ଭୁବନେଶ୍ୱର: 'ଓଡ଼ିଶା ଅର୍ଥନୈତିକ ସର୍ଭେ ରିପୋର୍ଟ ୨୦୨୪-୨୫'କୁ ନେଇ ତେଜିଲା ଶ୍ରେୟ ରାଜନୀତି । ରାଜ୍ୟ ଅଭିବୃଦ୍ଧି ପଛରେ କେଉଁ ସରକାରଙ୍କୁ ମିଳିବ ଶ୍ରେୟ ସେନେଇ ଆରମ୍ଭ ହୋଇଯାଇଛି ବୟାନବାଜି । ୮ ମାସର ସରକାର ବିକାଶକୁ ଆଗକୁ ନେବା ପାଇଁ ଆବଶ୍ୟକୀୟ ଚେଷ୍ଟା ସଫଳତାର ସହ କରିଥିବାରୁ ଓଡ଼ିଶା ବିକଶିତ ଦିଗ ଆଡକୁ ଯାଉଥିବା ବିଜେପି କହିଥିବା ବେଳେ ପୂର୍ବ ସରକାରଙ୍କ ଯୋଗୁଁ ଓଡ଼ିଶା ଅର୍ଥନୀତି କ୍ଷେତ୍ରରେ ସମୃଦ୍ଧ ହୋଇଥିବା ବିଜେଡି ପ୍ରତିକ୍ରିୟା ରଖିଛି । ସେପଟେ ଉଭୟଙ୍କୁ ସମାଲୋଚନା କରିଛି କଂଗ୍ରେସ ।
ଅର୍ଥନୈତିକ ସର୍ଭେ ରିପୋର୍ଟକୁ ନେଇ ଶ୍ରେୟ ରାଜନୀତି:
୯୦ତମ ବଜେଟ ଉପସ୍ଥାପନ ପୂର୍ବରୁ ବିଧାନସଭାରେ ଉପସ୍ଥାପିତ ହୋଇଛି 'ଓଡିଶା ଅର୍ଥନୈତିକ ସର୍ଭେ ରିପୋର୍ଟ ୨୦୨୪-୨୫'। ତେବେ ଅର୍ଥନୈତିକ ସର୍ଭେ ରିପୋର୍ଟକୁ ନେଇ ଆରମ୍ଭ ହୋଇଯାଇଛି ରାଜନୈତିକ ବୟାନବାଜି । ଅର୍ଥନୈତିକ ସର୍ଭେ ରିପୋର୍ଟରେ ରାଜ୍ୟ ଅଭିବୃଦ୍ଧି ପଛରେ ଶ୍ରେୟ କାହାର, ତାହାକୁ ନେଇ ତେଜିଛି ରାଜନୀତି ।
'ବିଗତ ସରକାରଙ୍କ ଅପେକ୍ଷା ଏ ସରକାରଙ୍କ ଉପଲବ୍ଧି ଭଲ':
ଏନେଇ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି,"ଏହି ୬ରୁ ୭ ମାସ ମଧ୍ୟରେ ସରକାର ରାଜ୍ୟର ବିକାଶକୁ ଆଗକୁ ନେବା ପାଇଁ ଯାହା ଯାହା ଚେଷ୍ଟା ଆବଶ୍ୟକ ତାହାକୁ ସଫଳତାର ସହ କରିଛନ୍ତି । ପ୍ରଥମ ବର୍ଷର ପ୍ରଥମ ପର୍ଯ୍ୟାୟରେ କୌଣସି ସରକାର ଗତିଶୀତଳତାର ସହିତ ବିକାଶକୁ ଆଗକୁ ନେବାର ପ୍ରକ୍ରିୟା ବିଗତ ସମସ୍ତ ସରକାରଙ୍କ ଅପେକ୍ଷା ଏ ସରକାରଙ୍କ ଉପଲବ୍ଧି ବହୁତ ଭଲ ଅଛି । ବିକାଶକୁ ଆହୁରି ତ୍ୱରାନ୍ୱିତ କରିବା ପାଇଁ ବଜେଟ ଆସିବାକୁ ଯାଉଛି ।"
ସେ ଆଉମଧ୍ୟ କହିଛନ୍ତି," ମୁଦ୍ରାସ୍ପିତୀ କମାଇବା ସହ ଅର୍ଥନୀତି ସୁଦୃଢ ପାଇଁ ନୂଆ ସରକାର ଅନେକ ପଦକ୍ଷେପ ନେଇଛନ୍ତି । ବିଜେଡି ସରକାର ଗଲେଣି କିନ୍ତୁ ବିଶ୍ଵାସ କରି ପାରୁ ନାହାନ୍ତି । ମରୀଚିକା ପଛରେ ନ ଧାଇଁ ବାସ୍ତବତାକୁ ଆସନ୍ତୁ ବିରୋଧୀ ଦଳର ଭୂମିକା ନିଭାନ୍ତୁ ।"
'ପୂର୍ବ ସରକାରଙ୍କ ପରିଶ୍ରମ ଏବଂ ସାଧନ':
