ఇంట్లో ఎలుకల మందు పీల్చి ఇద్దరు పిల్లలు మృతి- తల్లిదండ్రుల పరిస్థితి విషమం- ఆ కంపెనీపై కేసు!

ఎలుకల మందు పీల్చడం వల్ల ఇద్దరు చిన్నారులు మృతి- వారి తల్లిదండ్రుల పరిస్థితి విషమం!

Two Children Died From Rat Poison Exposure :ఎలుకల మందు పీల్చడం వల్ల ఇద్దరు చిన్నారులు మృతిచెందారు. ఈ ఘటన తమిళనాడు రాజధాని చెన్నై సమీపంలోని కుంద్రత్తూర్​లో జరిగింది. వారి తల్లిదండ్రులు తీవ్ర అస్వస్థతకు గురై, మృత్యువుతో పోరాడుతున్నారు. ఈ విషయంపై కేసు నమోదు చేసుకున్న పోలీసులు దర్యాప్తు చేపట్టారు. ఘటనాస్థలిని పరిశీలించిన ఫోరెన్సిక్ నిపుణులు నమూనాలు సేకరించారు. చిన్నారుల మృతితో స్థానికంగా విషాద ఛాయలు అలుముకున్నాయి.

ఏం జరిగిందంటే?
గిరిధరన్(36), పవిత్ర(31) కుద్రత్తూర్​లో నివసిస్తున్నారు. వీరికి ఇద్దరు పిల్లలు వైష్ణవి(6), సాయి సుదర్శన్(1) ఉన్నారు. ఇంట్లో ఎలుకల బెడద ఎక్కువ అవడం వల్ల- ఆ సమస్యను పరిష్కరించే బాధ్యతను ఒక ప్రైవేటు పెస్ట్​ కంట్రోల్ కంపెనీకి అప్పగించారు. అయితే ఎలుకలను తరమికొట్టడానికి మోతాదు కంటే ఎక్కువగా కెమికల్స్​ వాడారు. కెమికల్ ఇల్లంతా వ్యాపించింది. దాన్ని పీల్చిన చిన్నారులు ఇద్దరు మృతి చెందారు. ప్రస్తుతం గిరిధరన్, పవిత్ర ప్రాణాలతో పోరాడుతున్నారు. ఘటనాస్థలిని సందర్శించిన తాంబరం ఫోరెన్సిక్ సైన్స్​ ఇన్​స్టిట్యూట్​​ నిపుణులు, ప్రైవేటు కంపెనీ ఉపయోగించిన పెస్టిసైడ్స్​ శాంపిళ్లను సేకరించారు.

ఈ ఘటనకు సంబంధించి పెస్ట్​ కంట్రోల్ కంపెనీకి చెందిన ముగ్గురు వ్యక్తులపై కేసు నమోదు చేశారు పోలీసులు. ఇంట్లో కెమికల్స్​ ఉపయోగించిన దినకరన్​ను అరెస్టు చేశారు. మరో ఇద్దరు నిందితులు పరారయ్యారు.