BigBoss 7 Amardeep First Movie : బిగ్బాస్ సీజన్ 7 కంటెస్టెంట్గా వచ్చి రన్నరప్గా నిలిచిన అమర్దీప్ హీరోగా మారనున్నారు. ఇప్పటివరకు కేవలం బుల్లితెరకే పరిమితమైన ఈయన త్వరలో వెండితెరపై కనిపించబోతున్నారు. ఈ విషయాన్ని సినిమాను నిర్మిస్తున్న బ్యానర్ M3 మీడియా స్వయంగా ప్రకటించింది. ఈ మూవీలో ఓ స్టార్ క్యారెక్టర్ ఆర్టిస్ట్ కుమార్తె హీరోయిన్ పాత్ర పోషించనున్నారట.
ఇప్పటికే డ్యాన్స్ మాస్టర్ ఎంట్రీ!
ఇదిలాఉంటే ఇప్పటివరకు జరిగిన బిగ్బాస్-తెలుగు సీజన్స్లో పాల్గొన్న వారంతా హౌస్ నుంచి బయటకు వచ్చాక ఎవరి కెరీర్లో వారు బిజీగా గడుపుతుంటారు. ఇది సాధారణంగా జరిగే ప్రక్రియే. అయితే ఇందులో కొందరంటే కొందరు మాత్రమే మంచి అవకాశాలను చేజిక్కించుకుంటారు. కొందరు సీరియల్స్లో అవకాశం సంపాదిస్తే, మరికొందరు సినిమాల్లో క్యారెక్టర్ ఆర్టిస్ట్లుగా లేదంటే సైడ్ ఆర్టిస్ట్లుగా వెళ్తుంటారు. ఇంకొందరు షార్ట్ ఫిలిమ్స్లతో సరిపెట్టుకుంటారు. అయితే వెండితెరపై హీరోగా ఛాన్స్ కొట్టేయడం అనేది చాలా అరుదుగా జరుగుతుంటుంది. అలా బిగ్బాస్ సీజన్-4లో సెకెండ్ రన్నరప్గా నిలిచిన సయ్యద్ సోహైల్ సినిమా ఛాన్స్ కొట్టేశారు. 'మిస్టర్ ప్రెగ్నెంట్' చిత్రంలో హీరోగా నటించి అలరించారు. ఇక ఇటీవల బిగ్బాస్-7 కంటెస్టెంట్, డ్యాన్స్ మాస్టర్ సందీప్ కూడా హీరోగా ఓ సినిమా చేయనున్నట్లు అనౌన్స్మెంట్ వచ్చింది. ఇక ఇప్పుడు మరో బిగ్బాస్ ఫేమ్(అమర్దీప్) సినిమాల్లోకి ఎంట్రీ ఇవ్వబోతున్నారు.
ఈయనుంటే హౌస్లో రచ్చే!
అమర్దీప్ తెలుగు ప్రేక్షకులకు సుపరిచితమైన పేరే. ఇప్పటికే పలు సీరియల్స్లో నటించి మంచి పేరు తెచ్చుకున్న ఈయన ఇటీవల జరిగిన బిగ్బాస్ తెలుగు సీజన్లో పాల్గొన్నారు. ఇక హౌస్లో ఉన్నంత సేపు ఈయన చేసిన రచ్చ అంతాఇంతా కాదు. అమర్దీప్ గేమ్స్టైల్ సహా మరికొన్ని క్వాలిటీస్ ఆధారంగా ఈసారి బిగ్బాస్ టైటిల్ విజేత అతడే అనుకున్నారు చాలామంది. అయితే కొన్ని విషయాల్లో వెనకపడ్డ అమర్దీప్కు గట్టీ పోటీ ఇచ్చారు రైతు బిడ్డ పల్లవి ప్రశాంత్. దీంతో బిగ్బాస్ సీజన్-7 కప్పు ప్రశాంత్నే వరించింది.