Salman Khans House Firing Case : ప్రముఖ బాలీవుడ్‌ నటుడు సల్మాన్ ఖాన్ ఇంటి వద్ద జరిగిన కాల్పుల కేసులో ముంబయి పోలీసుల దర్యాప్తు ముమ్మరంగా కొనసాగుతోంది. విచారణలో భాగంగా ఘటనకు సంబంధించి సల్మాన్ ఖాన్, ఆయన సోదరుడు ఆర్బాజ్‌ నుంచి వాంగ్మూలం తీసుకున్నారు.
ఈ కేసు దర్యాప్తు నిమిత్తం జూన్‌ 4న క్రైమ్‌ బ్రాంచ్‌కు చెందిన నలుగురు సభ్యుల బృందం సల్మాన్ నివాసానికి వెళ్లినట్లు ఓ అధికారి తెలిపారు. సల్మాన్ ఖాన్తో పాటు అర్బాజ్‌ ఖాన్ నుంచి పోలీసులు స్టేట్‌మెంట్‌ను రికార్డ్ చేసుకున్నారు. సల్మాన్ వాంగ్మూలం తీసుకోవడానికి నాలుగు గంటలు, ఆయన సోదరుడి స్టేట్‌మెంట్‌కు 2 గంటలకుపైగా పట్టినట్లు ఆ అధికారి తెలిపారు. వీరిద్దరినీ కలిపి 150కి పైగా ప్రశ్నలు అడిగారని పేర్కొన్నారు.
'ఘటన జరిగిన రోజు (ఏప్రిల్‌ 14) నేను ఇంట్లోనే ఉన్నా. ముందు రోజు రాత్రి పార్టీ వల్ల ఆలస్యం కావడం వల్ల ఆలస్యంగా పడుకున్నా. తెల్లవారుజామున నా ఇంటి బాల్కనీ వద్ద తుపాకీ పేలిన శబ్దాలు వినిపించడం వల్ల వెంటనే ఉలిక్కిపడి నిద్రలేచా. బాల్కనీకి వెళ్లి చూడగా బయట ఎవరూ కన్పించలేదు' అని సల్మాన్ వాంగ్మూలంలో వెల్లడించారు. ఇక, ఘటన జరిగిన రోజు జుహూలోని తన నివాసంలో ఉన్నట్లు నటుడి సోదరుడు అర్బాజ్‌ ఖాన్ పోలీసులకు చెప్పారు. అయితే లారెన్స్‌ బిష్ణోయ్‌ గ్యాంగ్ నుంచి సల్మాన్‌కు గతంలోనూ బెదిరింపులు వచ్చాయని తెలిపారు.