Indian Wedding Season Business 2024 : భారతీయులకు వివాహం అత్యంత పవిత్రమైనది. అందుకే సంప్రదాయబద్ధంగా బంధు, మిత్రులను పిలుచుకుని, సింపుల్గా వివాహం చేసుకునేవారు. అయితే కాలానుగుణంగా వచ్చిన మార్పుల వల్ల నేడు వివాహ వేడుకలు భారీ ఆడంబరాలతో చేసుకుంటున్నారు. ఫలితంగా పెళ్లిళ్లు అనేవి చాలా ఖర్చుతో కూడుకున్న వ్యవహారంగా మారిపోయాయి.
కాన్ఫిడరేషన్ ఆఫ్ ఆల్ ఇండియా ట్రేడర్స్ (CAIT) దేశవ్యాప్తంగా, వివిధ రాష్ట్రాల్లోని 30 నగరాల్లో ఒక సర్వే నిర్వహించింది. ఈ సర్వే ప్రకారం, మన దేశంలో జనవరి 15 - జులై 15 మధ్య సుమారుగా 42 లక్షల పెళ్లిళ్లు జరగనున్నాయి. ఇందులో వివాహ సంబంధిత కొనుగోళ్లు, సేవల ద్వారా దాదాపుగా రూ.5.5 లక్షల కోట్ల బిజినెస్ జరిగే అవకాశం ఉందని తేలింది. కనుక 'ఈ పెళ్లిళ్ల సీజన్ను మన భారత ఆర్థిక వ్యవస్థలో ఒక ముఖ్యమైన భాగంగా పరిగణించవచ్చు. ఇది మన దేశ ఆర్థిక వృద్ధిలో కీలకపాత్ర పోషిస్తోంది' అని సీఏఐటీ పేర్కొంది.
మోదీ - డెస్టినేషన్ వెడ్డింగ్
భారతీయ యువతీయువకులు మన దేశంలోనే డెస్టినేషన్ వెడ్డింగ్ నిర్వహించుకోవాలని ప్రధాని నరేంద్ర మోదీ విజ్ఞప్తి చేశారు. దీనితో అన్ని రకాల పెళ్లిళ్లకు మన దేశంలో మరింత ఆదరణ పెరిగిందని సీఏఐటీ పేర్కొంది.
కేవలం దిల్లీలోనే 4 లక్షల పెళ్లిళ్లు
ఈ పెళ్లిళ్ల సీజన్లో ఒక్క దిల్లీలోనే 4 లక్షలకు పైగా వివాహాలు జరిగే అవకాశం ఉందని సీఏఐటీ జాతీయ అధ్యక్షుడు బీసీ భర్తియా, సెక్రటరీ జనరల్ ప్రవీణ్ ఖండేల్వాల్ తెలిపారు. 'గత ఏడాది ఇదే పెళ్లిళ్ల సీజన్లో దిల్లీలో 35 లక్షల వివాహాలు జరిగాయి. వీటి ద్వారా ఏకంగా రూ.4.25 లక్షల కోట్ల బిజినెస్ జరిగిందని' వారు స్పష్టం చేశారు.
పెళ్లిళ్లు - ఖర్చులు
ఒక అంచనా ప్రకారం, భారతదేశంలో ఒక్కో పెళ్లికి ఎంత ఖర్చు అవుతుందంటే?
- దాదాపు 5 లక్షల పెళ్లిళ్లకు - ఒక్కో దానికి రూ.3 లక్షలు;
- దాదాపు 10 లక్షల పెళ్లిళ్లకు ఒక్కోదానికి రూ.6 లక్షలు;
- ఇంకో 10 లక్షల పెళ్లిళ్లకు ఒక్కోదానికి రూ.10 లక్షలు;
- మరో 10 లక్షల పెళ్లిళ్లకు ఒక్కోదానికి రూ.15 లక్షలు;
- ఓ 6 లక్షల పెళ్లిళ్లకు ఒక్కోదానికి రూ.25 లక్షలు;
- మరో 60 వేల పెళ్లిళ్లకు ఒక్కోదానికి రూ.50 లక్షలు;
- ఇంకో 40 వేల పెళ్లిళ్లకు ఒక్కోదానికి రూ.1 కోటికి పైగా ఖర్చు అవుతుందని అంచనా.
మొత్తంగా చూసుకుంటే ఈ జనవరి 15 నుంచి జులై 15 మధ్య ఉన్న పెళ్లిళ్ల సీజన్లో, భారత్లో ఏకంగా రూ.5.5 లక్షల కోట్ల మేరకు బిజినెస్ జరగవచ్చని ఒక అంచనా వేసింది సీఏఐటీ.
