ରଥାରୂଢ ହେବେ ମହାବାହୁ, ନୀଳଗିରି ଜଗନ୍ନାଥ ମନ୍ଦିରରେ ଆଗେଇ ଚାଲିଛି ରଥ କାର୍ଯ୍ୟ - Ratha Yatra 2024
Published : Jul 2, 2024, 9:00 PM IST
Nilagiri Jagannath Temple: ବାଲେଶ୍ବର: ଭକ୍ତ ଭାବରେ ବନ୍ଧା କାଳିଆ ସାଆନ୍ତ । ଭକ୍ତଙ୍କୁ ବଡ଼ଦାଣ୍ଡରେ ଦର୍ଶନ ଦେବାପାଇଁ ଶ୍ରୀମନ୍ଦିରରୁ ଓହ୍ଲାଇ ଆସି ରଥରେ ବସି ମାଉସୀ ମା' ମନ୍ଦିର ଯିବ କୋଟି ଓଡ଼ିଆଙ୍କ ମଉଡ଼ମଣି । ସେଥିପାଇଁ ତ, ରଥଖଳା ଏବେ ଚଳଚଞ୍ଚଳ ହୋଇ ଉଠିଛି । ସାଆନ୍ତଙ୍କୁ ରଥରେ ବସାଇ ଭକ୍ତ ଭିଡ଼ିନେବେ ମାଉସୀ ମା' ମନ୍ଦିର । ଏନେଇ ରଥ ପ୍ରସ୍ତୁତି ବେଶ ଜୋରସୋରରେ ଆଗେଇ ଚାଲିଛି । ଭକ୍ତ ଦେଖିବ ତା' ପ୍ରିୟର ଠାକୁରଙ୍କୁ, ଅଜାଡ଼ି ଦେବ ଭକ୍ତି ନୈବେଦ୍ୟ । ବାଲେଶ୍ୱର ଜିଲ୍ଲା ନୀଳଗିରି ରଥଯାତ୍ରା ପାଇଁ ପ୍ରସ୍ତୁତି ଚୂଡାନ୍ତ ହୋଇଥିବା ବେଳେ ଏବେ ରଥ କାର୍ଯ୍ୟରେ ଲାଗି ପଡ଼ିଛନ୍ତି ମହାରଣା ଓ ଅନ୍ୟ କାରିଗର ।
ମହାପ୍ରଭୁ ଏବେ ଅଣସର ଘରେ ରହିଥିବା ବେଳେ ନବଯୌବନ ରୂପ ଦର୍ଶନ ଦେଇ ବାହାରି ଆସିବେ ବଡ଼ ଦେଉଳରୁ କେବଳ ତାଙ୍କ ଭକ୍ତଙ୍କ ପାଇଁ । ଦିନରାତି ଏକ କରି ଖରାକୁ ଖାତିର ନକରି ରଥ ନିର୍ମାଣ କାର୍ଯ୍ୟରେ ଲାଗି ପଡିଛନ୍ତି ମହାରଣା ଓ ଭୋଇ ସେବାୟତ । ରଥଯାତ୍ରା ଯେତେ ନିକଟତର ହେଉଛି କାରିଗରମାନଙ୍କ ହାତ ସେତେ ଫୁର୍ତ୍ତି ହୋଇଯାଉଛି । ଭାଇ ଭଉଣୀଙ୍କୁ ସାଙ୍ଗରେ ଧରି ରଥାରୂଢ ହେବେ ମହାପ୍ରଭୁ ଶ୍ରୀଜଗନ୍ନାଥ । ବଡ଼ଦାଣ୍ଡରେ ହେବ ଭକ୍ତ ଓ ଭଗବାନଙ୍କ ମିଳନ । ରଥ, ପଥ ହେବ ଏକାକାର । ନୀଳଗିରି ଜଗନ୍ନାଥ ମନ୍ଦିରରେ ହୁଏ ନିଆରା ରଥଯାତ୍ରା । ପ୍ରଥମ ଦିନରେ ପହଣ୍ଡି ହେବାକୁ ଥିବା ବେଳେ ଦ୍ଵିତୀୟ ଦିନରେ ରଥ ଛେରା ପହଁରା ହୋଇ ଅଧାବାଟ ରଥ ଟଣା ଯାଇଥାଏ ଏବଂ ତୃତୀୟ ଦିନରେ ରଥ ଯାଇ ପହଁଚି ଥାଏ ମାଉସୀ ମା'ଙ୍କ ପାଖରେ । ସେହିପରି ବାହୁଡ଼ା ମଧ୍ୟ ତିନି ଦିନ ଧରି ହୋଇଥାଏ ।
ଇଟିଭି ଭାରତ, ବାଲେଶ୍ବର