ଭୁବନେଶ୍ବର: ଆସୁଛି ସାଧାରଣ ନିର୍ବାଚନ । ବିଜେଡି ଲାଗି ମୁଣ୍ଡବିନ୍ଧାର କାରଣ ସାଜିଲାଣି ଅସନ୍ତୋଷ ଓ ବିଦ୍ରୋହ । ୨୦୨୪ ନିର୍ବାଚନ ବୈତରଣୀ ପାର ହେବାକୁ ହେଲେ ଦଳୀୟ କନ୍ଦଳକୁ ବ୍ରେକ୍ ଦେବାକୁ ହେବ । ତେଣୁ ବିଜୁ ଜନତା ଦଳ ଆପଣାଇଛି ୪ ସୁତ୍ରୀ ଫର୍ମୁଲା । ଦଳ, ବଳ, କଳ ଓ କୌଶଳ ଆପଣାଇବ ବିଜେଡି । କାରଣ ବଳ ଗୋଟାଉଥିବା ବିରୋଧୀଙ୍କ ଅପେକ୍ଷା ଦଳ ଭିତରେ ଅବିଶ୍ଵାସ ବିଜେଡି ସୁପ୍ରିମୋଙ୍କ ଚିନ୍ତା ବଢ଼ାଇ ଦେଇଛି । କଳାହାଣ୍ଡିରୁ କେନ୍ଦୁଝର, ବାରବାଟୀରୁ ବାରିପଦାରୁ ଆରମ୍ଭ କରି ଯାଜପୁରରୁ ଝାରସୁଗୁଡ଼ା ପର୍ଯ୍ୟନ୍ତ ସବୁଠି ରହିଛି ବିଜେଡି ଭିତରେ ଫାଟ । କେତେବେଳେ ନେତାଙ୍କ ମଧ୍ୟରେ ବିବାଦ ତ ଆଉ କେତେବେଳେ ସାଂସଦ-ବିଧାୟକଙ୍କ ମଧ୍ୟରେ କଳି ଦେଖିବାକୁ ମିଳୁଛି ।
ଗୋଷ୍ଠୀ କନ୍ଦଳ ଏମିତି ହେଲାଣି ଯେ ଦଳୀୟ କାର୍ଯ୍ୟକ୍ରମ ଗୋଟିଏ ନିର୍ବାଚନ ମଣ୍ଡଳୀରେ ୪ ନେତା କରୁଛନ୍ତି । ଏମିତିକି ଦଳର ଶୀର୍ଷ ନେତାଙ୍କ ବିଭିନ୍ନ କାର୍ଯ୍ୟକ୍ରମରେ ବିଜେଡି ନେତାଙ୍କ ମଧ୍ୟରେ ମାରପିଟ ଓ ଟଣାଓଟରା ପର୍ଯ୍ୟନ୍ତ ଗଲାଣି । ଖାଲି ସେତିକି ନୁହେଁ, ଥାନାକୁ ଗଲାଣି ଦଳୀୟ ମାମଲା । ବିଜେଡି ଭିତରେ ଥିବା ବିବାଦ ଏବେ ଜଳଜଳ ହୋଇ ଦିଶୁଛି । ନିକଟରେ ବାଲେଶ୍ଵର ଗସ୍ତରେ ଯାଇଥିଲେ ୫T ଅଧ୍ୟକ୍ଷ ଭିକେ ପାଣ୍ଡିଆନ । ପାଣ୍ଡିଆନଙ୍କ ଗସ୍ତ ବେଳେ ଦଳର ଦୁଇ ନେତାଙ୍କ ଗୋଷ୍ଠୀ ମଧ୍ୟରେ ମାରପିଟର ମାମଲା ଥାନା ପର୍ଯ୍ୟନ୍ତ ଗଲା । ଏହା ପଛର କାରଣ ହେଉଛି