LTA Claim Last Date : 2023-24 ఆర్థిక సంవత్సరం ముగియడానికి మరో 2 రోజులే ఉంది. అందుకే లీవ్ ట్రావెల్ అలవెన్స్ (ఎల్టీఏ)ని క్లెయిమ్ చేసుకోని ఉద్యోగులు అందరూ మార్చి 31లోపు, పన్ను మినహాయింపు కోసం, తమ ప్రయాణ పత్రాలను హెచ్ఆర్ డిపార్ట్మెంట్కు సమర్పించాల్సి ఉంటుంది. ఇలా చేస్తేనే ఆదాయ పన్ను చట్టం, 1961, సెక్షన్ 10(5) ప్రకారం పన్ను మినహాయింపు లభిస్తుంది.
ఎల్టీఏ అంటే ఏమిటి?
ఒక యజమాని తమ ఉద్యోగులకు అందించే ప్రయాణ భత్యమే 'లీవ్ ట్రావెల్ అలవెన్స్' (ఎల్టీఏ). దీనిని ఒంటరిగా లేదా కుటుంబ సమేతంగా విహారయాత్రలకు వెళ్లేటప్పుడు ఉపయోగించుకోవచ్చు. అయితే ఈ ఖర్చులను రీయింబర్స్మెంట్ పొందడానికి, సదరు విహారయాత్రకు లేదా ప్రయాణానికి అయిన బిల్లులను యజమానికి సమర్పించాల్సి ఉంటుంది.
యజమాన్యాలు లేదా సంస్థలు - 'ఎంప్లాయీ కాస్ట్ టు కంపెనీ' (సీటీఏ)ను రూపొందిస్తుంటాయి. సాధారణంగా అప్పుడే ఉద్యోగులు ఎల్టీఏ క్లెయిమ్ చేసుకోవడానికి అవకాశం కల్పిస్తాయి.
పరిమితి వరకే!
ఒక సంస్థలో మీరు చేస్తున్న ఉద్యోగం స్థాయిని అనుసరించి, మీకు ఎంత ఎల్టీఏ వస్తుందో నిర్ణయమై ఉంటుంది. కనుక ఈ పరిమితి మేరకే మీకు రీయింబర్స్మెంట్ వస్తుంది. ఆ పరిమితికి మంచి చేసిన ఖర్చులపై ఆదాయపు పన్ను శ్లాబ్ రేట్ల ప్రకారం ట్యాక్స్ కట్టాల్సి ఉంటుంది.
రెండు సార్లు మాత్రమే!
ఉద్యోగుల ఎల్టీఏపై 4 సంవత్సరాల బ్లాక్ ఉంటుంది. అందులో 2సార్లు మాత్రమే పన్ను మినహాయింపు పొందవచ్చు. ప్రస్తుత బ్లాక్ 2022-25 వరకు ఉంది.
షరతులు వర్తిస్తాయి!
- అంతర్జాతీయ పర్యటనలకు లీవ్ ట్రావెల్ అలవెన్స్ ఇవ్వరు. కేవలం భారతదేశంలో చేసిన ప్రయాణాలకు మాత్రమే ఇస్తారు. కనుక పన్ను మినహాయింపును క్లెయిమ్ చేసుకోవడానికి వీలవుతుంది.
- ఉద్యోగి ఎక్కడికీ ప్రయాణించకుండానే, నగదు రూపంలో ఎల్టీఏ పొందినట్లు అయితే పన్ను మినహాయింపు లభించదు. అంటే మీరు పొందిన మొత్తం ఎల్టీఏ పన్ను పరిధిలోకి వస్తుంది.
- ఉద్యోగి ఒంటరిగా లేదా కుటుంబంతో కలిగి ప్రయాణాలు చేయవచ్చు. అప్పుడు ఆదాయ పన్ను చట్టంలోని సెక్షన్ 10(5) ప్రకారం, పన్ను మినహాయింపులు పొందవచ్చు. ఇక్కడ కుటుంబం అంటే, ఉద్యోగి జీవిత భాగస్వామి, ఇద్దరు పిల్లలు. అలాగే సదరు ఉద్యోగిపై పూర్తిగా ఆధారపడిన తోబుట్టువులు, తల్లిదండ్రులు.
- ఉద్యోగి ఎక్కడకు ప్రయాణించినా, షార్ట్కట్ రూట్లో, ఎకానమీ క్లాస్లో ప్రయాణించాలి. ముఖ్యంగా విమాన ప్రయాణాలు చేసేటప్పుడు ఈ నియమం వర్తిస్తుంది. అలా కాకుండా చిన్న మార్గాల్లో ప్రయాణించేటప్పుడు ఏసీ, ఫస్ట్ క్లాస్లో కూడా ప్రయాణించవచ్చు.
