రూ.34కోట్ల భారీ ఫండ్ రైజింగ్​- సౌదీలో మరణశిక్ష ఖైదీ కోసం కేరళ ప్రజల దాతృత్వం - Fund Raising For Abdul Rahim

Fund Raising For Abdul Rahim : కేరళ ప్రజలు మానవత్వాన్ని చాటుకున్నారు. మరణశిక్ష పడిన ఓ మలయాళీ ఖైదీని విడిపించేందుకు ఏకంగా రూ. 34కోట్ల భారీ విరాళాన్ని సేకరించారు.

Fund Raising For Abdul Rahim : సౌదీ అరేబియాలో మరణ శిక్ష పడిన భారతీయ ఖైదీని విడిపించేందుకు నడుం బిగించారు కేరళ రాష్ట్ర ప్రజలు. ఇందుకోసం ఏకంగా రూ.34కోట్ల భారీ విరాళాన్ని సేకరించారు. ఇందులో కేవలం నాలుగు రోజుల్లోనే సుమారు రూ. 24కోట్ల విరాళాలను సేకరించారు. ఈ మొత్తాన్ని వీలైనంత త్వరగా సౌదీ ప్రభుత్వానికి అందజేసి రహీమ్​ను విడుదల చేయించనున్నారు.

కేరళ కొజీకోడ్​కు చెందిన అబ్దుల్ రహీమ్​ కొన్నేళ్ల క్రితం పని కోసం సౌదీ అరేబియాకు వెళ్లాడు. అక్కడే డ్రైవింగ్ చేస్తూ ఓ దివ్యాంగ బాలుడి బాగోగులు చూసే పనిలో చేరాడు. అయితే, ఈక్రమంలోనే 2006లో ప్రమాదవశాత్తు ఆ బాలుడి మరణానికి రహీమ్​ కారణమయ్యాడు. దీనిపై కేసు నమోదు చేసిన అక్కడి పోలీసులు రహీమ్​ను అరెస్ట్ చేసి జైలుకు తరలించారు. దీనిపై విచారించిన కోర్టు అతడికి 2018లో మరణశిక్ష విధించింది. దీనిపై 2022లో హైకోర్టులో అప్పీల్​ చేయగా ప్రతికూలంగా తీర్పు వచ్చింది. అనంతరం సుప్రీం కోర్టును సైతం ఆశ్రయించగా కింద స్థాయి కోర్టు ఇచ్చిన తీర్పును వెలువరించారు. దీంతో సుమారు 18 ఏళ్లుగా జైలులోనే శిక్ష అనుభవిస్తున్నాడు.

మరోవైపు రహీమ్​కు క్షమాభిక్ష పెట్టేందుకు బాలుడి కుటుంబసభ్యులను కోరగా వారు తిరస్కరించారు. చివరగా గతేడాది అక్టోబర్​లో సుమారు 34కోట్ల పరిహారాన్ని చెల్లిస్తే క్షమాభిక్ష పెట్టేందుకు అంగీకరించారు. దీనికి ఏప్రిల్ ​16ను చివరి గడువుగా పెట్టారు. అయితే, అంత పెద్ద మొత్తాన్ని రహీమ్ కుటుంబం చెల్లించే ఆర్థిక స్థోమత లేకపోవడం వల్ల ఫండ్​ రైజింగ్​ను చేపట్టారు అతడి స్నేహితులు.

విరాళాల సేకరణ కోసం ముగ్గురు సభ్యులతో అబ్దుల్ రహీమ్​ ఫండ్ రైజింగ్​ కమిటీని ఏర్పాటు చేశారు. ఇదే కాకుండా సేవ్​ అబ్దుల్ రహీమ్​ పేరిట ఓ మొబైల్​ యాప్​ను సైతం రూపొందించి విరాళాలు సేకరించారు. అనేక మంది స్వచ్ఛందంగా ప్రత్యేక కార్యక్రమాలు చేపట్టి మరీ విరాళాలు సేకరించారు. ఇప్పటి వరకు రూ.34,45,46,568కోట్లను సేకరించామని కమిటీ సభ్యులు తెలిపారు. ఇక నుంచి ఈ విరాళాలు ఇవ్వడం ఆపేయాలని విజ్ఞప్తి చేశారు. 2021లో ప్రారంభమైన ఈ కార్యక్రమం తీర్పు అమలుకు కొద్ది రోజులు ముందుగానే పూర్తి అయ్యింది.