లాలూపై ఈడీ ప్రశ్నల వర్షం- 9గంటలకుపైగా సుదీర్ఘ విచారణ

Lalu Prasad Yadav ED Case : 'ల్యాండ్​ ఫర్​ జాబ్​' కేసులో ఈడీ విచారణకు హాజరైన ఆర్జేడీ అధినేత లాలూ ప్రసాద్ యాదవ్​ను అధికారులు 9గంటలకుపైగా ప్రశ్నించారు.

Lalu Prasad Yadav ED Case : బిహార్​లో జరిగిన 'ల్యాండ్ ఫర్ జాబ్' మనీలాండరింగ్​ కుంభకోణంలో విచారణకు హాజరైన ఆర్జేడీ అధినేత లాలూ ప్రసాద్ యాదవ్​ను సుదీర్ఘంగా విచారించింది ఎన్‌ఫోర్స్‌మెంట్​ డైరెక్టరేట్(ఈడీ). సుమారు 9గంటలకుపైగా ప్రశ్నించినట్లు ఈడీ అధికారులు తెలిపారు. మనీలాండరింగ్​ నిరోధక చట్టం (పీఎంఎల్‌ఏ) కింద ఈ కేసును దర్యాప్తు చేస్తున్న అధికారులు, లాలూ ఇచ్చిన వాంగ్మూలాన్ని రికార్డు చేశారు.

విచారణ కోసం సోమవారం ఉదయం 11:00 గంటల ప్రాంతంలో పట్నాలోని ఈడీ కార్యాలయానికి చేరుకున్న లాలూ రాత్రి 8:50 గంటలకు బయటకు వచ్చారు. ఈ సమయంలో ఆయనతో కుమార్తె మిసా భారతి కూడా ఉన్నారు. ఈ క్రమంలో ఈడీ కార్యాలయానికి చేరుకున్న లాలూకు మద్దతుగా భారీ సంఖ్యలో కార్యకర్తలు తరలివచ్చారు. కేంద్ర ప్రభుత్వానికి వ్యతిరేకంగా ఆందోళనలు చేపట్టారు. అయితే ఆదివారం రాష్ట్రంలో కొత్త ప్రభుత్వం కొలువుదీరిన మరుసటిరోజే ఈ పరిణామం జరగడం వల్ల అక్కడి రాజకీయాలు మరోసారి హాట్​టాపిక్​గా నిలిచాయి.

ఆయనకు ఆరోగ్య సమస్యలు ఉన్నాయి
'లాలూ ప్రసాద్​ పలు ఆరోగ్య సమస్యలతో బాధపడుతున్నారు. ఆయణ్ను ఇన్ని గంటలపాటు విచారించకుండా ఉండాల్సింది. ఇది ఆయన ఆరోగ్యంపై ప్రతికూల ప్రభావం చూపించవచ్చు' అని ఆర్జేడీ నేత లలిత్​ యాదవ్​ అన్నారు. మరోవైపు ఈడీ ఏజెన్సీ కేంద్ర ప్రభుత్వం చేప్పినట్లుగా వ్యవహరిస్తోందని, ఈడీ అనేది ప్రస్తుతం ఒక జోక్​గా మారిందని ఆర్జేడీ మహిళానేత ఎజ్యా యాదవ్​ మండిపడ్డారు. అయితే ఈడీ సొంతంగా పనిచేస్తే లాలూపై ఇలాంటి ఆరోపణలు వచ్చేవి కాదని ఆమె వ్యాఖ్యానించారు.

"లాలూ ప్రసాద్​ యాదవ్​కు ఇటీవలే ఆపరేషన్​ జరిగింది. అయినాసరే ఆరోగ్య సమస్యలున్న వ్యక్తిని ఇన్ని గంటలపాటు విచారించడం సరికాదు. ఇది ముమ్మాటికి ఆయణ్ను వేధించడమే."
- ఎజ్యా యాదవ్, ఆర్జేడీ నాయకురాలు

'ఇది మాకు ఇన్విటేషన్​ కార్డు'
లాలూ ప్రసాద్ యాదవ్ విచారణ నిమిత్తం ఈడీ ఎదుట హాజరుకావడంపై ఆయన కుమార్తె, ఆర్జేడీ ఎంపీ మిసా భారతి మీడియాతో మాట్లాడారు. 'ఇది కొత్త విషయం కాదు. తమతో(బీజేపీని ఉద్దేశించి) రాని వారికి ఈ శుభాకాంక్షల కార్డు పంపుతోంది. ఏదైనా ఏజెన్సీ మా కుటుంబాన్ని పిలిచినప్పుడల్లా మేము అక్కడికి వెళ్లి వారికి సహకరిస్తాం. వారి ప్రశ్నలకు సమాధానం ఇస్తాం' అని తెలిపారు.

ఇదీ కేసు
Land For Job Scam Bihar : లాలూ హయాంలో రైల్వే ఉద్యోగాలు ఇచ్చేందుకు ఉద్యోగార్థుల నుంచి వీరు కుటుంబం భూములు తీసుకుందని ప్రధాన ఆరోపణ. ఈ కారణంతో ఆరోపణలతో లాలూ, ఆయన కుమారుడు తేజస్వీ యాదవ్‌కు మనీ లాండరింగ్‌ కేసులో ఇటీవల ఈడీ సమన్లు జారీ చేసింది.

బిహార్​లో నయా సర్కార్​
Bihar Political Crisis :అనేక నాటకీయ పరిణామాల మధ్య బిహార్​లో ఆదివారం ఎన్​డీఏ ప్రభుత్వం ఏర్పడింది. బిహార్ ముఖ్యమంత్రిగా నీతీశ్ కుమార్ ప్రమాణ స్వీకారం చేశారు. నీతీశ్​తోపాటు బీజేపీ నాయకులు సామ్రాట్ చౌదరి, విజయ్ సిన్హాను డిప్యూటీ సీఎంలుగా బిహార్ గవర్నర్ రాజేంద్ర ఆర్లేకర్​ ప్రమాణం చేయించారు. మరో ఎనిమిది ఎమ్మెల్యేలు కూడా మంత్రులుగా ప్రమాణస్వీకారం చేశారు. రాజ్​భవన్​లో జరిగిన నీతీశ్ ప్రమాణ స్వీకార కార్యక్రమానికి బీజేపీ జాతీయ అధ్యక్షుడు జేపీ నడ్డా ఇతర నేతలు హాజరయ్యారు. లాలూ ప్రసాద్‌ యాదవ్‌ నేతృత్వంలోని ఆర్​జేడీతో బంధాన్ని తెంచుకుని బీజేపీతో కలిసి రాష్ట్రంలో ప్రభుత్వాన్ని ఏర్పాటు చేశారు నీతీశ్ కుమార్.