ଜଗତସିଂହପୁର:ନିର୍ବାଚନ ଯେତେ ପାଖେଇ ଆସୁଛି ରାଜନୈତିକ ଉଷ୍ମତା ମଧ୍ୟ ସେତେ ବଢି ଚାଲିଛି । ସବୁ ନେତାଙ୍କ ଫୋକସରେ ଏବେ ଭୋଟର । ଗାଁ ଗାଁ ବୁଲି ମତଦାତାଙ୍କ ନିକଟତର ହେବାକୁ ପ୍ରୟାସ ଆରମ୍ଭ କରିଦେଲେଣି ନେତାକର୍ମୀ । ଏହିକ୍ରମରେ ଜଗତସିଂହପୁର ଜିଲ୍ଲାର ତିର୍ତ୍ତୋଲ ନିର୍ବାଚନ ମଣ୍ଡଳୀରେ ମଧ୍ୟ ବିଜେଡି ପକ୍ଷରୁ ଆରମ୍ଭ ହୋଇଯାଇଛି ପ୍ରଚାର କାର୍ଯ୍ୟକ୍ରମ । ତିର୍ତ୍ତୋଲ ବିଜେଡି ବିଧାୟକ ପ୍ରାର୍ଥୀ ଓ ଜଗତସିଂହପୁର ସାଂସଦ ପ୍ରାର୍ଥୀ ବିରିଡି ବ୍ଲକ ବିଜେଡି କାର୍ଯ୍ୟାଳୟରୁ ପ୍ରଚାର ଅଭିଯାନ ଆରମ୍ଭ କରିଛନ୍ତି ।
ସୋମବାର ଦିନ ବିଜେଡି ପ୍ରାର୍ଥୀ ରମାକାନ୍ତ ଭୋଇ ଓ ସାଂସଦ ପ୍ରାର୍ଥୀ ରାଜଶ୍ରୀ ମଲ୍ଲିକ ବିରିଡି ବ୍ଲକ ବିଜେଡି କାର୍ଯ୍ୟାଳୟରେ ନିଜ ସମର୍ଥକଙ୍କୁ ଭେଟିବା ସହ ସେଠାରୁ ନିଜ ନେତା ଓ କର୍ମୀମାନଙ୍କ ସହ ଏକ ଶୋଭାଯାତ୍ରାରେ ବାହାରି ପ୍ରଥମେ ଧ୍ୟାନକୁଦ ସ୍ଥିତ ଶ୍ରୀ ଜଗନ୍ନାଥ ମନ୍ଦିରରେ ପହଞ୍ଚିଥିଲେ । ସେଠାରେ ଜଗନ୍ନାଥଙ୍କ ଆଶୀର୍ବାଦ ଭିକ୍ଷା କରିଥିଲେ । ଏହାପରେ ସେଠାରୁ 55 ନମ୍ବର ଜାତୀୟ ରାଜପଥ ଦେଇ ବାଲିଆ, ଧନୀପୁର ଆଦି ସ୍ଥାନରେ ପହଞ୍ଚିବା ପରେ ସେଠାରେ ଦଳୀୟ କର୍ମୀମାନେ ସମ୍ବର୍ଦ୍ଧିତ କରିଥିଲେ । ପରେ ମାଆ ଶାରଳା ମନ୍ଦିରକୁ ଯାଇ ଉଭୟ ମା'ଙ୍କୁ ଦର୍ଶନ କରି ଆଶୀର୍ବାଦ ଭିକ୍ଷା କରିଥିଲେ ।ଅନ୍ୟପଟେ ଏହି କାର୍ଯ୍ୟକ୍ରମରେ ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାସଙ୍କୁ ଦେଖିବାକୁ ମିଳିନଥିଲା ।
ଏହାମଧ୍ୟ ପଢନ୍ତୁ..'ଜଗତସିଂହପୁରରେ କଂଗ୍ରେସ ସଶକ୍ତ, ଘର ବାହୁଡା ଆରମ୍ଭ କଲେଣି କର୍ମୀ' - Jagatsinghpur Congress