Highest Paying Jobs In India 2024 : ఉన్నత విద్య అభ్యసించి, మంచి ఉద్యోగం సంపాదించాలని ఆశించే అభ్యర్థులందరికీ గుడ్ న్యూస్. పెరుగుతున్న టెక్నాలజీకి అనుగుణంగా నేడు అనేక ఉద్యోగ అవకాశాలు పెరుగుతున్నాయి. ముఖ్యంగా ఏడాదికి రూ.40 లక్షల నుంచి రూ.70 లక్షల వరకు జీతభత్యాలు అందించే కెరీర్ ఆప్షన్స్ నేడు అందుబాటులో ఉన్నాయి. కనుక నిరుద్యోగులు ఆయా రంగాల్లో మంచి నైపుణ్యాలు సంపాదిస్తే, కచ్చితంగా లక్షల్లో వేతనం ఇచ్చే ఉద్యోగాలు పొందవచ్చని నిపుణులు చెబుతున్నారు. అందుకే ప్రస్తుతం మన దేశంలో మంచి డిమాండ్ ఉన్న, భారీ వేతనాలు ఇచ్చే టాప్-7 ఉద్యోగాల గురించి తెలుసుకుందాం.
సాఫ్ట్వేర్ ఆర్కిటెక్ట్
మనదేశంలో సాఫ్ట్వేర్ ఉద్యోగాలకు ఉన్నంత డిమాండ్ మరే రంగానికి లేదంటే, అది అతిశయోక్తి కాదు. అందులోనూ సాఫ్ట్వేర్ ఆర్కిటెక్ట్లకు మరీ డిమాండ్ ఎక్కువ. మంచి నైపుణ్యం ఉంటే, ఏడాదికి రూ.32 లక్షల వరకు వేతనంతో ఈ ఉద్యోగం పొందవచ్చు. వెబ్సైట్ డిజైనింగ్, టెస్టింగ్, సాఫ్ట్వేర్ సమస్యలను పరిష్కరించడం, సైబర్ భద్రత లాంటి అంశాల్లో పట్టు ఉన్నవారికి మంచి డిమాండ్ ఉంది. కంప్యూటర్ సైన్స్ డిగ్రీతోపాటు, సాఫ్ట్వేర్ ఇంజనీరింగ్ ప్రిన్సిపల్స్లో మంచి పట్టున్నవారికి, ప్రోగ్రామింగ్ లాంగ్వేజెస్ వచ్చిన వారికి ప్రాధాన్యం ఉంటుంది.
ఆర్టిఫీషియల్ ఇంటిలిజెన్స్, మెషన్ లెర్నింగ్ ఇంజనీర్స్
ప్రస్తుతం ఆర్టిఫీషియల్ ఇంటిలిజెన్స్ (AI) హవా నడుస్తోంది. AI టెక్నాలజీతో ప్రపంచ వ్యాప్తంగా ఎన్నో ఉద్యోగాలు ఊడుతున్నాయి. అయితే AI, మెషిన్ లెర్నింగ్ టెక్నాలజీస్ నిపుణులకు మార్కెట్లో మంచి డిమాండ్ ఏర్పడుతోంది. ఈ ఉద్యోగాలకు ఏడాదికి రూ.45 లక్షల వరకు వేతనం ఆఫర్ చేస్తున్నారు. AI టెక్నాలజీలో మాస్టర్స్ డిగ్రీ చేసి, మెషిన్ లెర్నింగ్ లేదా సంబంధిత రంగాల్లో బాగా అనుభవం ఉన్నవారికి మంచి డిమాండ్ ఉంది.
డేటా సైంటిస్ట్
ప్రస్తుతం మన దేశంలో డేటా సైంటిస్ట్ ఉద్యోగాలకు విపరీతమైన డిమాండ్ ఉంది. డేటా అనాలిసిస్, పాట్రన్స్ ఐడెంటిఫికేషన్, ఆల్గారిథమ్స్ క్రియేషన్, ఇన్నోవేషన్స్ ఆఫ్ బిగ్డేటా మొదలైన అంశాల్లో పట్టున్న వారికి ప్రాధాన్యం ఉంటుంది. ఈ ఉద్యోగాలకు ఏడాదికి రూ.14 లక్షల నుంచి రూ.25 లక్షలు చెల్లిస్తున్నారు. పనితనంతోపాటు, అనుభవానికి తగ్గట్టు వేతనం ఇస్తున్నారు. ఈ ఉద్యోగాలకు డేటా సైన్స్ డిగ్రీతోపాటు, స్పెషలైజ్డ్ కోర్సులు చేసినవారికి ప్రాధాన్యత ఉంటుంది.
డిజిటల్ మార్కెటింగ్
స్మార్ట్ఫోన్ల యుగంలో అంతా డిజిటల్ మయం అయిపోయింది. ప్రతి ఒక్కరూ ఏ మాత్రం సమయం దొరికినా డిజిటల్ ప్రపంచంలోకి వెళ్లి గంటలకొద్దీ సమయం గడుపుతున్నారు. యూట్యూబ్, ఫేస్బుక్, ఇన్స్టాగ్రామ్, వాట్సాప్ లాంటి సోషల్ మీడియా సైట్లతోపాటు, ఓటీటీ లాంటి డిజిటల్ ఫ్లాట్ఫామ్స్లో సినిమాలు, వెబ్ సిరీస్లు చూస్తున్నారు. దీంతో చాలా కంపెనీలు తమ ప్రొడక్టుల గురించి ప్రచారం చేయడానికి డిజిటల్ మార్కెటింగ్ సంస్థలను ఆశ్రయిస్తున్నాయి. ఎవరైనా సరే ఎలాంటి సమాచారం కోసమైనా ఇప్పుడు డిజిటల్ మార్గాన్నే ఆశ్రయిస్తుండటం వల్ల రానురాను డిజిటల్ మార్కెటింగ్కు బాగా డిమాండ్ పెరుగుతోంది. మార్కెటింగ్ స్ట్రాటజీ, క్రియేటివిటీ, డేటా అనాలసిస్, మార్కెటింగ్ టెక్నిక్స్ తెలిసిన వారికి డిజిటల్ మార్కెటింగ్లో అవకాశాలు కోకొల్లలు. అనుభవాన్ని అనుసరించి ఏడాదికి రూ.4 లక్షల నుంచి రూ.18 లక్షల వరకు వేతనాలు చెల్లిస్తున్నారు. డిజిటల్ మార్కెటింగ్ కోర్సులు, మాస్టర్స్ డిగ్రీలతోపాటు, డిజిటల్ మార్కెటింగ్ స్పెషలైజ్డ్ కోర్సులు చేసిన వారికి అధిక ప్రాధాన్యత ఉంటుంది.