విలేజ్​లో ఐటీ కంపెనీ - 500మందికి జీవనోపాధి! మాస్టర్​ డిగ్రీకి అవకాశం

BAAP IT Company In Ahmednagar : సరిగ్గా రోడ్డు సదుపాయం కూడా లేని గ్రామీణ ప్రాంతంలో ఐటీ కంపెనీని ప్రారంభించారు ఓ వ్యక్తి. అక్కడ రైతుల పిల్లలకు ఉపాధితో పాటు ఉన్నత విద్యను పూర్తి చేసేందుకు కూడా అవకాశం కల్పిస్తున్నారు. రైతుల పిల్లల కోసం ప్రారంభించిన ఆ ఐటీ కంపెనీ ఎక్కడ ఉంది? ఇంతకీ ఆ వ్యక్తి ఎవరో తెలుసుకుందాం.

BAAP IT Company In Ahmednagar : సరైన రోడ్డు సదుపాయం కూడా లేని గ్రామీణ ప్రాంతంలో ఐటీ కంపెనీని ప్రారంభించారు ఓ వ్యక్తి. రైతుల పిల్లల కోసం ఏర్పాటు చేసిన ఈ కంపెనీ ఉద్యోగం మాత్రమే కాదు. మాస్టర్​ డిగ్రీ చేయాలని అనుకునేవారికి కూడా అవకాశం కల్పిస్తోంది. అదే మహారాష్ట్ర అహ్మద్​నగర్​ జిల్లాలో ఉన్న 'బాప్'ఐటీ కంపెనీ.

బాప్​ కంపెనీ ఉద్యోగులు

సంగమ్​నేర్ తాలూకాకు చెందిన రావ్​సాహెబ్ ఘుగే రెండు సంవత్సరాల క్రితం బిజినెస్ ఆప్లికేషన్ అండ్ ప్లాట్​ఫారమ్​- బాప్​ పేరుతో ఐటీ కంపెనీని స్థాపించారు. ఇంట్లో ఇబ్బందుల వల్ల పట్టణాలకు వెళ్లి ఉద్యోగాలు చేయలేని వారి కోసం గ్రామీణ ప్రాంతంలోనే ఐటీ కంపెనీ పెట్టాలని నిర్ణయించుకున్నారు రావ్​సాహెబ్. 'నేను ఉన్నత విద్య కోసం రుణాలు తీసుకోవడానికి బ్యాంకుల దగ్గరకు వెళ్లాను. అక్కడ మీ నాన్న రైతు కదా జీతాలు రావు అని రుణం ఇవ్వడానికి నిరాకరించాయి. ఎన్ని బ్యాంకులు తిరిగిన ఎవరూ ఇవ్వలేదు. అప్పుడు చాలా ఇబ్బందులు పడి విద్యను పూర్తి చేశాను. ఆ తర్వాత అమెరికా వెళ్లి ఉద్యోగంలో చేరాను. అలా నాలా ఎవరూ ఇబ్బందులు పడకూడదని రైతుల పిల్లల కోసం గ్రామీణ ప్రాంతంలో ఐటీ కంపెనీ పెట్టాలని నిర్ణయించుకున్నా' అని రావ్​సాహెబ్ తెలిపారు.

బాప్​ ఐటీ కంపెనీ

"గ్రామాల అభివృద్ధి కోసమే ఈ ప్రాంతంలో బాప్​ కంపెనీ స్థాపించాను. ఇందులో రైతుల పిల్లలకు శిక్షణ ఇచ్చి ఉపాధి కల్పించాలని అనుకున్నా. ప్రస్తుతం కంపెనీలో 450 మంది ఉన్నారు.​ అమెరికా, యూరప్, ఆస్ట్రేలియా కంపెనీలతో బాప్​ కలిసి పని చేస్తుంది."
- రావ్​సాహెబ్ ఘుగే, బాప్​ కంపెనీ వ్యవస్థాపకుడు

కంపెనీ డైరెక్టర్​గా తన తండ్రినే నియమించారు రావ్​సాహెబ్ ఘుగే. కంపెనీ గేటు దగ్గర రైతుల గుర్తుగా తెల్లటి టోపీ సింబల్​ను పెట్టారు. సాఫ్ట్​​వేర్ ఉద్యోగం చేస్తూనే ఇంటి దగ్గర ఉండి తల్లిదండ్రులను చూసుకుంటున్నామని ఉద్యోగులు తెలిపారు. అలాగే ఉన్నత విద్యను కూడా పూర్తి చేస్తున్నామని అంటున్నారు.

బాప్​ ఐటీ కంపెనీ

"నేను బాప్​ కంపెనీలో ఐటీ డెవల్​పర్​గా పని చేస్తున్నాను. ఇంటర్వ్యూలో ఎంపిక అయిన అభ్యర్థులకు శిక్షణ ఇస్తారు. అభ్యర్థులకు రెండు రకాల అవకాశాలు ఉంటాయి. ఉద్యోగం లేదంటే మాస్టర్స్ పూర్తి చేసుకోవచ్చు. నేను మాస్టర్స్ చేయాలని నిర్ణయించుకున్నా. మాస్టర్స్ చేయాలంటే ముంబయి, పుణె వెళ్లాలి. సంగమ్​నేర్​లో MCA కాలేజీలు లేవు"
- ఆశిష్ షిండే, బాప్​ కంపెనీ ఉద్యోగి

ఈ కంపెనీలో పని చేస్తున్న యువకులు ఉద్యోగం చేసుకుంటూనే మరో పక్క వ్వయసాయం చేసుకుంటున్నారని చెప్పారు. బాప్ ఐటీ కంపెనీ భవిష్యత్తులో వందశాతం రైతుల పిల్లలకు ఉపాధి అవకాశాలు కల్పిస్తూ, ఇతరులకు మార్గదర్శకంగా నిలుస్తుందని రావ్​సాహెబ్ ఘుగే చెబుతున్నారు.

కంపెనీ పని చేస్తున్న మహిళా ఉద్యోగులు