క్రెడిట్ కార్డుతో కార్​ కొంటున్నారా? ఈ విషయాలు తెలుసుకోవడం మస్ట్!

క్రెడిట్ కార్డుతో కార్​ కొనవచ్చా? దీని వల్ల కలిగే లాభనష్టాలు ఏమిటి?

Buying Car With Credit Card Factors :ప్రస్తుత కాలంలో క్రెడిట్‌ కార్డుల వినియోగం విపరీతంగా పెరిగిపోయింది. క్రెడిట్ కార్డుతో లావాదేవీలు జరిపినట్లయితే ఈఎంఐ ఆప్షన్స్, ఆఫర్స్, రివార్డు పాయింట్స్ లభిస్తుండడం వల్ల చాలామంది వీటిని ఉపయోగిస్తున్నారు. అందుకే కొందరు రివార్డు పాయింట్లు ఎక్కువగా వస్తాయనే ఉద్దేశంతో క్రెడిట్ కార్డుతో భారీ కొనుగోళ్లు కూడా జరుపుతారు. ఈ క్రమంలోనే కొందరు కార్లు కూడా క్రెడిట్​ కార్డుతో కొనేస్తున్నారు. మరి ఇది ఎంత వరకు తెలివైన నిర్ణయం? లాభమా? నష్టమా? అలాగే క్రెడిట్ కార్డుతో కారు కొనుగోలు చేసేటప్పుడు పరిగణలోకి తీసుకోవాల్సిన విషయాలు ఏంటి? ఈ స్టోరీలో తెలుసుకుందాం.

క్రెడిట్ కార్డుపై కారును కొనుగోలు చేయవచ్చా?
క్రెడిట్ కార్డుతో మొత్తం కారును కొనుగోలు చేయాలనే ఆలోచన ఆకర్షణీయంగా అనిపించవచ్చు. ఇలా చేస్తే రివార్డ్ పాయింట్లను పొందొచ్చు. అయితే క్రెడిట్ కార్డుతో కారును కొనుగోలు చేయడం వాస్తవానికి అంత ఈజీ కాదు. ఎందుకంటే కార్ డీలర్‌ షిప్‌ లు బుకింగ్ మొత్తాన్ని చెల్లించడానికి మాత్రమే క్రెడిట్ కార్డులను అంగీకరిస్తాయి. కారు బుకింగ్ ధర దాని విలువలో 5-10శాతం వరకు ఉంటుంది.ఉదాహరణకు మీరు రూ.10 లక్షల విలువైన కారును కొనుగోలు చేస్తున్నారనుకుందాం. అందులో కారు బుకింగ్ మొత్తం రూ.50వేలు- లక్ష వరకు ఉండొచ్చు. స్కోడా వంటి ఇతర డీలర్‌ షిప్​లు తరచుగా క్రెడిట్ లేదా డెబిట్ కార్డుపై రూ.లక్ష వరకు లావాదేవీలను అనుమతిస్తాయి. కొన్ని సందర్భాల్లో, ముఖ్యంగా ప్రీమియం వాహనాలకు ఈ మొత్తం రూ.3-5 లక్షల వరకు ఉంటుంది.

ట్రాన్సాక్షన్ ఫీజు వసూలు
కారు బుకింగ్ మినహా మిగిలిన బ్యాలెన్స్​ను చెల్లించడానికి చాలా డీలర్‌ షిప్​లు క్రెడిట్ కార్డులను అంగీకరించవు. ఎందుకంటే డీలర్‌ షిప్ వసూలు చేసిన మొత్తంపై దాదాపు 1.75శాతం ట్రాన్సాక్షన్ ఫీజు చెల్లించాల్సి ఉంటుంది. ఈ రుసుము డీలర్ల మార్జిన్‌ ను తగ్గిస్తుంది. అమెరికన్ ఎక్స్‌ ప్రెస్ వంటి క్రెడిట్ కార్డులపై 2.5 శాతం ట్రాన్సాక్షన్ ఫీజు పడుతుంది. అందుకే కారు డీలర్లు బుకింగ్ మొత్తానికి మించి క్రెడిట్ కార్డ్ చెల్లింపులను అంగీకరించడానికి వెనుకాడుతారు.

