రూ.200 కోట్ల 'మంజుమ్మల్ బాయ్స్'కు బిగ్ షాక్​ - పీవీఆర్​పై మైత్రీ మూవీస్ ఆగ్రహం! - Manjummel Boys

Manjummel Boys PVR Multiplex : రూ.200 కోట్లకు పైగా వసూళ్లు సాధించి బ్లాక్ బస్టర్ అందుకున్న మంజుమ్మల్ బాయ్స్​ తెలుగు వెర్షన్​ ప్రదర్శనలను పీవీఆర్ మల్టిఫ్లెక్స్ నిలిపివేసింది. పూర్తి వివరాలు స్టోరీలో.

Manjummel Boys PVR Multiplex :ఫిబ్రవరి 22న మలయాళంలో విడుదలైన మంజుమ్మల్ బాయ్స్ ప్రపంచవ్యాప్తంగా 200 కోట్లు పైగా కలెక్షన్లు సాధించిన సంగతి తెలిసిందే. దాదాపు రూ.20 కోట్ల బడ్జెట్​తో తెరకెక్కి రూ.230 కోట్లు సాధించిన తొలి మలయాళ చిత్రంగా రికార్డుకెక్కింది(Manjummel Boys Collections). అయితే ఈ సినిమాకు వచ్చిన క్రేజ్ చూసి ఈ సినిమా తెలుగు వెర్షన్​ను మైత్రి మూవీస్ ఏప్రిల్ 6న విడుదల చేసింది. తెలుగు వెర్షన్ కూడా విజయవంతంగా ప్రదర్శన అవుతోంది. అయితే ఈ సినిమా నిర్మాతలతో పీవీఆర్ మల్టీప్లెక్స్​కు మధ్య గొడవలు తలెత్తడంతో ఈ సినిమా తెలుగు వెర్షన్​ను పీవీఆర్ మల్టిప్లెక్స్ గురువారం అర్ధాంతరంగా నిలిపేసింది.

ఈ విషయంపై మైత్రి మూవీస్ డిస్ట్రిబ్యూటర్ శశిధర్ రెడ్డి నిర్మాతల మండలిని ఆశ్రయించారు. మలయాళ సినిమా నిర్మాతతో గొడవ కారణంగా సక్సెస్ ఫుల్​గా రన్ అవుతున్న తెలుగు వెర్షన్ ను ఆపేయడం సరైన నిర్ణయం కాదని ఆరోపించారు. న్యాయం కోసం నిర్మాతల మండలిని ఆశ్రయించారు. దీంతో ఈ విషయంపై ఒక తీర్పు చెప్పేందుకు నిర్మాతల మండలి అత్యవసరంగా సమావేశం కానుంది. పీవీఆర్ మల్టిప్లెక్స్​కు ఇలాంటి వివాదాలు కొత్త కాదు. గతంలో కూడా ఎన్నో సినిమాల విషయంలో నిర్మాతలతో గొడవలు జరిగాయి. అయితే ఒక భాషలో నిర్మాతతో గొడవ కారణంగా మరొక భాషలో రన్ అవుతున్న సినిమాను ఆపడం ఇదే మొదటిసారి.

శ్రీనాధ్ బాసి, బాలు వర్గీస్, గణపత్, లాల్ జూనియర్, దీపక్ కీలక పాత్రలలో నటించిన ఈ సినిమాకు చిదంబరం దర్శకత్వం వహించారు. ఈ సినిమాకు సుషీన్ శ్యామ్ సంగీతం అందించారు. షౌబిన్ సాహిర్, బాబు సాహిర్, షాన్ ఆంటోనీ కలిసి ఈ సినిమాను నిర్మించారు. మన భారతీయ భాషల్లో ఇలాంటి సర్వైవల్ థ్రిల్లర్స్ ఇప్పటికే ఎన్నో వచ్చినా స్క్రీన్ ప్లే, నటన, బ్యాక్ గ్రౌండ్ మ్యూజిక్ ఈ సినిమాకు ప్లస్ అయ్యాయి. మరో రెండు మూడు వారాల తర్వాత ఈ సినిమా ఓటిటి ప్రేక్షకులను కూడా పలకరించనుంది.