ଭୁବନେଶ୍ବର: ଦୀର୍ଘ ୨୪ ବର୍ଷର ବିଜେଡି ସରକାରର ହୋଇଛି ପତନ । ପ୍ରଥମ ଥର ପାଇଁ ଏକାକୀ ସରକାର ଗଢିବାକୁ ଯାଉଛି ବିଜେପି । ଫସର ଫାଟିଛି କଂଗ୍ରେସର ୯ ରୁ ୯୦ ମିସନ । ତେବେ ନିର୍ବାଚନ ଫଳାଫଳ ଆସିବା ପରେ କଂଗ୍ରେସ ଏକ ପ୍ରେସମିଟ କରିଛି । ରାଜ୍ୟରେ ପ୍ରଥମେ ଓଡିଶାର ସ୍ବାଭିମାନ, ତାମିଲ ପ୍ରଶାସକଙ୍କ ନେତୃତ୍ବକୁ ସମାଲୋଚନା, ମୁଖ୍ୟମନ୍ତ୍ରୀଙ୍କ ଦୁର୍ବଳତାକୁ ପ୍ରସଙ୍ଗ କରି ରାଜରାସ୍ତାକୁ ଓହ୍ଲାଇଥିଲା କଂଗ୍ରେସ । ଏପରିକି ଡ଼ ଅଜୟ କୁମାର ନବନିଯୁକ୍ତ ପ୍ରଭାରୀ ଦାୟିତ୍ୱ ନେବା ପରେ ପ୍ରଥମ କରି ଓଡ଼ିଶା ଗସ୍ତରେ ଆସି ଭୁବନେଶ୍ୱର ରେ ପହଞ୍ଚିବା ପରେ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରରେ ଗଣମାଧ୍ୟମକୁ "Odisha is for Odia" ବୋଲି କହିଥିଲେ । ଓଡ଼ିଶାରେ ବାହାରି ଶାସନ ଚଳିବ ନାହିଁ ବୋଲି କହିଥିଲେ ପ୍ରଭାରୀ । ଓଡ଼ିଶାରେ କଂଗ୍ରେସ ପ୍ରତୀକାତ୍ମକ ଭାବେ ଉଭୟ ବିଜେଡି ବିଜେପିର ବାହାଘର, ଅର୍ନପ୍ରାସନ୍ନ କରିଥିଲା । ଉଭୟ ବିଜେଡି ଓ ବିଜେପି ଗୋଟିଏ ଦଳ,ଓଡିଶାବାସୀଙ୍କ ସହ ଛଳନା କରୁଛନ୍ତି ବୋଲି ଅଭିଯୋଗ ଆଣିଲେ ସୁଦ୍ଧା ଓଡ଼ିଶାବାସୀ କଂଗ୍ରେସ ଉପରେ ବିଶ୍ୱାସ କରି ପାରିଲେ ନାହିଁ।
Congress Analysis Performance (ETV Bharat Odisha) ଏହା ମଧ୍ୟ ପଢନ୍ତୁ ...ଭାରତ ବର୍ଷରେ ଅହଙ୍କାର ପତନ ହୋଇଛି, ଗଣତନ୍ତ୍ରର ବିଜୟ ହୋଇଛି: କଂଗ୍ରେସ - Election Results 2024
