ప్రసిద్ధ్​ కృష్ణ రేర్ ఫీట్ - స్టీవ్ స్మిత్​ను ఔట్​ చేసి ఆ ఘనత సాధించిన మొదటి బౌలర్​గా రికార్డు!

టీమ్ ఇండియా పేసర్ ప్రసిధ్ కృష్ణ రేర్ రికార్డు - ఆ ఘనత సాధించిన మొదటి బౌలర్​గా రికార్డు!

Prasidh Krishna Border Gavaskar Trophy : ఆసీస్- భారత్ మధ్య జరిగిన ఐదో టెస్టులో టీమ్​ఇండియా యంగ్ పేసర్ ప్రసిద్ధ్​ కృష్ణ అరుదైన ఫీట్ సాధించాడు. టెస్టు కెరీర్​లో 9999 పరుగులు చేసిన స్టీవ్ స్మిత్, 10 వేల మార్కును అందుకోవడానికి 1 పరుగు దూరంలో ప్రసిద్ధ్​ బౌలింగ్​లో ఔట్​ అయ్యాడు. ఈ క్రమంలో టెస్టు క్రికెట్ చరిత్రలో ఓ బ్యాటర్‌ ని 9,999 పరుగుల వద్ద ఔట్​ చేసిన మొట్టమొదటి బౌలర్​గా నిలిచాడు ప్రసిధ్ కృష్ణ.

మొదటి బౌలర్​గా
అంతకుముందు శ్రీలంక మాజీ బ్యాటర్ మహేల జయవర్ధనే కూడా 9,999 వద్ద ఔట్​ అయ్యాడు. అయితే అతను సౌతాఫ్రికాతో మ్యాచ్​లో జాక్వస్ కలీస్ చేతిలో రనౌట్ అయ్యాడు. గతంలో విండీస్ దిగ్గజం బ్రియాన్ లారా 9,990- 10వేల పరుగుల మధ్య రెండు సార్లు ఔట్​ అయ్యాడు. 2004లో ఇంగ్లాండ్​తో జరిగిన టెస్టు సిరీస్​లో లారా 9,993 టెస్టు పరుగుల వద్ద రెండు సార్లు పెవిలియన్​కు చేరాడు.

ఒక్క పరుగు దూరంలో 10వేల మార్క్
ఆసీస్ బ్యాటర్ స్టీవ్ స్మిత్ 10 వేల టెస్టు పరుగుల మార్కును అందుకోవడానికి శ్రీలంకతో సిరీస్ దాకా వేచి చూడాల్సిందే. శ్రీలంకతో జరగబోయే సిరీస్​లో స్మిత్ ఒక రన్ చేస్తే టెస్టుల్లో 10వేల క్లబ్​లో చేరిపోతాడు. ఈ క్రమంలో రికీ పాంటింగ్, అలన్ బోర్డర్, స్టీవ్ వా తర్వాత 10వేల టెస్టు పరుగులు చేసిన నాలుగో ఆసీస్ బ్యాటర్​గా నిలుస్తాడు.

అదరగొట్టిన స్టీవ్ స్మిత్
బోర్డర్-గావస్కర్ ట్రోఫీలో మొదటి మూడు ఇన్సింగ్స్ లో స్టీవ్ స్మిత్ 19 పరుగులే చేశాడు. ఆ తర్వాత పుంజుకుని బ్రిస్బేన్ టెస్టులో సెంచరీ (104) బాదాడు. అలాగే మెల్​బోర్న్ టెస్టులో మరో శతకం (140) పరుగులు చేశాడు. ఆ మ్యాచ్​లో జట్టు విజయంలో కీలక పాత్ర పోషించాడు. తాజాగా జరిగిన మ్యాచ్​లో 4 పరుగుల వ్యక్తిగత స్కోరు వద్ద ప్రసిధ్ కృష్ణ ఓవర్​లో స్లీప్​లో క్యాచ్ ఇచ్చి వెనుదిరిగాడు స్టీవ్ స్మిత్. దీంతో టెస్టుల్లో 10 వేల పరుగుల మార్క్​కు ఒక రన్ దూరంలో నిలిచిపోయాడు.

సిరీస్​ను గెలిచిన ఆసీస్
కాగా, సిడ్నీ వేదికగా జరిగిన ఐదో టెస్టులో ఆసీస్ విజయం సాధించింది. భారత్​​పై ఆరు వికెట్ల తేడాతో గెలుపొందింది. ఈ క్రమంలో 3-1 తేడాతో ఐదు టెస్టుల సిరీస్​ను చేజిక్కుంచుకుంది. దీంతో వరుసగా రెండోసారి ప్రపంచ టెస్టు ఛాంపియన్‌ షిప్‌ ఫైనల్‌కు ఆస్ట్రేలియా చేరుకుంది. ఈ ఓటమితో భారత్ ప్రపంచ టెస్ట్ ఛాంపియన్‌ షిప్ ఫైనల్ రేసు నుంచి నిష్క్రమించింది.