ఫ్రీగా క్రెడిట్ స్కోర్ తెలుసుకోవాలా? ఈ సింపుల్ స్టెప్స్​ ఫాలో అవ్వండి!

How To Check Credit Score Online : మీ క్రెడిట్​ స్కోర్​ను ఫ్రీగా తెలుసుకోవాలని అనుకుంటున్నారా?​ కానీ ఎలా చెక్​ చేసుకోవాలో తెలియడం లేదా? అయితే ఈ ఆర్టికల్ మీ కోసమే. క్రెడిట్​​ స్కోర్​ను ఆన్​లైన్​లో చాలా సింపుల్​గా ఏవిధంగా చెక్​ చేసుకోవాలో ఇప్పుడు తెలుసుకుందాం.

How To Check Credit Score Online : బ్యాంకులు క్రెడిట్ స్కోర్ ఆధారంగా రుణాలు మంజూరు చేస్తుంటాయి. అందుకే క్రెడిట్ స్కోర్​ను బాగా మెయింటైన్ చేస్తుండాలి. అయితే చాలా మంది క్రెడిట్​​ స్కోర్​ను ఏవిధంగా చెక్​ చేసుకోవాలో తెలియక ఇబ్బంది పడుతూ ఉంటారు. అందుకే ఈ ఆర్టికల్​లో ఆన్​లైన్​లో క్రెడిట్​స్కోర్​ను ఏ విధంగా చెక్​ చేసుకోవచ్చో తెలుసుకుందాం.

క్రెడిట్‌ స్కోరును చెక్‌ చేయడానికి ముందు దాని గురించి అవగాహన కలిగి ఉండటం తప్పనిసరి. మనదేశంలో ఉన్న నాలుగు ప్రధాన క్రెడిట్‌ బ్యూరోలలో 'క్రెడిట్‌ ఇన్ఫర్మేషన్‌ బ్యూరో ఇండియా లిమిటెడ్‌' (సిబిల్‌) ఒకటి. ఇది రిజర్వ్​ బ్యాంక్ ఆఫ్ ఇండియా నుంచి అధికారం పొందిన క్రెడిట్‌ రేటింగ్‌ ఏజెన్సీ. క్రెడిట్‌ స్కోరు ఎంత ఉంది అనే విషయాన్ని సిబిల్‌ ద్వారా తెలుసుకోవచ్చు. సిబిల్‌ స్కోరు అనేది మీకు రుణం మంజూరు చేయవచ్చో లేదో నిర్ణయించే మూడంకెల సంఖ్య. ఈ స్కోరు 300 - 900 వరకు ఉంటుంది. ఇది ఒక వ్యక్తి, కంపెనీ లేదా పబ్లిక్‌/ ప్రైవేట్‌ సంస్థల క్రెడిట్‌ హిస్టరీకి సంబంధించిన సమాచారాన్ని విశ్లేషిస్తుంది. క్రెడిట్​ కార్డులు జారీ, లోన్​ల మంజూరు విషయంలో సిబిల్​ స్కోర్​ చాలా కీలకం. క్రెడిట్​ స్కోరు 750 కంటే ఎక్కువగా ఉంటే పర్సనల్​ లోన్స్, హోమ్​ లోన్​, క్రెడిట్​ కార్డుల ఆమోదానికి అర్హత ఎక్కువగా ఉంటుంది. ఈ సిబిల్​ స్కోర్​ను చూసే బ్యాంకులు, ఎన్​బీఎఫ్​సీలు(నాన్​-బ్యాంకింగ్ ఫైనాన్స్​ కార్పొరేషన్లు), హౌసింగ్ ఫైనాన్స్ కంపెనీలు రుణాలు మంజూరు చేస్తుంటాయి.

మనదేశంలో ఉన్న ప్రధాన క్రెడిట్​ ఎజెన్సీలు
ఆర్​బీఐ ఈ క్రెడిట్ ఏజెన్సీలన్నింటికి లైసెన్సులను మంజూరు చేసింది. క్రెడిట్​ స్కోర్​ను తెలుసుకునేందుకు మన దేశంలో ఉన్న ప్రధాన క్రెడిట్​ ఎజెన్సీల వివరాలను తెలుసుకుందాం.

