత ఫ్రిజ్లో నుంచి తీసి గ్లాస్ల్లోకి సర్వ్ చేసుకుని పైన డ్రైఫ్రూట్స్తో గార్నిష్ చేసుకుంటే సూపర్ టేస్టీ అండ్ హెల్దీ బాదం షేక్ రెడీ. నచ్చితే మీరూ ట్రై చేయండి.
నోట్లో వేసుకుంటే వెన్నెలా కరిగిపోయే "కొబ్బరి జున్ను" - సింపుల్గా ప్రిపేర్ చేసుకోండిలా! - టేస్ట్ వేరే లెవల్ అంతే!
ఇంట్లో పాలు, పంచదార ఉంటే చాలు- ఎంతో రుచికరమైన "పాలకోవా" ఈజీగా చేసుకోవచ్చు!
