मुंबई - प्रतिभावान अभिनेता मुकेश खन्ना यांनी १९९७ साली 'शक्तिमान' या मालिकेत भारतीय सुपरहिरो शक्तिमान साकारला होता आणि त्या मालिकेला अफाट प्रसिद्धी मिळाली होती. बच्चेकंपनीमध्ये तर शक्तिमान प्रचंड पॉप्युलर झाला आणि आजही त्याची ख्याती कायम आहे. आता अडीच दशकांनंतर मराठीत शक्तिमान अवतरणार आहेय यामध्ये प्रमुख भूमिकेत आदिनाथ कोठारे दिसणार आहे. मग, शक्तिमान' मध्ये आदिनाथ कोठारे सुपरहिरो साकारत आहे का? अर्थात त्याचे उत्तर सिनेमा प्रदर्शित झाल्यावरच मिळेल. प्रकाश कुंटे दिग्दर्शित 'शक्तिमान' या चित्रपटाचे पोस्टर नुकतेच सोशल मीडियावर प्रदर्शित करण्यात आले. हे पोस्टर पाहून प्रेक्षकांना सुपरहिरोचा नवा अवतार बघायला मिळणार? तसेच मराठी चित्रपटसृष्टीत वेगळा प्रयोग होतोय का? असे प्रश्न पडू लागले आहेत.
'शक्तिमान'च्या पोस्टरमध्ये आदिनाथ कोठारे आणि स्पृहा जोशी दिसत असून त्यांच्यासोबत बालकलाकार ईशान कुंटे दिसत आहे. त्यावरील "बाबा तू होऊ शकतोस सुपरहिरो" ही टॅगलाईन लक्ष वेधून घेतेय. पोस्टरमधील एक हसमुख कुटुंब आणि आदिनाथने घातलेला सुपरहिरोचा लाल रंगाचा केप यामुळे कुतुहूल निर्माण झालेले दिसते. यातील बालकलाकार ईशान कुंटे हा दिग्दर्शक प्रकाश कुंटे यांचा मुलगा असून चित्रीकरण होत असताना तो केवळ ६ वर्षांचा होता. मराठी चित्रपट आणि सुपरहिरो ही संकल्पना नवीन असून जर ती सिनेमात दिसेल तर हा एक अतिशय वेगळा प्रयोग प्रेक्षकांना खूष करेल.