1. CIBIL :భారత్‌లో అత్యంత ప్రసిద్ధ క్రెడిట్‌ ఏజెన్సీగా సిబిల్​కు పేరుంది. సిబిల్​ను 2000లో స్థాపించారు 60 కోట్లకు పైగా భారతీయుల, రూ.3.2 కోట్ల కార్పొరేట్‌ సంస్థల క్రెడిట్‌ రిపోర్ట్‌లను ఇది నిర్వహిస్తోంది.
2. Experian : ఇది కూడా సెక్యూరిటీస్‌ అండ్‌ ఎక్స్చేంజ్‌ బోర్డ్‌ ఆఫ్‌ ఇండియా(సెబీ) గుర్తింపు పొందింది. 2006లో ఈ ఎక్స్​పీరియన్​ను స్థాపించారు. 2010 నుంచి భారత్‌లో పనిచేయడం ప్రారంభించింది.
3. CRIF High Mark :ఈ సంస్థను 2007లో స్థాపించగా 2010లో నిర్వహణ లైసెన్స్​ దక్కించుకుంది. ఇది అందించిన స్కోర్‌ల పరిధి 300 -850 వరకు ఉంటుంది.
4. Equifax :ప్రపంచంలోని మూడు అతిపెద్ద క్రెడిట్‌ బ్యూరోల్లో ఈక్విఫాక్స్​ ఒకటి. 1899లో ఇది ఒక రిటైల్‌ క్రెడిట్‌ బిజినెస్‌గా ప్రారంభమైంది. ఈ సంస్థ 2010లో ఆపరేటింగ్‌ లైసెన్స్‌ను పొందింది. ఇది క్రెడిట్ స్కోర్​ను 1 నుంచి 999 పాయింట్లతో సూచిస్తుంది.

సిబిల్ రిపోర్ట్​ అంటే ఏమిటి?
భారత్‌లో క్రెడిట్‌ యోగ్యతకు సిబిల్‌ స్కోర్​ బెంచ్‌మార్క్‌ మారింది. సిబిల్‌ రిపోర్ట్​ను క్రెడిట్‌ ఇన్ఫర్మేషన్‌ రిపోర్ట్‌ (సీఐఆర్‌) అని కూడా పిలుస్తారు. ఇది మీ అన్ని లోన్లు, చెల్లింపు చరిత్రలను నిర్వహించే పత్రం. ఈ నివేదికలో చెల్లింపు చరిత్ర, లోన్ల సంఖ్య, రుణాలకు సంబంధించిన బకాయిల వివరాలు అన్నీ ఉంటాయి. మీరు లోన్​ తీసుకునేందుకు క్రెడిట్​ స్కోర్​ అనేది క్రెడిట్​ రిపోర్ట్​లా పనిచేస్తుంది. సిబిల్​ స్కోరు ఎంత ఎక్కువగా ఉంటే అంతమంచిది. ఈ క్రెడిట్​ స్కోరును ఉచితంగా తెలుసుకోవచ్చు. పూర్తి డేటాను డబ్బులు చెల్లించి కూడా పొందవచ్చును. అది ఎలాగో ఇప్పుడు తెలుసుకుందాం.

క్రెడిట్​ స్కోర్​ను ఫ్రీగా చెక్​ చేసుకోవడం ఎలా?
రిజర్వ్​ బ్యాంక్ ఆఫ్ ఇండియా నుంచి లైసెన్స్‌ పొందిన నాలుగు క్రెడిట్‌ ఇన్ఫర్మేషన్‌ కంపెనీలు 2017 నుంచి సంవత్సరాని ఒకసారి ఉచితంగా క్రెడిట్​ రిపోర్ట్​ను చెక్​ చేసుకోవడానికి అనుమతినిస్తున్నాయి. ఉచితంగా సిబిల్​ స్కోరును ఎలా చెక్​ చేసుకోవాలో ఇప్పుడు తెలుసుకుందాం.

స్టెప్‌ 1:ముందుగా సిబిల్‌ వెబ్‌సైట్‌ను ఓపెన్ చేయండి.

స్టెప్‌ 2:మీ పేరు, ఫోన్‌ నంబరు, ఇ-మెయిల్‌ అడ్రస్​ వివరాలను నమోదు చేయండి.

