How to Make Nethi Bobbatlu in Telugu :బొబ్బట్లు.. ఈ పేరు చెబితేనే చాలు చాలా మందికి నోరూరిపోతుంది. కానీ, కొందరు టైమ్ ఎక్కువ పడుతుందని, మరికొందరు వీటిని ఎలా తయారుచేసుకోవాలో తెలియక ఆగిపోతారు. మీరూ ఆ జాబితాలో ఉన్నారా? అయితే, ఈ దసరా పండక్కి ఇంటి వద్ద నేతి బొబ్బట్లను ఇలా ఈజీగా ప్రిపేర్ చేసుకోండి. చాలా రుచికరంగా రావడమే కాదు.. నోట్లో వేసుకుంటే వెన్నలా కరిగిపోతాయి! ఇంతకీ.. వీటిని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.
కావాల్సిన పదార్థాలు :
- శనగపప్పు - 1 కప్పు
- పసుపు - పావు టీస్పూన్
- ఉప్పు - చిటికెడు
- నెయ్యి - తగినంత
- బెల్లం తురుము - 1 కప్పు
- యాలకుల పొడి - అరటీస్పూన్
పిండి తయారీ కోసం :
- మైదాపిండి - ఒకటిన్నర కప్పులు
- గోధుమపిండి - అరకప్పు
- నెయ్యి - 2 నుంచి 3 టేబుల్స్పూన్లు
- ఉప్పు - చిటికెడు
- పసుపు - పావు టీస్పూన్
దసరా స్పెషల్ స్వీట్స్ : నోరూరించే "రవ్వ జిలేజీ, మూంగ్దాల్ లడ్డు, పాల బూరెలు"- ఈజీగా చేసుకోండిలా!
తయారీ విధానం :
- ఇందుకోసం ముందుగా ఒక గిన్నెలో శనగపప్పును తీసుకొని శుభ్రంగా కడిగి ఒక గంటపాటు నానబెట్టుకోవాలి.
- ఆ తర్వాత నానబెట్టిన శనగపప్పును వాటర్ వడకట్టి ప్రెషర్ కుక్కర్లో వేసుకొని ఒకటిన్నర కప్పుల వాటర్ పోసుకోవాలి. ఆపై అందులో పసుపు, ఉప్పు, 1 టీస్పూన్ నెయ్యి వేసుకొని మూతపెట్టి 3 నుంచి 4 విజిల్స్ వచ్చేంత వరకు ఉడికించుకోవాలి.
- పప్పు ఉడికేలోపు పిండిని ప్రిపేర్ చేసుకోవాలి. ఇందుకోసం ఒక మిక్సింగ్ బౌల్ తీసుకొని అందులో జల్లించుకున్న మైదా పిండి, గోధుమపిండి, నెయ్యి, ఉప్పు, పసుపు వేసుకొని అన్నీ కలిసేలా బాగా మిక్స్ చేసుకోవాలి.
- తర్వాత సరిపడా వాటర్ని తీసుకొని కొద్ది కొద్దిగా యాడ్ చేసుకుంటూ చపాతీ పిండిలా సాఫ్ట్గా కలుపుకోవాలి. ఆపై పిండిముద్దపై కొద్దిగా నెయ్యి అప్లై చేసి మూత పెట్టి 15 నిమిషాల పాటు అలా వదిలేయాలి.
- ఇప్పుడు కుక్కర్లో ఉడికించుకున్న శనగపప్పును వాటర్ లేకుండా వడకట్టుకోవాలి.
- తర్వాత మిక్సీ జార్ తీసుకొని అందులో పప్పు వేసుకొని మెత్తగా గ్రైండ్ చేసుకొని ఒక బౌల్లోకి తీసుకొని పక్కన ఉంచుకోవాలి.
- ఇప్పుడు స్టౌపై పాన్ పెట్టుకొని 1 టీస్పూన్ నెయ్యివేసుకున్నాక.. బెల్లం తురుము వేసుకొని మంటను అడ్జస్ట్ చేసుకుంటూ గరిటెతో కలుపుతూ బెల్లాన్ని కరిగించుకోవాలి. అయితే, మీరు కాస్త స్వీట్ ఎక్కువ కావాలనుకుంటే అదనంగా మరో రెండు స్పూన్ల బెల్లం యాడ్ చేసుకోవచ్చు.