ପୂର୍ବତନ ବାଲେଶ୍ଵର ସାଂସଦ ରବୀନ୍ଦ୍ର କୁମାର ଜେନା ଓ ବାଲେଶ୍ଵର ସଦର ବିଧାୟକ ସ୍ୱରୂପ ଦାସଙ୍କ ମଧ୍ୟରେ ଥିବା ବିବାଦ । ବରିଷ୍ଠ ନେତାଙ୍କ ହସ୍ତକ୍ଷେପ ଯୋଗୁଁ ସିନା ଫାଟରେ ତାଳି ପଡିଛି, କେତେବେଳେ ବିସ୍ଫୋରଣ ହେବ କିଏ କହିବ ? ସେହିପରି ବାଲେଶ୍ଵରର ପଡୋଶୀ ଜିଲ୍ଲାର ସଦର ମହକୁମା ବିଧାନସଭା କ୍ଷେତ୍ରର ବର୍ତ୍ତମାନ ବିଧାୟକ ଓ ପୂର୍ବତନ ମନ୍ତ୍ରୀ ଯୁଗଳ କିଶୋର ପଟ୍ଟନାୟକଙ୍କ ପୁଅଙ୍କ ମଧ୍ୟରେ ଥିବା ବିବାଦ କାହାକୁ ଅଛପା ନାହିଁ । ବିଧାୟକ ସଞ୍ଜୀବ ମଲ୍ଲିକ ଓ ଅସିତ ପଟ୍ଟନାୟକଙ୍କ ଗୋଷ୍ଠୀ ମଧ୍ୟରେ ଗଣ୍ଡଗୋଳର ଖବର ପ୍ରତ୍ୟେକ ଦିନ ଆସୁଛି ।
କେବଳ ବାଲେଶ୍ଵର ଓ ଭଦ୍ରକ କାହିଁକି ରାଜ୍ୟର ସମସ୍ତ ଜିଲ୍ଲାରେ ବିଜେଡିର ଅବସ୍ଥା ଏମିତି । ଜଗତସିଂହପୁରରେ ନିକଟରେ ଟିକେଟ ଆଶାୟୀ ଅମରେନ୍ଦ୍ର ଦାସଙ୍କ ଶକ୍ତି ପ୍ରଦର୍ଶନ ବିଜେଡି ପାଇଁ ଚିନ୍ତାର କାରଣ ସାଜିଛି । ଦଳୀୟ କାର୍ଯ୍ୟକ୍ରମରେ ଅତିଷ୍ଠ ହୋଇ ଦଳର ପ୍ରତିଷ୍ଠାତା ସଦସ୍ୟ, ଦୁଇ ଥର ମନ୍ତ୍ରୀ ତଥା ୬ ଥରର ବିଧାୟକ ବଳଭଦ୍ର ମାଝୀ ଶଙ୍ଖ ଛାଡ଼ିଛନ୍ତି । ଆଗକୁ ଏହି ସଂଖ୍ୟା ମଧ୍ୟ ବଢିବ । ପ୍ରତି ନିର୍ବାଚନ ମଣ୍ଡଳୀରେ ୩ରୁ ଅଧିକ ଆଶାୟୀ ଥିବାରୁ ବିଜେଡି ପାଇଁ ଟେନସନ ବଢିଯାଇଛି । ଅସନ୍ତୋଷ ପ୍ରଶମନ, ଦଳୀୟ ବିବାଦରେ ପୂର୍ଣ୍ଣଚ୍ଛେଦ, ଦଳ ଡିଆଁକୁ ରୋକ ପାଇଁ ୪ ସୁତ୍ରୀ ଫର୍ମୁଲା ଆପଣାଇଛି ବିଜେଡି । ଦଳ, ବଳ, କଳ ଓ କୌଶଳ ନୀତି ଆପଣାଇବାକୁ ସୁପ୍ରିମୋ ଦେଇଛନ୍ତି ନିର୍ଦ୍ଦେଶ ।