స్టెప్‌ 3 :సిబిల్​ వెబ్​సైట్​లో మీ పాన్‌ నంబరు సహా అక్కడ అడిగిన ఇతర వివరాలను ఇవ్వండి.

స్టెప్‌ 4 : మీ లోన్స్​, క్రెడిట్‌ కార్డులకు సంబంధించిన అన్ని ప్రశ్నలకు సమాధానం ఇవ్వండి.

స్టెప్‌ 5 :ఈ దశలో స్క్రీన్‌పై వివిధ చెల్లింపు సభ్యత్వాలు డిస్​ప్లే అవుతాయి. మీకు ఒకసారి ఉచిత క్రెడిట్‌ స్కోరు, రిపోర్ట్‌ మాత్రమే అవసరం కనుక No Thanksపై క్లిక్‌ చేయండి. దీనితో మీకు ఫ్రీ అకౌంట్ క్రియేట్ అవుతుంది. లాగిన్ ఐడీ, పాస్​వర్డ్ జనరేట్ అవుతాయి.

స్టెప్‌ 6 : ఈ లాగిన్‌ ఐడీ, పాస్‌వర్డ్‌లను ఉపయోగించి, మీ ఖాతాలోకి లాగిన్‌ అవ్వాలి. మీ రిజిస్టర్డ్​ ఇ-మెయిల్‌కు వచ్చిన వన్‌-టైమ్‌ పాస్‌వర్డ్‌ను ఎంటర్​ చేసి, అథంటికేషన్ పూర్తి చేయాలి. తర్వాత మీ పాస్‌వర్డ్‌ను మార్చి మళ్లీ లాగిన్‌ చేయమని అడుగుతుంది.

స్టెప్‌ 7 :ఈ విధంగా మీరు లాగిన్‌ చేసిన తర్వాత, మీరు ఇంతకు ముందు నమోదు చేసిన వ్యక్తిగత వివరాలన్నీ డిఫాల్ట్‌గా స్క్రీన్‌పై కనిపిస్తాయి. మీ ఫోన్‌ నంబర్‌ను ఎంటర్​ చేసి సబ్‌మిట్‌పై క్లిక్‌ చేయండి

స్టెప్‌ 8 : డ్యాష్‌బోర్డ్‌పై మీ సిబిల్‌ స్కోరు డిస్​ప్లే అవుతుంది.

ఆన్​లైన్​లో పేమెంట్​ చెల్లించడం ద్వాారా
అధికారిక సిబిల్​(CIBIL) వెబ్‌సైట్‌కు లాగిన్‌ చేసి, Know your Score ఆప్షన్​పై క్లిక్‌ చేయండి. పేరు, పుట్టిన తేదీ, చిరునామా, గుర్తింపు వివరాలు, గత క్రెడిట్​ హిస్టరీ, సంబంధిత ఇతర వివరాలను ఆన్‌లైన్‌ ఫారంలో పూర్తిచేయండి. ఆ తర్వాత పేమెంట్స్‌ పేజీలోకి వెళతారు. అక్కడ పేమెంట్‌ చేసేందుకు ప్రీపెయిడ్‌ కార్డులు, క్రెడిట్‌ కార్డులు, నెట్‌ బ్యాంకింగ్‌ లాంటి ఆప్షన్స్‌ను ఎంచుకోవచ్చు. ఇక్కడ క్రెడిట్‌ నివేదికను పొందడానికి CIBILకు రూ.550/- చెల్లించాల్సి ఉంటుంది. ఫీజు చెల్లించిన తర్వాత ప్రమాణీకరణ (అథెంటికేషన్​) పేజీకు వెళతారు. ఇక్కడ మీ క్రెడిట్‌ చరిత్రకు సంబంధించిన 5 ప్రశ్నలకు సమాధానం ఇవ్వాల్సి ఉంటుంది. వీటిలో CIBILతో మీ గుర్తింపును అథెంటికేట్‌ చేయడానికి కనీసం 3 ప్రశ్నలకు సరిగా సమాధానం ఇవ్వాలి. అనంతరం మీ క్రెడిట్‌ రిపోర్ట్ 24 గంటల్లో మీ నమోదిత ఇ-మెయిల్‌కు పంపుతారు.