- బెల్లంపూర్తిగా కరిగిందనుకున్నాక.. అందులో ముందుగా మిక్సీ పట్టుకొని పెట్టుకున్న శనగపప్పు ముద్దను వేసి కలుపుతూ పాకం పిండి మొత్తానికి పట్టేలా బాగా మిక్స్ చేసుకోవాలి.
- ఆ విధంగా మిక్స్ చేసుకున్నాక.. పూర్ణం పాన్ సైడ్స్కి అంటుకోకుండా 3 టేబుల్స్పూన్ల నెయ్యి వేసుకొని కలుపుకోవాలి. అలాగే.. మంచి ఫ్లేవర్ కోసం యాలకుల పొడినీ వేసుకొని బాగా మిక్స్ చేసుకోవాలి. అయితే.. ఈ పూర్ణం అనేది మరీ మెత్తగా, గట్టిగా కాకుండా సెమీ సాఫ్ట్గా ఉండేలా చూసుకోవాలి.
- ఆపై స్టౌను మీడియం ఫ్లేమ్లో పెట్టి కలుపుతూ ఎప్పుడైతే పూర్ణం పాన్ నుంచి సెపరేట్ అవ్వడం స్టార్ట్ అవుతుందో అప్పుడు స్టౌ ఆఫ్ చేసి.. ఆ పూర్ణాన్ని మరో ప్లేట్లోకి తీసుకొని పూర్తిగా చల్లార్చుకోవాలి.
- అనంతరం పూర్ణం చల్లారాక.. చేతికి కొంచం నెయ్యి రాసుకుంటూ ఆ మిశ్రమాన్ని చిన్న చిన్న ఉండలుగా చేసుకొని పక్కన ఉంచుకోవాలి.
- ఇప్పుడు మీరు ముందుగా కలిపి పెట్టుకున్న పిండిముద్దని తీసుకొని మరోసారి మెత్తగా కలుపుకోవాలి.
- ఆ తర్వాత ఆ పిండి ముద్దనూ పూర్ణం ముద్దల సైజ్లో చిన్న చిన్న ఉండలుగా చేసుకోవాలి.
- ఇప్పుడు రెండు బటర్ పేపర్లు తీసుకొని రౌండ్గా షేప్లో కట్ చేసుకోవాలి. ఆ తర్వాత ఒక బటర్ పేపర్పై కొద్దిగా నెయ్యి రాసుకొని ఒక పిండి ముద్దను ఉంచి ముందుగా చిన్న పూరి సైజ్లా కాస్త స్ప్రెడ్ చేసుకోవాలి.
- అనంతరం దానిపై పూర్ణం ముద్దను ఉంచి అంచులను చక్కగా సీల్ చేసుకోవాలి. ఆపై మళ్లీ నెమ్మదిగా ముందుగా చిన్న పూరీ సైజ్లా స్ప్రెడ్ చేసుకోవాలి. తర్వాత దానిపై కొద్దిగా నెయ్యి వేసి పైన మరో బటర్ పేపర్ను ఉంచి చపాతీ రోలర్తో వీలైనంత పలుచగా రోల్ చేసుకోవాలి.
- ఇప్పుడు స్టౌపై దోశ పాన్ పెట్టుకొని వేడి చేసుకోవాలి. పాన్ వేడి అయ్యాక మీరు ప్రిపేర్ చేసుకున్న బొబ్బట్టును వేసి ముందుగా 5 నుంచి 10 సెకన్ల పాటు రెండు వైపులా కాల్చుకోవాలి.
- ఆ తర్వాత నెయ్యి అప్లై చేసుకొని మరోసారి కాల్చుకొని సర్వ్ చేసుకుంటే చాలు. అంతే.. ఎంతో టేస్టీగా ఉండే నోట్లే వేసుకుంటే కరిగిపోయే "నేతి బొబ్బట్లు" రెడీ!
గోధుమ పిండితో బాదుషా! - రుచి, ఆరోగ్యం ఒకేసారి - ఈ పండక్కి ఇలా తయారు చేయండి