ଯାହା ଉପରେ ପ୍ରତିକ୍ରିୟା ରଖି କଂଗ୍ରେସ ପ୍ରଭାରୀ କହିଛନ୍ତି,' ବିଜେଡି ଗୋଟିଏ ବୋକା ଦଳ ଓ ବିଜେପି ଧୋକାବାଜ ପ୍ରେମିକ । ପ୍ରଥମେ ଧୋକା ଦେଇ ବିଜେଡିର ସମର୍ଥନ ହାସଲ କଲା ଓ ପରେ ତାଙ୍କରି ବିରୁଦ୍ଧରେ ଲଢିଲା । ଆମେ ବିଜେଡିର ଆଭିମୁଖ୍ୟ ଉପରେ କୌଣସି ଟିପ୍ପଣୀ କରିବୁନି । ବିଜେପି ୧୪ ହଜାର କୋଟିର ଅର୍ଥ ଇଲେକ୍ଟୋରାଲ ବଣ୍ଡ ଭାବେ ପାଇଛି । ଆମର ନେତା ମାନଙ୍କୁ ଜେଲରେ ଭର୍ତ୍ତି କରାଯାଇଥିଲା । ଆମ ପଛରେ ଇଡି, ସିବିଆଇ ଓ ଗୋଦି ମିଡିଆକୁ ଲଗାଯାଇଥିଲା । ବିଜେପି ଲୋକତନ୍ତ୍ରକୁ ନଷ୍ଟ କରିବାର ପ୍ରୟାସ କରିଛି । ଆମେ ଟିଭି ଓ ଖବର କାଗଜରେ ବିଜ୍ଞାପନ ପାଇଁ ଏକ ଟଙ୍କା ଖର୍ଚ୍ଚ କଲା ବେଳେ ବିଜେପି ଏକ ଲକ୍ଷ ଖର୍ଚ୍ଚ କରିଛି । କିନ୍ତୁ ଉତ୍ତର ପ୍ରଦେଶର ଜନତା ଏହାକୁ ପ୍ରତ୍ୟାଖ୍ୟାନ କରିଛନ୍ତି । ତେଣୁ ସମ୍ବାଦ ପ୍ରଦାନକାରୀ ସଂସ୍ଥାର ଦାୟିତ୍ବ ହେଉଛି ସଠିକ ଓ ସ୍ବଚ୍ଛ ସମ୍ବାଦ ପରିବେଷଣ କରିବା । ଆଗକୁ କଂଗ୍ରେସର ଦିନ ଆସିବ । ଦିନେ ଚନ୍ଦ୍ରବାବୁ , ଅଖିଳେଶ ଯାଦବ, ଶରଦ ପାୱାରଙ୍କ ସମୟ ଅତିବାହିତ ହୋଇଯାଇଛି ବୋଲି କହୁଥିଲେ ମାତ୍ର ତାହା ବର୍ତ୍ତମାନ ଭୁଲ ପ୍ରମାଣିତ ହୋଇଯାଇଛି । ଆମେ ମଧ୍ୟ ଲଢ଼ିବୁ ଆଉ ଜିତିବୁ।'
ସୂଚନାଯୋଗ୍ୟ ଯେ ଓଡ଼ିଶାରେ କଂଗ୍ରେସରୁ 14ଟି ବିଧାୟକ ଏବଂ ଜଣେ ମାତ୍ର ସାଂସଦ ଜିତିଛନ୍ତି । ଅବିଭକ୍ତ କୋରାପୁଟ ଜିଲ୍ଲାରୁ 7 ଜଣ ବିଧାନସଭାକୁ ନିର୍ବାଚିତ ହୋଇଥିବା ବେଳେ କୋରାପୁଟ ସଂସଦୀୟ କ୍ଷେତ୍ରରେ କଂଗ୍ରେସର ସପ୍ତଗିରି ଉଲାକା ବାଜିମାତ କରିଛନ୍ତି । ଆଉ କିଛି ସ୍ଥାନରେ କଂଗ୍ରେସ ଖୁଵ କମ ଭୋଟ ବ୍ୟବଧାନରେ ହାରିଛି । ଭଣ୍ଡାରିପୋଖରୀରେ ନିରଞ୍ଜନ ପଟ୍ଟନାୟକ, ଭୋଗରାଇରେ ସତ୍ୟ ଶିବ ଦାଶ, ଆନନ୍ଦପୁରରେ ଜୟଦେବ ଜେନା, ପାରଳାଖେମୁଣ୍ଡିରେ ବିଜୟ ପଟ୍ଟନାୟକଙ୍କ ଭଳି ତୁଙ୍ଗ ନେତା ମାନେ କମ ଭୋଟ ବ୍ୟବଧାନରେ ପରାଜୟ ବରଣ କରିଛନ୍ତି ।
ଇଟିଭି ଭାରତ, ଭୁବନେଶ୍ବର
