How To Make Chepala Pulusu in Telugu:అత్యంత ఆరోగ్యకరమైన ఆహారపదార్ధాలలో ఒకటి.. చేపలు. వీటిని మనం ఎన్నో రకాలుగా వండుకోవచ్చు. ఒక్కో ప్రాంతంలో ఒక్కో వెరైటీ వంటకంగా దీనిని వండుకుంటుంటారు. అయితే, మీరు ఎప్పుడైనా ఇలా ఆంధ్ర స్టైల్లో చేపల పులుసు ప్రిపేర్ చేసుకున్నారా? లేదంటే మాత్రం.. ఓసారి రుచి చూడాల్సిందే! అద్దిరిపోయే రుచి ఈ కర్రీ సొంతం. అయితే ఇంకెందుకు ఆలస్యం.. ఈ నోరూరించే ఆంధ్ర స్టైల్ చేపల పులుసుకు కావాల్సిన పదార్థాలేంటి? ఎలా వండుకోవాలో ఈ స్టోరీలో తెలుసుకుందాం.
కావాల్సిన పదార్థాలు :
- శుభ్రం చేసిన చేపలు - 300 గ్రాములు
- ధనియాలు - 1 టేబుల్ స్పూన్
- వెల్లుల్లి రెబ్బలు - 8
- మెంతులు - అర టీస్పూన్
- ఎండుమిర్చి - 6
- ఉల్లిపాయలు - 2(పెద్ద సైజ్లో ఉన్నవి)
- పచ్చిమిర్చి - 4
- టమాటా - 1(పెద్ద సైజ్లో ఉన్నది)
- ఆయిల్ - అర కప్పు
- కరివేపాకు - 3 రెమ్మలు
- ఉప్పు - రుచికి తగినంత
- అల్లం వెల్లుల్లి పేస్ట్ - 1 టేబుల్ స్పూన్
- పసుపు - పావు చెంచా
- కారం - 1 టేబుల్ స్పూన్
- ధనియాల పొడి - 1 టేబుల్ స్పూన్
- చింతపండు - 50 గ్రాములు
- కొత్తిమీర - అరకట్ట
తయారీ విధానం :
- ఇందుకోసం ముందుగా చేప ముక్కలను శుభ్రంగా కడిగి పక్కన పెట్టుకోవాలి. అదేవిధంగా రెసిపీలోకి కావాల్సిన ఉల్లిపాయలు, పచ్చిమిర్చి, టమాటా, కొత్తిమీరను తరుక్కొని పక్కన పెట్టుకోవాలి. అలాగే.. ఒక చిన్న బౌల్లో చింతపండును నానబెట్టుకోవాలి.
- ఇప్పుడు స్టౌపై పాన్ పెట్టుకొని ధనియాలు, మెంతులు, వెల్లుల్లి రెబ్బలు, ఎండుమిర్చి వేసుకోవాలి. ఆపై మంటను లో ఫ్లేమ్లో ఉంచి అవి మంచి సువాసన వచ్చేంత వరకు వేయించుకోవాలి.
- తర్వాత ఆ మిశ్రమాన్ని మిక్సీ జార్లోకి తీసుకొని మెత్తని పొడిలా మిక్సీ పట్టుకొని పక్కన ఉంచుకోవాలి.
- అనంతరం ముందుగా కట్ చేసుకున్న ఉల్లిపాయ, పచ్చిమిర్చినీ మిక్సీ జార్లోకి తీసుకొని మెత్తని పేస్ట్లా గ్రైండ్ చేసుకొని పక్కన పెట్టుకోవాలి.
- ఇప్పుడు స్టౌపై ఇనుప కడాయి పెట్టుకొని ఆయిల్ వేసుకోవాలి. నూనె వేడెక్కాక.. అందులో కరివేపాకు, మిక్సీ పట్టుకున్న ఉల్లి పచ్చిమిర్చి పేస్ట్ వేసుకోవాలి. ఆపై మంటను మీడియం ఫ్లేమ్లో ఉంచి ఆ మిశ్రమం పచ్చివాసన పోయి గోల్డెన్ కలర్ వచ్చేంత వరకు వేయించుకోవాలి.
- ఆవిధంగా వేయించుకున్నాక.. అందులో ఉప్పు, అల్లం వెల్లుల్లి పేస్ట్, పసుపు వేసి ఒక నిమిషం పాటు వేయించుకోవాలి. అనంతరం ముందుగా తరిగి పెట్టుకున్న టమాటా ముక్కలు కూడా వేసుకొని పచ్చివాసన పోయి నూనె పైకి తేలేంత వరకు ఫ్రై చేసుకోవాలి.
- ఇక టమాటాలు పూర్తిగా మగ్గిపోయానుకున్నాక.. కారం, ధనియాల పొడి వేసి కలుపుకొని మరోసారి ఆ మిశ్రమాన్ని నూనె తేలేంత వరకు బాగా వేయించుకోవాలి.
- ఆ మిశ్రమం బాగా వేగాక.. అందులో ముందుగా నానబెట్టిన చింతపండు నుంచి తీసిన 200ఎంఎల్ చింతపండు రసాన్ని పోసి బాగా మిక్స్ చేసుకోవాలి. ఆపై 300ఎంఎల్ వాటర్ పోసుకొని మంటను మీడియం ఫ్లేమ్లో ఉంచి బాగా మసల కాచుకోవాలి.
- ఇక ఆ మిశ్రమం బాగా మసులుతున్నప్పుడు.. ముందుగా శుభ్రం చేసి పెట్టుకున్న చేప ముక్కలు వేసుకోవాలి. అయితే, చేప ముక్కలు వేశాక గరిటెతో కలపకుండా కడాయిని రెండు చేతులతో పట్టుకొని బాగా కదపాలి. తర్వాత మంటను లో ఫ్లేమ్లో ఉంచి 7 నుంచి 8 నిమిషాల పాటు ఉడికించుకోవాలి.
- ఆ మిశ్రమంలో నూనె పైకి తేలి బాగా ఉడుకుపట్టాక.. మరోసారి కడాయిని చేతులతో పట్టుకొని బాగా కదుపుకోవాలి. ఆపై ఫోర్క్ స్పూన్తో ముక్క ఉడికిందో లేదో చెక్ చేసుకోవాలి. ఒకవేళ ముక్క ఉడికినట్లయితే.. కొత్తిమీర తరుగు, ముందుగా మిక్సీ పట్టి పెట్టుకున్న ధనియాల పొడి వేసుకొని ఓసారి జాగ్రత్తగా కదుపుకోవాలి.
- ఆ తర్వాత లో ఫ్లేమ్ మీద మరో రెండు నిమిషాల పాటు మిశ్రమాన్ని ఉడికించుకొని దింపుకుంటే చాలు. అంతే.. ఎంతో టేస్టీగా ఉండే నోరూరించే "ఆంధ్ర స్టైల్ చేపల పులుసు" రెడీ!
- అయితే, చేపల పులుసును దింపుకున్న తర్వాత వెంటనే తినకుండా పూర్తిగా చల్లారాక తింటే టేస్ట్ చాలా బాగుంటుంది.