రోబోతో ఇంజినీర్ లవ్​- పెళ్లికి అన్ని ఏర్పాట్లు పూర్తి- 'గిగా' తయారీకి రూ.19 లక్షలు ఖర్చు! - Man Robot Marriage

Man Marry Robot : రోబోను పెళ్లిచేసుకుబోతున్నారో ఇంజినీర్. త్వరలోనే వీరి వివాహం ఘనంగా జరగనుంది. అందుకు సంబంధించిన ఏర్పాట్లు పూర్తయ్యాయి. అసలు ఆ ఇంజినీర్ ఎవరు? రోబో ఎక్కడ తయారవుతుంది?

Man Marry Robot :రాజస్థాన్​లోని జయపుర జిల్లాకు చెందిన ఓ ఇంజినీర్​ రోబోను పెళ్లి చేసుకోబోతున్నారు. ఏంటి రోబోతో పెళ్లి అని షాకైపోతున్నారా? కానీ మీరు చదివింది నిజమే! రోబోలంటే ఎంతో ఆసక్తి ఉన్న ఆయన ప్రస్తుతం రోబోతో ప్రేమలో ఉన్నారు. త్వరలోనే వివాహం చేసుకోనున్నారు.

జిల్లాలోని సీకర్ నివాసి అయిన సూర్య ప్రకాశ్​కు చిన్నప్పటి నుంచి రోబోలపైనే ఆసక్తి. కానీ అతడి తల్లిదండ్రులకు మాత్రం సూర్య ప్రకాశ్ దేశానికి సేవ చేయాలని కోరుకున్నారు. దీంతో స్కూలింగ్​ పూర్తయ్యాక నేవీలో చేరడం కోసం సూర్యప్రకాశ్​ సిద్ధమయ్యారు. అనంతరం పరీక్షలో ఉత్తీర్ణత సాధించి నేవీకి ఎంపికయ్యారు.

అయితే చిన్నప్పటి నుంచి రోబోటిక్స్​పై మక్కువ పెంచుకున్న సూర్య ప్రకాశ్​ మళ్లీ, తనకు ఇష్టమైన రోబోటిక్స్​ వైపు వెళ్లాలని అనుకున్నారు. సూర్య అభిరుచిని చూసిన కుటుంబ సభ్యులు అటువైపు ప్రోత్సహించారు. తర్వాత సూర్య ప్రకాశ్​ అజ్మేర్​లోని ప్రభుత్వ కళాశాలలో ఇంజినీరింగ్ పూర్తి చేశారు. అనంతరం రోబోటిక్స్​లోకి చేరారు. ఆ సమయంలో చాలా ప్రాజెక్టుల్లో వర్క్ చేశారు. ఇప్పుడు రోబో గిగాతో ప్రేమలో పడ్డారు సూర్య ప్రకాశ్. దాదాపు రూ.19 లక్షల వ్యయంతో గిగా రోబో రూపొందుతోంది. తమిళనాడులో తయారీ అయ్యాక, దిల్లీలో ఈ రోబోకి ప్రోగ్రామింగ్ జరగనుంది. ఈ సందర్భంగా ఈటీవీ భారత్​తో మాట్లాడారు సూర్య ప్రకాశ్.

"నేను గిగా రోబోను అన్ని ఆచార వ్యవహారాలతో పెళ్లి చేసుకుంటా. నా కుటుంబసభ్యులు అంతా వివాహ వేడుకలో పాల్గొంటారు. ఈ విషయం తన తల్లిదండ్రులకు ముందు చెప్పగా షాకయ్యారు. తర్వాత అంతా ఒప్పుకున్నారు. గిగా ప్రోగ్రామింగ్​కు దాదాపు రూ.5లక్షలు ఖర్చు అవుతుంది. ఈ ప్రోగ్రామింగ్ ఇంగ్లీష్‌లో ఉంటుంది. మనకు కావాలంటే హిందీ ప్రోగ్రామింగ్‌ను కూడా యాడ్ చేయవచ్చు. గిగా ఎనిమిది గంటలు పని చేయగలదు. హలో చెబుతుంది, నీటిని అందిస్తుంది, అతిథులను స్వాగతించడం మొదలైన పనులు చేస్తుంది."

-- ఈటీవీ భారత్​తో సూర్య ప్రకాశ్

ఇజ్రాయెల్​ నుంచి వచ్చాక!
తాను సుమారు 400 రోబోటిక్స్ ప్రాజెక్టుల్లో పనిచేశానని ఇంజినీర్​ సూర్య ప్రకాశ్​ తెలిపారు. కరోనా సమయంలో జయపుర సవైమాన్ సింగ్ ఆస్పత్రిలో రోబోల ద్వారా రోగులకు మందులు, ఆహారాన్ని అందించినట్లు చెప్పారు. అదే సమయంలో టచ్‌లెస్ ఓటింగ్ రోబో యంత్రాన్ని కూడా తయారు చేసినట్లు చెప్పారు. త్వరలోనే ఇజ్రాయెల్​ సైన్యంతో కలిసి పని చేయబోతున్నట్లు తెలిపారు. ఇజ్రాయెల్​ నుంచి భారత్​కు తిరిగి వచ్చాక సైన్యంలో చేరడానికి ప్రయత్నిస్తానని పేర్కొన్నారు.