Cancer Patients Exposed To Air Pollution : వాయు కాలుష్యం మనుషుల ప్రాణాలను భారీగా బలిగొంటోంది. 2021లో ప్రపంచంలో సంభవించిన మొత్తం మరణాల్లో 12 శాతం వాయు కాలుష్యం వల్లే సంభవించాయని ఓ నివేదిక వెల్లడించింది. అంతే కాదు వాయు కాలుష్యం కారణంగా క్యాన్సర్ రోగులుతీవ్రంగా ప్రభావితం అవుతున్నారని, వారికి మరణ ప్రమాదం ఎక్కువగా పెరుగుతోందని పరిశోధకులు హెచ్చరించారు.
2021లో ప్రపంచవ్యాప్తంగా వాయు కాలుష్యం కారణంగా 81 లక్షల మంది మరణించారు. ఇందులో భారతీయులే 21 లక్షల మంది ఉన్నారని ఓ నివేదిక వెల్లడించింది. ఇక వాయు కాలుష్యం కారణంగా చైనాలో 23 లక్షల మంది మరణించారు. అంటే 2021లో వాయుకాలుష్యంతో ముడిపడి ఉన్న మరణాలలో భారత్‌-చైనాలు 54 శాతం వాటా కలిగి ఉన్నాయని నివేదిక వెల్లడించింది. భారతదేశంలో ఐదేళ్లలోపు 1,69,400 మంది చిన్నారుల మరణాలకు వాయుకాలుష్యం కారణమైందని యునిసెఫ్ భాగస్వామ్యంతో పనిచేస్తున్న అమెరికాకు చెందిన స్వతంత్ర పరిశోధనా సంస్థ హెల్త్ ఎఫెక్ట్స్ ఇన్‌స్టిట్యూట్ HEI వెల్లడించింది. నైజీరియాలో 1,14,100 మంది, పాకిస్థాన్‌లో 68,100 మంది, ఇథియోపియాలో 31,100 మంది, బంగ్లాదేశ్‌లో 19,100 మంది చిన్నారులు వాయి కాలుష్యం కారణంగా మరణించారు.
దక్షిణాసియాలోనే అధికం
దక్షిణాసియాలో మరణాలకు వాయుకాలుష్యం ప్రధాన కారకంగా ఉందని, అధిక రక్తపోటు, ఆహారం, పొగాకు వంటివి తర్వాతి స్థానాల్లో ఉన్నాయని HEI నివేదిక పేర్కొంది. దక్షిణాసియాలో పాకిస్తాన్ 2,56,000, బంగ్లాదేశ్ 2,36,300, మయన్మార్ 1,01,600 మంది వాయు కాలుష్యం కారణంగా మరణించారని వెల్లడించింది. ఆగ్నేయాసియాలో ఇండోనేషియా 2,21,600 మరణాలు, వియత్నాం 99,700, ఫిలిప్పీన్స్ 98,209 మరణాలు సంభవించాయి. ఆఫ్రికాలో నైజీరియా 2,06,700, ఈజిప్ట్ 1,16,500ల వాయు కాలుష్యం వల్ల మరణాలు సంభవించాయి. వాయు కాలుష్యం వల్ల గుండె జబ్బులు, బ్రెయిన్‌ స్ట్రోక్, మధుమేహం, ఊపిరితిత్తుల క్యాన్సర్ వంటి వ్యాధులు వస్తున్నాయని ఈ అధ్యయనం తెలిపింది. వాయు కాలుష్యం ఆరోగ్యంపై అపారమైన ప్రభావం చూపుతోందని, చిన్నపిల్లలు, వృద్ధులు ఎక్కువగా వాయు కాలుష్యం బారిన పడుతున్నారని, మధ్య ఆదాయ దేశాలపై కూడా వాయు కాలుష్యం గణనీయమైన ప్రభావం చూపుతోందని HEI చీఫ్‌ పల్లవి పంత్ తెలిపారు.