చెవిలోకి దిగిన తుటా- రక్తం కారుతున్నా తగ్గేదేలే! పిడికిలి బిగించి ఫ్యాన్స్​కు ట్రంప్ ధైర్యం - Trump Was Attacked

Trump Rally Scene : అమెరికా మాజీ అధ్యక్షుడు డొనాల్డ్ ట్రంప్ సభకు రావడం, ప్రసంగం ప్రారంభించడం, దాడి వంటివి నిమిషాల వ్యవధిలోనే జరిగిపోయాయి. అసలు ట్రంప్​పై దాడి ఎలా జరిగింది? ఆ సమయంలో ట్రంప్ ఎలా స్పందించారు? తదితర వివరాలు ఈ స్టోరీలో తెలుసుకుందాం.

సమయం సాయంత్రం 6 గంటల 2 నిమిషాలు.. వేదికపై రిపబ్లికన్ పార్టీ అభ్యర్థి డొనాల్డ్ ట్రంప్.. అభిమానులు ట్రంప్.. ట్రంప్ అంటూ నినాదాలు.. 'గాడ్ బ్లెస్ ది అమెరికా' అంటూ ట్రంప్ ప్రసంగం స్టార్ట్.. మండుడెండను లెక్కచెయ్యకుండా అభిమానుల కేకలు.. జో బైడెన్​కు వ్యతిరేకంగా వలసలపై ఓ చార్ట్​ను చూపించిన ట్రంప్.. ప్రసంగాన్ని అందరూ ఆసక్తిగా వింటున్నారు.. ఇంతలోనే సడెన్​గా తుపాకీ కాల్పుల గర్జన.. అంతా నిశబ్దం.. స్టేజ్ పోడియం వద్ద కూర్చొండిపోయిన ట్రంప్.. ఏమైందని అభిమానులు, రిపబ్లికన్లలో ఆందోళన.. ట్రంప్ చెవి నుంచి రక్తం. ఇది అమెరికా మాజీ అధ్యక్షుడు డొనాల్డ్ ట్రంప్ దాడి జరిగిన సీన్.

90 డిగ్రీల ఫారెన్ హీట్ ఎండలో!
Trump Rally Scene : శనివారం సాయంత్రం అమెరికాలోని పెన్సిల్వేనియాలోని ఓ సభలో డొనాల్డ్ ట్రంప్ హాజరయ్యారు. ఉత్సాహంగా సభకు హాజరైన కార్యకర్తలు, అభిమానులకు అభివాదం చేశారు. 90 డిగ్రీల ఫారెన్ హీట్ ఉష్ణోగ్రతలోనూ సభకు హాజరైనవారు ట్రంప్.. ట్రంప్ అని నినాదాలతో హోరెత్తించారు. అమెరికాలోకి అక్రమ వలసలను నిరసిస్తూ జో బైడెన్​కు వ్యతిరేకంగా ట్రంప్ ఓ చార్ట్​ను ప్రేక్షకులకు చూపించారు. అంతలోనే తుపాకీ బుల్లెట్ల శబ్దం వచ్చింది. వెంటనే సీక్రెట్ సర్వీస్ ఏజెంట్లు ట్రంప్ పోడియం వద్దకు చేరుకున్నారు. అప్పటికే ట్రంప్ చెవిని పట్టుకున్నారు. అందులోనుంచి రక్తం కారుతోంది. సర్వీస్ ఏజెంట్లు కిందికి కూర్చొమని చెప్పడం వల్ల ట్రంప్ పోడియం నేల మీద కూర్చొండిపోయారు. అప్పుడు ఒక్కసారిగా సభా ప్రాంగణంలో నిశబ్ద వాతావరణం నెలకొంది. ట్రంప్​నకు సర్వీస్ ఏజెంట్లు రక్షణగా ఉండి ఆయనను స్టేజ్ ఎడమవైపు తీసుకెళ్లారు. అప్పుడు వారికి 'వెయిట్ వెయిట్' అని అన్నారు ట్రంప్. తన ప్రచార సభకు వచ్చినవారికి ట్రంప్ పిడికిలిని చూపించారు. అనంతరం సర్వీస్ ఏజెంట్లు ట్రంప్​ను బ్లాక్ ఎస్ యూవీలో ఆస్పత్రికి తరలించారు.

కాగా, పెన్సిల్వేనియాలోని బట్లర్ నగరంలో రిపబ్లికన్ పార్టీకి భారీ మద్దతు ఉంది. 2016లో ట్రంప్​ను అధ్యక్షుడిగా చేయడంలో ఈ ప్రాంతం కీలక పాత్ర పోషించింది. 2020లోనూ డొనాల్డ్ ట్రంప్ బట్లర్ కౌంటీలో గెలుపొందారు. అందుకే ఈ ప్రాంతంలో శనివారం జరిగిన ట్రంప్ సభకు భారీగా జనాలు తరలివచ్చారు. ఆ జనసందోహాన్ని చూసి ట్రంప్ ఇదొక అందమైన సభ అని అభివర్ణించారు.

ట్రంప్ సభావేదికకు ఎదురుగా ప్రత్యేక అతిథుల కోసం ఏర్పాటు చేసిన ఒక సెక్షన్​లో బీవర్ కౌంటీ రిపబ్లికన్ పార్టీ వైస్ ఛైర్మన్ రికో ఎల్మోర్ కూర్చున్నారు. అంతలోనే కాల్పుల శబ్దం వినిపించింది. సభకు వచ్చిన వచ్చినవారందరూ ఒక్కసారిగా భయాందోళనకు గురయ్యారు. అప్పుడు ఎల్మోర్ ఎడమవైపున కూర్చొన్న ఓ వ్యక్తి వైద్యుడి కోసం కేకలు వేశారు. ఎల్మోర్ వైద్యుడు కానప్పటికీ, ఆయన సైన్యంలో ఉన్నప్పుడు ప్రథమ చికిత్స, సీపీఆర్ చేయడం నేర్చుకున్నారు. వెంటనే ఎల్మోర్ బారికేడ్ దూసి వెళ్లగా, అప్పటికే దుండగులు కాల్పుల్లో గాయపడిన వ్యక్తి ప్రాణాలు విడిచారు. ఈ విషయాన్ని ట్రంప్​పై హత్యాయత్నం అనంతరం ఓ ఇంటర్వ్యూలో ఎల్మోర్ తెలిపారు.