சென்னை: தமிழ் சினிமாவில் வளர்ந்துவரும் இளம் நடிகரான கவின், கடைசியாக நடித்த டாடா, ஸ்டார் ஆகிய படங்கள் அடுத்தடுத்து வெற்றியை பெற்றதால் கோலிவுட்டில் நம்பிக்கையானவராக அறியப்படுகிறார். சின்னத்திரையில் இருந்து வந்து தனக்கென தனி ரசிகர்கள் பட்டாளத்தை கொண்டுள்ளார். காதல் படங்கள் மட்டுமின்றி வித்தியாசமான கதைகளை தேர்வு செய்து நடித்தால் நிச்சயம் தமிழ் சினிமாவில் தனியிடம் பிடிப்பார் என்பது ரசிகர்களிடம் கருத்து நிலவுகிறது.
தற்போது கவின் நடிகை நயன்தாராவுடன் ஜோடி சேர்ந்து நடிக்கவுள்ளதாக கோலிவுட் வட்டாரத்தில் கூறப்பட்டு வந்த நிலையில், அதனை இருவரும் சமீபத்தில் உறுதி செய்தனர். பிரபல இயக்குநர் லோகேஷ் கனகராஜிடம் உதவி இயக்குநராக பணிபுரிந்த விஷ்ணு எடவன் இயக்கும் படத்தில் கவின், நயன்தாரா ஆகியோர் இணைந்து நடிக்கின்றனர்.
இது கவினின் 8வது படமாகும். செவன் ஸ்கிரீன் ஸ்டுடியோஸ் நிறுவனம் தயாரிப்பில் ரொமான்டிக் காமெடி படமாக உருவாகி வருகிறது. இந்த படம் குறித்து இன்று வெளியான அப்டேட்டில் பாக்யராஜ், பிரபு, ராதிகா சரத்குமார், பூர்ணிமா பாக்யராஜ் உள்ளிட்டோர் நடிக்கின்றனர் என்பது தெரிய வந்துள்ளது.