ସିମଲା:ହିମାଚଳ ରାଜନୀତିରେ ବଡ ହଲଚଲ । ସତ୍ୟ ପାଲଟିବ କି ଚର୍ଚ୍ଚା, ମହାରାଷ୍ଟ୍ର ଭଳି ଭାଙ୍ଗିବ କି ହିମାଚଳ ସରକାର ? ଇସ୍ତଫା ଦେଲେ ମନ୍ତ୍ରୀ ବିକ୍ରମାଦିତ୍ୟ ସିଂ । କ୍ୟାବିନେଟ ମନ୍ତ୍ରୀପଦରୁ ଆଜି ସେ ଇସ୍ତଫା ଦେଇଛନ୍ତି । ସାମ୍ବାଦିକ ସମ୍ମିଳନୀ ଜରିଆରେ ଆଜି ସେ ଏହି ଘୋଷଣା କରିଛନ୍ତି । ଏହାସହ ଆଜି ସେ ମୁଖ୍ୟମନ୍ତ୍ରୀ ସୁଖବିନ୍ଦର ସିଂଙ୍କୁ ମଧ୍ୟ ସମାଲୋଚନା କରିଛନ୍ତି । ବର୍ତ୍ତମାନ ସୁଖୁ ସରକାର ସଙ୍କଟକୁ ଆସି ଯାଇଛନ୍ତି । ଅନ୍ୟପଟେ ବିଧାନସଭା ଅଧିବେଶନରେ 15ଜଣ ବିଜେପି ବିଧାୟକଙ୍କୁ ସସପେଣ୍ଡ କରାଯାଇଛି ।
ହିମାଚଳ ପ୍ରଦେଶର କଂଗ୍ରେସ ପ୍ରମୁଖ ପ୍ରତିଭା ସିଂଙ୍କ ଏବଂ ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ବିରଭଦ୍ର ସିଂଙ୍କ ପୁଅ ବିକ୍ରମାଦିତ୍ୟ ସିଂ ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି, "ମୁଁ ଇସ୍ତଫା ଦେଉଛି । ସରକାରରେ ରହିବା ପାଇଁ ମୋର ଅଧିକାର ନାହିଁ । ଆମେ ଚାହୁଁ ଯେ, ସରକାର ସଙ୍କଟରୁ ବର୍ତ୍ତିଯାଉ । ମୁଁ କାହାକୁ ଭୟ କରେ ନାହିଁ । ଯେଉଁଠାରେ ଭୁଲ ରହିଛି ତାହା ମୁଁ କହିବି । ଆମେ ପ୍ରିୟଙ୍କା ଗାନ୍ଧୀଙ୍କ ସହ କଥା ହୋଇଛୁ । ମୁଁ ଭାବୁଛି ଦଳ ଏହି ପ୍ରସଙ୍ଗରେ ଦୃଷ୍ଟି ଦେବ ।"
ଏହା ମଧ୍ୟ ପଢନ୍ତୁ: ହିମାଚଳରେ ଭୁଶୁଡ଼ିବ କି ସୁଖୁ ସରକାର? ରାଜ୍ୟପାଳଙ୍କ ଦ୍ବାରସ୍ଥ ହେଲା ବିଜେପି, ଫ୍ଲୋର ଟେଷ୍ଟ ଦାବି
ବିଧାୟକଙ୍କୁ ଅଣଦେଖା:ସେ ଆହୁରି ମଧ୍ୟ କହିଛନ୍ତି, "ସୁଖବିନ୍ଦର ସିଂ ଅନେକ ବିଧାୟକଙ୍କୁ ଅଣଦେଖା କରିଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟକଳାପକୁ ନେଇ ଅନେକ ବିଧାୟକ କ୍ରୋଧିତ ହୋଇଥିଲେ ଏବଂ ବର୍ତ୍ତମାନ ମଧ୍ୟ ସ୍ଥିତି ଠିକ ନାହିଁ । ଏହି ପରିସ୍ଥିତିରେ ସରକାରଙ୍କ ସହ ରହିବା ମୋ ପାଇଁ ଠିକ ହେବ ନାହିଁ । ତେଣୁ ମୁଁ ମନ୍ତ୍ରୀ ପଦରୁ ଇସ୍ତଫା ଦେଉଛି । ମୁଁ ଆଗାମୀ ସମୟରେ ପରବର୍ତ୍ତୀ ପଦକ୍ଷେପ ବିଷୟରେ ବିଚାର କରିବି । "