డిమాండ్-సప్లై
'దేశవ్యాప్తంగా ఉన్న వ్యాపారులు ఈ పెళ్లిళ్ల సీజన్ను క్యాష్ చేసుకునేందుకు భారీ ఎత్తున వివాహ సంబంధిత వస్తువులను నిల్వ చేసుకుంటున్నారు. కస్టమర్ల డిమాండ్కు ఏమాత్రం సప్లై తగ్గకుండా చూసుకుంటున్నారు. వాస్తవానికి ప్రతి వివాహం కోసం కేటాయించిన బడ్జెట్లో వధూవరులకు కలిపి 20 శాతం ఖర్చు అవుతుంది. మిగతా 80 శాతం డబ్బును పెళ్లి ఏర్పాట్లు చేసే థర్డ్-పార్టీ వారికి చెల్లించడం జరుగుతుంది' అని సీఏఐటీ పేర్కొంది.
పెళ్లి ఖర్చులు
మన భారతదేశంలో చాలా మంది ఇళ్లు కట్టిన తరువాతనే వివాహం చేసుకుంటూ ఉంటారు. కనుక ఇంటి నిర్మాణానికి, మరమ్మతులకు, పెయింటింగ్కు బాగా ఖర్చు చేస్తారు. కనుక ఆయా రంగాల్లో మంచి బిజినెస్ జరుగుతుంది.
పెళ్లిళ్ల విషయానికి వస్తే, భారతీయులు వివాహం కోసం బంగారం, నగలు, వజ్రాల హారాలు, చీరలు, దుస్తులు, లెహంగా-చోళీ, ఫర్నీచర్, పెళ్లికార్డులు, డ్రైఫ్రూట్స్, స్వీట్స్, పళ్లు, పూజా వస్తువులు, కిరాణా సామగ్రి, అలంకరణ వస్తువులు, గృహాలంకరణ సామగ్రి, విద్యుత్ పరికరాలు, ఎలక్ట్రానిక్స్, వివిధ రకాల బహుమతులు, ఆహార పదార్థాలు, ఆహార ధాన్యాలు ఇలా చెప్పుకుంటూపోతే, లెక్కలేని వస్తువులు కొంటూ ఉంటారు. కనుక భారీ ఎత్తున వ్యాపారం జరుగుతుంది.
వివాహ వేదికలు
మన దేశంలో వివాహ వేడుకల కోసం పెద్దపెద్ద పెళ్లి మండపాలు, హోటళ్లు, బాంక్వెట్ (విందు) హాళ్లు , ఓపెన్ లాన్లు, కమ్యూనిటీ సెంటర్లు, పబ్లిక్ పార్కులు, ఫామ్హౌస్లు ఇలా అనేక రకాల వివాహ వేదికలు బుక్ చేస్తారు. వీటితోపాటు టెంట్ డెకరేటర్లు, ఫ్లవర్ డెకరేషన్లు, మందుగుండు సామగ్రి (క్రాకర్స్) తీసుకుంటారు. కనుక ఇక్కడా భారీ ఎత్తున బిజినెస్ జరుగుతుంది.
వెడ్డింగ్ సర్వీసెస్
పెళ్లి కోసం ఈవెంట్ మేనేజ్మెంట్, ప్యాకేజింగ్, క్యాటరింగ్, ట్రావెల్ సర్వీసెస్, క్యాబ్ సర్వీసెస్ బుక్ చేసుకుంటాం. ప్రొఫెషనల్ వెల్కమ్ గ్రూప్లు, ఫొటోగ్రాఫర్లు, వీడియోగ్రాఫర్లు, బ్యాండ్లు, మ్యూజీషియన్స్ లాంటి వారిని కూడా బుక్ చేసుకుంటాం. అలాగే డీజే, పెళ్లి ఊరేగింపు కోసం గుర్రాలు, క్యారేజీలు, లైటింగ్ ఇలా చాలా సర్వీసులను హైర్ చేసుకుంటాం. కనుక ఈ సర్వీస్ సెక్టార్లకు భారీగా డిమాండ్ పెరుగుతుంది. ఫలితంగా సేవల రంగంలో భారీ ఎత్తున ఉద్యోగ అవకాశాలు పెరుగుతాయి. ఇదంతా దేశ ఆర్థికాభివృద్ధికి దోహదం చేస్తుంది.
పెళ్లైన జంటలకు అలర్ట్! మీ వద్ద ఈ డాక్యుమెంట్స్ ఉన్నాయా? లేదంటే త్వరపడండి!
గోల్డ్ బాండ్ సబ్స్క్రిప్షన్ షురూ - వారికి స్పెషల్ డిస్కౌంట్ - అప్లై చేయండిలా!
