ହାଇଦ୍ରାବାଦ:ହ୍ରିତିକ ରୋଶନଙ୍କ ଫିଲ୍ମ 'ଫାଇଟର' ରିଲିଜ ହେବା ଦିନ ଠାରୁ ଭଲ ପ୍ରଦର୍ଶନ କରୁଛି । ଏହି ଫିଲ୍ମଟି ଦର୍ଶକ ମନ ଜିତିଛି । ବର୍ତ୍ତମାନ ବଲିଉଡ ସେଲିବ୍ରିଟି ମଧ୍ୟ ଏହି ଫିଲ୍ମକୁ ପସନ୍ଦ କରିଛନ୍ତି । ନିକଟରେ ଅର୍ଜୁନ କପୁର ଏବଂ ଶିଳ୍ପା ସେଟ୍ଟୀ ଏହି ଫିଲ୍ମର ପ୍ରଶଂସା କରିଥିବା ବେଳେ ବର୍ତ୍ତମାନ ଆର ମାଧବନ 'ଫାଇଟର'କୁ ପସନ୍ଦ କରିବା ସହ ପ୍ରଶଂସା କରିଛନ୍ତି । ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି ଅଭିନେତା 'ଫାଇଟର' ଉପରେ ପ୍ରତିକ୍ରିୟା ଦେଇଛନ୍ତି ।
ଆର ମାଧବନ୍ ଏକ୍ସରେ ଫାଇଟର ନେଇ ରିଭ୍ୟୁ ସେୟାର କରିଛନ୍ତି । ସେ ଫାଇଟରକୁ ଏକ "ଅସାଧାରଣ" ଚଳଚ୍ଚିତ୍ର ବୋଲି କହିବା ସହ ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶନାକୁ ପ୍ରଶଂସା କରିଛନ୍ତି । ଏଥିସହ ଏହା "ଅନ୍ତର୍ଜାତୀୟ ଭାରତ ସିନେମା"ର ଏକ ଉଦାହରଣ ବୋଲି କହିଛନ୍ତି । ସେ ଲେଖିଛନ୍ତି, 'ଫାଇଟର ଏକ ଅସାଧାରଣ ଫିଲ୍ମ ଅଟେ । ସମସ୍ତେ ବହୁତ ଭଲ କାମ କରିଛନ୍ତି । ସମସ୍ତ କ୍ରୁ ଏବଂ କାଷ୍ଟଙ୍କୁ ନମସ୍କାର । ଆପଣମାନେ ଏକ ଭାରତୀୟ ସିନେମାକୁ ସାନଦାର, ପ୍ରେରଣାଦାୟକ ଫିଲ୍ମ ଦେଇଛନ୍ତି । ଆଜି ଭାରତୀୟ ସିନେମା କିପରି ଅନ୍ତର୍ଜାତୀୟ ହୋଇପାରିଛି ତାହାର ଏହା ଏକ ଉଦାହରଣ ।'
ସେପଟେ ମାଧବନଙ୍କ ଏହି ସମୀକ୍ଷାକୁ ନେଇ ସିଦ୍ଧାର୍ଥ ଆନନ୍ଦ ମଧ୍ୟ ନିଜର ପ୍ରତିକ୍ରିୟା ଦେଇଛନ୍ତି । ଅଭିନେତାଙ୍କୁ କୃତଜ୍ଞତା ଜଣାଇ ସିଦ୍ଧାର୍ଥ ଲେଖିଛନ୍ତି, 'ମ୍ୟାଡି! ତୁମର ଏହି ଶବ୍ଦ ପାଇଁ ବହୁତ ବହୁତ ଧନ୍ୟବାଦ । ଏହି ସ୍ବୀକୃତି ସହ ଟିମ ବହୁତ ଖୁସି ହେବ, ବିଶେଷ କରି ଆପଣଙ୍କ ସ୍ତରର ଜଣେ କଳାକାରଙ୍କଠାରୁ ଏପରି ପ୍ରଶଂସା ଶୁଣିବା ଆମ ପାଇଁ ଅନେକ କିଛି ।'