Meenakshi Chaudhary Tollywood Movies : సినిమాల్లో అందం, అభినయమే కాదు కొన్నిసార్లు లక్ కూడా కీలక పాత్ర పోషిస్తుంటుంది. తాజాగా నటి మీనాక్షి చౌదరి ఆ ఆఖరి పాయింట్లో కాస్త తడబడుతున్నారు. వరుస సినిమాలతో సందడి చేస్తున్నా, ఆమెకు సరైన హిట్ మాత్రం దక్కట్లేదు. కెరీర్ ప్రారంభంలోనే అడవి శేష్ మూవీ 'హిట్: ది సెకండ్ కేస్'తో పెద్ద విజయాన్ని సాధించారు ఈ అందాల ముద్దుగుమ్మ. అలా మొదటి సినిమాతోనే సినీ ప్రేక్షకులు, నిర్మాతల దృష్టిని ఆకర్షించారు. ఆ తర్వాత వరుసగా సినిమా ఛాన్స్‌లు వచ్చినా ఒకే ఒక్క విజయంతో సరిపెట్టుకున్నారు.
2024 ప్రారంభంలో త్రివిక్రమ్‌- మహేశ్‌ బాబు సినిమా 'గుంటూరు కారం'లో మీనాక్షి ఓ చిన్న పాత్రలో కనిపించారు. అయితే భారీ అంచానల మధ్య వచ్చిన ఆ సినిమా ఆశించిన స్థాయిలే విజయం అందుకోలేదు. చిన్న పాత్ర అయినా సరే ఒప్పుకొన్న మీనాక్షి చౌదరికి తగిన ఫలితం దక్కలేదు. కానీ ఈ మూవీ తర్వాత మీనాక్షి వరుస అవకాశాలు పొందారు. ఈ ఏడాదిలో ఇప్పటికే ఆమె నటించిన ఐదు సినిమాలు రిలీజ్‌ అయ్యాయి. ఇన్ని అవకాశాలు మరే హీరోయిన్‌కి రాలేదు. అయితే అన్ని సినిమాల్లోనూ ఒక్కటి మాత్రమే హిట్ అయ్యింది.
దుల్కర్ సినిమాతో విజయం
దళపతి విజయ్ సరసన 'గోట్'లో యాక్ట్‌ చేశారు మీనాక్షి. అయితే ఈ సినిమా తమిళ బాక్సాఫీస్ వద్ద మంచి కలెక్షన్స్ సాధించినప్పటికీ, స్టోరీ పరంగా తెలుగు ఆడియెన్స్ను ఆకట్టుకోలేకపోయింది. ఆ తర్వాత దుల్కర్ సల్మాన్తో 'లక్కీ భాస్కర్'లో నటించారు. ఈ సినిమా సక్సెస్ సాధించడమే కాకుండా మీనాక్షి నటనకు మంచి మార్కులు పడ్డాయి. ఓ మధ్య తరగతి కుటుంబానికి చెందిన భార్యగా మీనాక్షి తన అద్భుతంగా నటించి ప్రేక్షకులను ఆకట్టుకున్నారు.