Saif Ali Khan Attack : బాలీవుడ్‌ నటుడు సైఫ్ అలీఖాన్‌ ఇంట్లోకి చొరబడి ఆయనపై కత్తితో దాడి చేసిన దుండగుడు తొలుత కోటి రూపాయలు ఇవ్వాలని డిమాండ్ చేసినట్లు పోలీసుల విచారణలో తేలింది. ఆయన 4 ఏళ్ల కుమారుడు జహంగీర్‌ ఉన్న గదిలోకి దొంగ రావడాన్ని అక్కడ నర్సుగా పనిచేస్తున్న ఎలియామా ఫిలిప్స్ గుర్తించారు. రాత్రి 2 గంటలకు శబ్దాలు రావడం వల్ల నర్సుకు మెలకువ వచ్చింది. అయితే బిడ్డను చూసేందుకు కరీనా కపూర్ వచ్చి ఉంటుందని ఆమె భావించింది.
అయితే అనుమానం వచ్చి దగ్గరకు వెళ్లగా, దొంగ ఆమెను పట్టుకుని నిశ్శబ్ధంగా ఉండాలని బెదిరించాడు. ఆ సమయంలో కోటి రూపాయలు ఇవ్వాలని డిమాండ్ చేశాడు. అతడిని పట్టుకునే క్రమంలో నర్సు మణికట్టుపై నిందితుడు కత్తితో పొడిచాడు. అలికిడి కావడం వల్ల సైఫ్ అక్కడకు వచ్చి దొంగను పట్టుకునేందుకు ప్రయత్నించగా, ఆయనపై కూడా దాడి జరిగిందని పోలీసులు వివరించారు.
ఇదిలా ఉండగా, దుండగుడిని పట్టుకునేందుకు ముంబయి పోలీసులు 20 బృందాలను ఏర్పాటు చేశారు. కర్ర, ఆక్సా బ్లేడుతో పారిపోతున్న నిందితుడి దృశ్యాలు సీసీటీవీలో రికార్డు అయ్యాయి. అందులో అతడి ముఖం స్పష్టంగా కనిపించింది.