Mahavatar Narsimha Hombale Films :ప్రముఖ నిర్మాణ సంస్థ హోంబలే ఫిల్మ్స్‌ తాజాగా ఓ సరికొత్త ప్రాజెక్ట్ను అనౌన్స్ చేసింది. అశ్విన్‌ కుమార్‌ డైరెక్షన్లో 'మహావతార్‌: నరసింహ' అనే సినిమాను ప్రకటించింది. ఇందులో భాగంగా ఈ చిత్రానికి సంబంధించిన ఫస్ట్‌ లుక్‌ను విడుదల చేసింది. అయితే ఇందులో నటించేవారి గురించి అలాగే టెక్నికల్ టీమ్ గురించి త్వరలోనే వెల్లడించనున్నట్లు తెలుస్తోంది. తెలుగు, కన్నడ, తమిళ, మలయాళ, హిందీ భాషల్లో ఈ సినిమా విడుదల కానుంది. ఈ చిత్రానికి సామ్‌ సీఎస్‌ సంగీతం అందించనున్నారు. కుశాల్‌ దేశాయ్‌, శిల్పా ధావన్‌, చైతన్య దేశాయ్‌లు ఈ చిత్రాన్ని సంయుక్తంగా నిర్మిస్తున్నారు. అయితే 'మహావతార్‌' సిరీస్‌లో రానున్న తొలి సినిమా ఇదే కావడం విశేషం. ఇక ఈ సినిమాకు కొనసాగింపుగా ఇతర అవతారాలతో చిత్రాలు రాబోతున్నాయని నిర్మాణ సంస్థ చెప్పకనే చెప్పింది.
ఇక హోంబలే ఫిల్మ్స్‌ విషయానికొస్తే ఇప్పటికే ఈ సంస్థ ఎన్నో విజయవంతమైన చిత్రాలను సినీ పరిశ్రమకు అందించింది. త్వరలో 'కాంతార','సలార్‌' సీక్వెల్స్ కూడా ఈ నిర్మాణ సంస్థ నుంచి రానున్నాయి. రిషభ్‌శెట్టి కీలక పాత్రలో భారీ బడ్జెట్‌తో తెరకెక్కుతోన్న 'కాంతార: చాప్టర్‌1' ఇప్పటికే శరవేగంగా షూటింగ్ జరుపుకొంటోంది. తొలి భాగానికి ప్రీక్వెల్‌గా రానున్న ఈ చిత్రం భారీ హంగులతో రూపుదిద్దుకుంటోంది.
ఇదిలా ఉండగా, ప్రభాస్ లీడ్ రోల్లో తెరకెక్కనున్న 'సలార్‌: శౌర్యంగ పర్వం' షూటింగ్ కూడా రీసెంట్గానే స్టార్ట్ అయ్యింది. ఈ సినిమాతో పాటు ప్రభాస్‌తో మరో రెండు సినిమాలను చేసేందుకు ఓకే చెప్పారు. ఈ సందర్భంగా నిర్మాణ సంస్థ హర్షం వ్యక్తం చేసింది.