ଅନ୍ୟପଟେ ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ୟ କହିଛନ୍ତି, ବର୍ତ୍ତମାନର ସରକାର ଏକ ଭାଗ୍ୟଶାଳୀ ସରକାର । ସେ ଉତ୍ତରାଧିକାରୀ ସୁତ୍ରରେ ଏକ ଭଲ ସରକାର ପାଇଛନ୍ତି । ଆମେ ଆଶା କରିବୁ ତାହାର ସମ୍ପୂର୍ଣ୍ଣ ସଦୂପଯୋଗ କରିବେ । ଦୂରଦୃଷ୍ଟି ସମ୍ପନ୍ନ ମନୋଭାବ ନେଇ ବଜେଟ ତିଆରି କରିବେ । ପୂର୍ବତନ ସରକାର ଯେଉଁ ଉତ୍ତମ ଅର୍ଥନୈତିକ ବ୍ୟବସ୍ଥା ଛାଡି ଯାଇଛନ୍ତି ତାହାର ସମ୍ପୂର୍ଣ୍ଣ ସଦୂପଯୋଗ କରିବା ପାଇଁ ବର୍ତ୍ତମାନର ସରକାର ହାତଛଡା କରିବେ ନାହିଁ । ଅର୍ଥନୈତିକ ସର୍ଭେ ରିପୋର୍ଟରେ ମୁଖ୍ୟତଃ ୨୦୧୯-୨୦ ରୁ ୨୦୨୩-୨୪ ଭିତରେ ଓଡିଶା ଅର୍ଥନୀତି ବିକାଶର ଉଲ୍ଲେଖ କରାଯାଇଛି । ଗତବର୍ଷ ମାନଙ୍କରେ ଓଡ଼ିଶା ବିଭିନ୍ନ କ୍ଷେତ୍ରରେ ସୁନ୍ଦର ସଫଳତା ହାସଲ କରିଛି । ଆଚିଭର ବର୍ଗରେ ଓଡ଼ିଶା ସ୍ଥାନ ପାଇଛି । ଏହା ପୂର୍ବ ସରକାରଙ୍କ ପରିଶ୍ରମ ଏବଂ ସାଧନ । ଆସନ୍ତାକାଲି ସରକାର ଯେଉଁ ବଜେଟ ଉପସ୍ଥାପନ କରିବେ ଏ ସୁଯୋଗର ଉପଯୋଗ କରିବେ ଏବଂ ରାଜ୍ୟର ଅର୍ଥ ବ୍ୟବସ୍ଥାକୁ ଆହୁରି ଊର୍ଦ୍ଧ୍ୱଗାମୀ କରିବା ପାଇଁ ଯେଉଁ ଦିଗ ଆମେ ଦେଇ ଛାଡି ଦେଇଛୁ ତାକୁ ଆହୁରି ଦୀର୍ଘ କରିବା ପାଇଁ ବ୍ୟବସ୍ଥା କରିବେ । ଯଦି ଏ ସୁଯୋଗକୁ ସରକାର ହରାଇବେ ଓଡିଶା ନିମ୍ନ ସ୍ତରରେ ପହଞ୍ଚିବ।"
କଂଗ୍ରେସର କଟାକ୍ଷ:
କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କଟାକ୍ଷ କରି କହିଛନ୍ତି, "ଯଦି ଅଭିବୃଦ୍ଧି ଶ୍ରେୟ ନେବାକୁ ପ୍ରତିଯୋଗିତା କରୁଛନ୍ତି ତାହେଲେ ଦରଦାମ ବୃଦ୍ଧିର ଶ୍ରେୟ ବି ନିଅନ୍ତୁ । ରାଜ୍ୟ ଅଭିବୃଦ୍ଧି ହାର ବଢ଼ି ନାହିଁ ପୂର୍ବ ବର୍ଷ ଅପେକ୍ଷା କମିଛି ।"
କଣ କହୁଛି ଓଡ଼ିଶା ଅର୍ଥନୈତିକ ସର୍ଭେ ରିପୋର୍ଟ ୨୦୨୪-୨୫:
ଓଡ଼ିଶା ଅର୍ଥନୈତିକ ସର୍ଭେ ରିପୋର୍ଟ ୨୦୨୪-୨୫ ରିପୋର୍ଟ ଅନୁଯାୟୀ ଚଳିତ ବର୍ଷ ୯.୫ଲକ୍ଷ କୋଟି ଟଙ୍କା ହେବ ବୋଲି ଆକଳନ କରାଯାଇଛି । ଆଉ ମଧ୍ୟ ରାଜ୍ୟର ଅର୍ଥନୈତିକ ଅଭିବୃଦ୍ଧି ହାର ୭.୨ ପ୍ରତିଶତ ରହିବ ବୋଲି ଆକଳନ କରାଯାଇଛି । ଏହି ବର୍ଷରେ ଓଡିଶା ଅର୍ଥନୀତିର ସମସ୍ତ କ୍ଷେତ୍ରରେ ସୁଦୃଢ ଅଭିବୃଦ୍ଧି ପରିଲକ୍ଷିତ ହୋଇଛି । ଏହା ସର୍ବଭାରତୀୟ ସ୍ତରର ୬.୪ ପ୍ରତିଶତ ତୁଳନାରେ ଅଧିକ ।
