ହାଇଦ୍ରାବାଦ:34 ବର୍ଷ ପରେ ଭାରତରେ ଖେଳାଯିବ ଏସିଆ କପ । ଆସନ୍ତା 2025 ଏସିଆ କପ କ୍ରିକେଟ ଟୁର୍ଣ୍ଣାମେଣ୍ଟ ଆୟୋଜନ କରିବ ଭାରତ । ଏନେଇ ଏସିଆ କ୍ରିକେଟ ପରିଷଦ ପକ୍ଷରୁ ଘୋଷଣା କରାଯାଇଛି । ଟି-20 ବିଶ୍ୱକପର ପରବର୍ତ୍ତୀ ସଂସ୍କରଣ ଭାରତରେ ଆୟୋଜିନ ହେବାକୁ ଥିବା ବେଳେ ଏସିଆ କପ ଟି-20 ଫର୍ମାଟରେ ଖେଳାଯିବ । 2023ରେ ପାକିସ୍ତାନ (ଦୁବାଇ)ରେ ଏସିଆ କପ ଖେଳାଯାଇଥିଲା ।
ଏସିଆ କପରେ ମୋଟ 6ଟି ଦଳ ଭାଗ ନେବେ: ଭାରତ 2025 ଓ ବାଂଲାଦେଶରେ 2027ରେ ଏସିଆ କପ ଆୟୋଜନ କରାଯିବା ନେଇ ଏସିଆ କ୍ରିକେଟ ପରିଷଦ ପକ୍ଷରୁ ଅଧିକାର ପ୍ରଦାନ କରାଯାଇଛି । ଟି 20 ବିଶ୍ବକପକୁ ଦୃଷ୍ଟିରେ ରଖି ଏସିଆ କପ ଟି 20 ଫର୍ମାଟରେ ଖେଳାଯିବ । ସେହିପରି 2027ରେ ଦକ୍ଷିଣ ଆଫ୍ରିକାରେ ଦିନିକିଆ ବିଶ୍ବକପ ହେବାକୁ ଥିବା ବେଳେ ବାଂଲାଦେଶରେ ଏହି ଟୁର୍ଣ୍ଣାମେଣ୍ଟ ଦିନିକିଆ ଫର୍ମାଟରେ ଖେଳାଯିବ । ଏସିଆ କପରେ ମୋଟ 6ଟି ଦଳ ଭାଗ ନେବେ । ଭାରତ, ଶ୍ରୀଲଙ୍କା, ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନ ବ୍ୟତିତ ଯୋଗ୍ୟତା ପର୍ଯ୍ୟାୟରେ ଷଷ୍ଠ ଦଳ ଚୟନ କରାଯିବ ବୋଲି ଏସିସି ପକ୍ଷରୁ କୁହାଯାଇଛି।