Renu Desai Instagram Post : ఆంధ్ర ప్రదేశ్కు నాల్గవ ముఖ్యమంత్రిగా నేడు (జూన్ 12) ప్రమాణ స్వీకారం చేశారు నారా చంద్రబాబు నాయుడు. కృష్ణా జిల్లా కేసరపల్లి వేదికగా జరిగిన ఈ వేడుకలో ఆయనతో పాటు కేబినెట్ మంత్రులు కూడా తమ పదవీ బాధ్యతలను అందుకున్నారు. ప్రధాని నరేంద్ర మోదీతో పాటు పలువురు సినీ, రాజకీయ ప్రముఖుల సమక్షంలో ఈ ఈవెంట్ ఎంతో గ్రాండ్గా జరిగింది. ముఖ్యంగా సీఎం, డిప్యూటీ సీఎం ప్రమాణ స్వీకారం వేడుకకు హైలైట్గా నిలిచింది.
డిప్యూటీ సీఎంగా పవన్ కల్యాణ్ ప్రమాణ స్వీకారం కోసం పవర్ స్టార్ ఫ్యాన్స్ ఆత్రుతగా ఎదురు చూశారు. ఈ నేపథ్యంలో ఆ ఆనందంలో భాగమయ్యేందుకు మెగా ఫ్యామిలీ నుంచి చిరంజీవీ, రామ్చరణ్, పవన్ సతీమణి అన్నా ప్రమాణ స్వీకారానికి వచ్చారు. పవన్ పిల్లలు అకిరా నందన్, ఆద్య కూడా ఈ ప్రత్యేక వేడుక కోసం వచ్చారు.
ఇక అకిరా, ఆద్య ఇద్దరూ ఎంతో చక్కగా రెడీ అయి ఈ వేడుకకు వచ్చారు. అకిరా పట్టు పంచె కట్టుకుని ఆకట్టుకోగా, ఆద్య కూడా ట్రెడిషనల్ డ్రెస్లో ముద్దుగా కనిపించింది. అయితే ప్రమాణ స్వీకారానికి ముందు వాళ్లు తమ తల్లి రేణు దేశాయ్కి వీడియో కాల్ చేసారు. ఆమెకు తమ కొత్త డ్రెస్ చూపించి మురిసిపోయారు. ఇక రేణూ కూడా దీనికి సంబంధించిన వీడియోను నెట్టింట షేర్ చేశారు. సోషల్ మీడియా వేదికగా పవన్ కల్యాణ్కు విషెస్ తెలిపారు.