- ప్రయాణానికి అయిన ఖర్చులను మాత్రమే ఎల్టీఏ కింద పరిగణిస్తారు. అదనపు ఖర్చులపై పన్ను మినహాయింపులు లభించవు.
- ఉద్యోగి ఉన్న చోటు నుంచి అతను వెళ్లాల్సిన గమ్యస్థానానికి రైలు మార్గం ఉంటే, అందులో ప్రయాణించి ఎల్టీఏ పొందవచ్చు. లేదా ఇతర ప్రయాణ మార్గాలను కూడా ఎంచుకునే స్వేచ్ఛ ఉంటుంది.
- ఒకవేళ ఉద్యోగి ఉన్న చోటు నుంచి అతను వెళ్లాల్సిన గమ్యస్థానానికి రైలు మార్గం లేకపోతే, అప్పుడు ఇతర ప్రయాణ మార్గాలను ఎంచుకొని ఎల్టీఏ మినహాయింపును క్లెయిమ్ చేసుకోవచ్చు.
- ఒక వేళ రైలు మార్గం, ప్రభుత్వ రవాణా సౌకర్యాలు కూడా లేకపోతే, ఇతర గుర్తింపు పొందిన రవాణా వ్యవస్థను ఉపయోగించుకుని, ప్రయాణం చేయవచ్చు. అప్పుడు కూడా ఎల్టీఏ మినహాయింపు పొందవచ్చు.
ఎల్టీఏ కాలిక్యులేషన్
లీవ్ ట్రావెల్ అలవెన్స్ గణన అనేది 1986లో ప్రారంభమైంది. ఈ సిస్టమ్ ప్రకారం, 4 సంవత్సరాలు ఒక బ్లాక్గా ఉంటుంది. 4 సంవత్సరాల బ్లాక్లో ఉద్యోగి రెండు ప్రయాణాలకు మాత్రమే ఎల్టీఏ ప్రయోజనాలు పొందడానికి వీలవుతుంది. ఇక్కడ గమనించాల్సిన విషయం ఏమిటంటే, బ్లాక్ ఇయర్ అనేది ఆర్థిక సంవత్సరం కంటే భిన్నంగా ఉంటుంది.
ఎల్టీఏ క్లెయిమ్ చేయడం ఎలా?
ఎల్టీఏ క్లెయిమ్ చేయడానికి అర్హులైన ఉద్యోగులు, తమ ప్రయాణానికి అయిన బిల్లులను, (విమానం, రైలు, బస్సు, ఇతర రవాణా సాధానాల) టికెట్లను సిద్ధంగా ఉంచుకోవాలి. తరువాత దరఖాస్తు ఫారమ్ను నింపి, దానితో అవసరమైన అన్ని పత్రాలు, బిల్లులు, టికెట్లు జత చేసి, హెచ్ఆర్ డిపార్ట్మెంట్ వాళ్లకు పంపాలి. వాళ్లు వీటిని తీసుకుని ఎల్టీఏ క్లెయిమ్ కోసం అప్లై చేస్తారు. వాస్తవానికి చాలా కంపెనీలు ముందుగానే ఎల్టీఏ క్లెయిమ్ చేయడానికి తేదీలను ప్రకటిస్తుంటాయి.
ఉదాహరణకు, ఒక ఉద్యోగికి రూ.30,000 వరకు ఎల్టీఏ క్లెయిమ్ చేసుకోవడానికి అవకాశం ఉంది అనుకుందాం. కానీ అతను/ ఆమె రూ.20,000 వరకు మాత్రమే ఎల్టీఏ క్లెయిమ్ చేసుకున్నాడు. అప్పుడు మిగిలిన రూ.10,000లను సదరు ఉద్యోగి ఆదాయానికి జోడిస్తారు. అప్పుడు దానిపై కూడా సదరు ఉద్యోగి ప్రభుత్వానికి పన్ను చెల్లించాల్సి ఉంటుంది
ఫారిన్ టూర్కు ప్లాన్ వేస్తున్నారా? అయితే ఈ విషయాలు తప్పక తెలుసుకోండి! - Successful Foreign Trip
ఫైనాన్సియల్ డెడ్లైన్స్ - మార్చి 31లోగా ఇవి పూర్తి చేయాల్సిందే! - Financial Deadlines In March 2024
