మెగాస్టార్​, సూపర్​ స్టార్​, ఐకాన్​ స్టార్​ - పేర్ల కంటే టైటిల్స్​తోనే పాపులరైన నటులు​ వీళ్లే!

మెగాస్టార్​, సూపర్​ స్టార్​, ఐకాన్​ స్టార్​ - పేర్ల కంటే టైటిల్స్​తోనే పాపులరైన నటులు​ వీళ్లే! - ఎలాగంటే?

Star Heros Titles History :థియేట‌ర్ల‌లో కానీ ఓటీటీల్లో కానీ హీరో ఎంట్రీకి ముందు వారి పేరుతో పాటు వారికి ఉన్న స్పెషల్ ట్యాగ్​ను వేస్తారు. దాదాపు ప్ర‌తి హీరోకూ అటువంటి ట్యాగ్​ ఉంటుంది. మెగాస్టార్, సూప‌ర్ స్టార్, యంగ్ రెబ‌ల్ స్టార్, యంగ్ టైగ‌ర్ లాంటి ట్యాగ్స్​ క‌లిగిన స్టార్స్ ఉండగా, వీటితోపాటు ప‌వ‌ర్ స్టార్, ఐకాన్ స్టార్, ఎన‌ర్జిటిక్ స్టార్, నేచుర‌ల్ స్టార్ త‌దిత‌ర బిరుదులూ ఉన్నాయి.

ఇక బీటౌన్​లో అమితాబ్ బ‌చ్చ‌న్​ను తమ ఫ్యాన్స్ ముద్దుగా బిగ్​బీ అని పిలుస్తారు. షారుక్​ ఖాన్​, సల్మాన్ ఖాన్​, ఆమిర్ ఖాన్ త్ర‌యాల‌ను వారి వారి ట్యాగ్స్​తోనే పిలుస్తుంటారు. అలాగే తమిళంలో ర‌జ‌నీకాంత్​ను ఆయన పేరుకంటే సూప‌ర్ స్టార్ అనే పిలుస్తుంటారు అభిమానలు. ఇక క‌మ‌ల్ హాస‌న్​ను లోకనాయ‌కుడు అని, విజ‌య్​ని దళ‌ప‌తి, అజ‌య్​ని త‌లా అని ముద్దుగా పిలుస్తారు. అయితే ఇంత‌కీ వీళ్ల‌కు ఈ టైటిల్స్ ఎవ‌రు ఇచ్చారు అనే ఆలోచ‌న ఎప్పుడైనా వ‌చ్చిందా?

ఇత‌ర ఇండ‌స్ట్రీల సంగతి పక్కనపెడితే తెలుగు హీరోలకు ఉన్న టైటిల్స్​లో ఓ ప్రత్యేకత ఉంది. అవి కొన్ని హీరోల విషయంలో క్రమంగా మారతూ వచ్చాయి కూడా. ఉదాహ‌ర‌ణ‌కు అల్లు అర్జున్ - వీవీ వినాయ‌క్ కాంబోలో తెరకెక్కిన 'బ‌న్నీ' సినిమా ఎంట్రీలో స్టైలిష్ స్టార్ అనే టైటిల్ వేశారు. ఇక అప్పటి నుంచి ఆయన్ను అందరూ ఆ పేరుతోనే పిలవడం మొదలెట్టారు. అయితే 'పుష్ప' సక్సెస్​ తర్వాత ఆయన ఐకాన్​ స్టార్​గా మారిపోయారు.

చిరంజీవి త‌నయుడుగా సినీ రంగంలో ఎంట్రీ ఇచ్చిన రామ్ చర‌ణ్​ను మెగా ప‌వ‌ర్ స్టార్​గా పిలిచేవారు. అయితే 'ఆర్​ఆర్​ఆర్​'తో ఇంటర్నేషనల్​ లెవెల్​లో పాపులర్ అయిన ఈయన్ను ఇప్పుడు ఫ్యాన్స్ ముద్దుగా గ్లోబల్ స్టార్ అని అంటున్నారు.

ఇక టాలీవుడ్​లో సూపర్ స్టార్ ట్యాగ్​ కలిగిన రెండవ వ్యక్తి మ‌హేశ్​ బాబు. గతంలో ఆయన్ను అందరూ ముద్దుగా ప్రిన్స్ అని పిలిచేవారు. కానీ క్రమంగా తన తండ్రి కృష్ణకు ఉన్న సూపర్​ స్టార్ బిరుదు ఈయనకు వచ్చింది. ఇతర హీరోలకూ ఇలాంటి స్టార్ బిరుదులు ఉన్నాయి. పవన్ కల్యాణ్​ను పవర్ స్టార్ అని పిలుస్తారు. జూనియర్ ఎన్​టీఆర్​ను ఒకప్పుడు యంగ్​టైగర్​గా సంబోధించే ఫ్యాన్స్ ఇప్పుడు మ్యాన్​ ఆఫ్​ ద మాసెస్​గా పిలుస్తున్నారు.

యంగ్ హీరో రామ్​ను ఎన‌ర్జిటిక్ స్టార్ అని, నానిని నేచుర‌ల్ స్టార్ అని పిలుస్తారు. కానీ ఈ టైటిల్ సృష్టిక‌ర్త‌లు ఎవ‌రు అంటే ఆ ప్ర‌శ్న‌కు మాత్రం ఇంకా స‌మాధానం లేదు. టాలీవుడ్ యంగ్ హీరో విజయ్ దేవరకొండను రౌడీ బాయ్​ అంటారు. కానీ అది ఎవరు పెట్టారన్న విషయంపై క్లారిటీ లేదు. కానీ మొత్తానికి హీరోలు మాత్రం తమ పేర్ల కంటే వారి ట్యాగ్స్​తోనే ప్రేక్షకుల మదిలో ఉండిపోతున్నారన్న విషయం ఎన్నో సార్లు స్పష్టమైందన్నది సినీ విశ్లేషకుల మాట.