ఈ ఆప్షన్స్ తెలుసుకోండి
మీ క్రెడిట్ కార్డుతో చెల్లింపులు చేయాలని నిర్ణయించుకుంటే ఈ ఆప్షన్స్ పాటించండి. క్రెడిట్ కార్డుతో కారు బుకింగ్ ప్రీమియంను ఎక్కువ మొత్తంలో చెల్లించేలా డీలర్​తో చర్చించండి. అలాగే కొన్ని డీలర్ షిప్​లు ట్రాన్సాక్షన్ ఫీజును కస్టమర్​తో షేర్ చేసుకోవడానికి అంగీకరిస్తాయి. అలాంటి డీలర్లతో మాట్లాడండి.

మీ దగ్గర ఆకర్షణీయమైన రివార్డులను అందించే సూపర్ ప్రీమియం కార్డులు (హై ఎండ్ వీసా ఇన్ఫినిట్ లేదా అమెరికన్ ఎక్స్‌ ప్రెస్ కార్డ్) ఉన్నాయనుకుందాం. అప్పుడు ఆ కార్డుల రివార్డు పాయింట్లు ట్రాన్సాక్షన్ ఫీజును భర్తీ చేస్తాయి. అయితే పెద్ద మొత్తంలో జరిగే ట్రాన్సాక్షన్స్ మీ క్రెడిట్ వినియోగ నిష్పత్తిని గణనీయంగా ప్రభావితం చేస్తాయి.

ఈ విషయాలు అస్సలు మర్చిపోవద్దు!
మర్చంట్ ఫీజులు
క్రెడిట్ కార్డుతో కారు కొనుగోలు చేసే ముందు ఒక విషయం గుర్తుపెట్టుకోవాలి. క్రెడిట్ కార్డ్ చెల్లింపులకు కార్ డీలర్‌ షిప్ అదనపు రుసుము వసూలు చేస్తుందో లేదో తెలుసుకోవాలి. చాలా డీలర్‌ షిప్​లు వారి ప్రాసెసింగ్ ఖర్చులను కవర్ చేయడానికి సర్‌ ఛార్జీలను విధిస్తాయి. ఈ ఛార్జీలు 1-2శాతం వరకు ఉంటాయి.

రివార్డ్ పాయింట్లు, ప్రయోజనాలు
కారు వంటి పెద్ద కొనుగోళ్లకు క్రెడిట్ కార్డును ఉపయోగించడం వల్ల రివార్డ్ పాయింట్లు లభిస్తాయి. అయితే, మీ క్రెడిట్ కార్డ్ రివార్డులను సరిగ్గా వినియోగించుకోవాలి.

క్రెడిట్ లిమిట్, వినియోగం
మీ కార్డును స్వైప్ చేసే ముందు మీ క్రెడిట్ లిమిట్ పరిమితిని ఒక సారి చెక్ చేసుకోవాలి. పెద్ద మొత్తంలో లావాదేవీలు మీ క్రెడిట్ వినియోగ నిష్పత్తిని పెంచుతాయి. ఇది మీ క్రెడిట్ స్కోర్‌ ను ప్రభావితం చేసే అవకాశం ఉంది. వడ్డీ రేట్లు
క్రెడిట్ కార్డులు సాధారణంగా అధిక వడ్డీ రేట్లతో లభిస్తాయి. వ్యక్తిగత రుణాలు, కారు లోన్స్ కంటే చాలా క్రెడిట్ కార్డులపై ఎక్కువ వడ్డీ పడుతుంది. గడువు తేదీకి ముందే మీరు బ్యాలెన్స్​ను పూర్తిగా చెల్లించలేకపోతే, వడ్డీ ఛార్జీలు త్వరగా పెరుగుతాయి. గడువు తేదీలోగా బ్యాలెన్స్‌ చెల్లించలేకపోతే మీపై భారీ వడ్డీ పడే ఛాన్స్ ఉంటుంది. ఈ భారం మీరు పొందిన రివార్డు పాయింట్లతో జరిగే మేలుకన్నా ఎక్కువగా ఉండొచ్చు.

మర్చంట్ కేటగిరీ కోడ్స్
మర్చంట్ కేటగిరీ కోడ్స్ కొన్నిసార్లు మీ రివార్డ్ పాయింట్లను ప్రభావితం చేస్తాయి. కొన్ని కార్డులు డైనింగ్, ట్రావెలింగ్ వంటి నిర్దిష్ట ఖర్చులకు బోనస్ రివార్డ్‌ లను అందిస్తాయి. కాబట్టి మర్చంట్ కేటగిరీ కోడ్స్ గురించి తెలుసుకోవడం వల్ల మీ రివార్డ్‌ లను పెంచుకోవచ్చు.