ठाणे : घोडबंदर रोड येथील उच्चभू वस्ती असलेल्या ठिकाणी सैफ अली खानचा हल्लेखोर बांगलादेशी नागरिकाला हिरानंदानी इस्टेट येथून रविवारी पहाटे अटक केली. ठाणे पोलिसांच्या मदतीनं मुंबई पोलिसांनी बांगलादेशी आरोपीला अटक केली. ठाणे परिसरात मोठ्या प्रमाणात बांधकाम सुरु असल्यानं ते बांगलादेशी नागरिकांचा अड्डा झाला आहे. ठाणे पोलिसांनी आता बांगलादेशी नागरिकांना शोधून काढण्याची मोहिम हाती घेतली आहे.
बांगलादेशाच्या विरोधात मोठी मोहीम : ठाण्याच्या हिरानंदानी इस्टेट भागात लेबर कॅम्प जवळ मिळालेल्या आरोपीने या परिसरात दहशत निर्माण केली आहे. या भागात करोडो रुपये किंमतीची घरे आहेत. या ठिकाणी अनेक इमारतींच्या बांधकामाचं काम सुरू आहे. सोबत मेट्रोचं देखील कास्टिंग यार्ड आहे. यासाठी लागणारा मोठा कामगार वर्ग या भागात राहतो. सैफ अली खानवर हल्ला करणारा आरोपी या भागातून मिळाल्यानंतर आता या सर्व परिसरात ठाणे आणि मुंबई पोलिसांनी मोठी शोध मोहीम घेतली आणि मोबाईल टॉवर लोकेशनच्या आधारे आरोपीला अटक केली. हा आरोपी या भागातून मिळाल्यानंतर ठाणे पोलीस देखील चांगलेच कामाला लागले आहेत. ठाणे पोलीस आयुक्तालयात आता बांगलादेशी विरोधात मोठी मोहीम हाती घेतली आहे.
बांगलादेशी घुसखोरांकडं भारतीय नागरिक असल्याचे दस्तावेज : ठाणे स्टेशन ते गायमुख आणि शिळफाटा आणि पुढेही मोठ्या प्रमाणात गृहसंकुले आणि नागरिकांची संख्या वाढत आहे. या बांधकाम व्यावसायिकांना मजूर पुरविणारे ठेकेदारांना बांगलादेशी नागरिक हे स्वस्तात मिळतात. त्यामुळं बहुतांश बांगलादेशींचा अड्डा हा बांधकामाची ठिकाणे झाला आहे. ठाणे पोलिसांनी बांगलादेशी नागरिकांना शोधून त्यांच्या मायदेशी परत पाठविण्याची मोहीम सुरु केली आहे.
कुठे आढळतात बांगलादेशी घुसखोर ? : ठाणे जिल्ह्यातच नव्हे तर मुंबई, ठाण्यासारख्या अनेक शहरात बांगलादेशी नागरिक आढळतात. मात्र त्यांच्याकडं भारतीय नागरिक असल्याचे पुरावे म्हणजे राशनकार्ड, मतदान कार्ड, आधारकार्ड हे दलालांच्या माध्यमातून ते मिळवतात. त्यामुळं बांगलादेशी घुखोराना शोधून काढण्यासाठी पोलिसांना तारेवरची कसरत करावी लागत आहे. ठाणे पोलिसांनीही बांगलादेशी नागरिकांची शोध मोहीम सुरू केली. बांगलादेश हे नवीमुंबई, ठाणे, दिवा, भिवंडी, मीरा भाईंदर, नालासोपारा अशा बांधकामाची भरभराट असलेल्या ठिकाणी आढळतात. त्यातच बारमधील बारबाला, फळ-भाजी, सीझनचा धंदा करणारे जास्तीतजास्त बांगलादेशी आढळतात. त्यामुळं भारतीय कोण आणि बांगलादेशी घुसखोर कोण? हे शोधणं कठीण जात आहे.
स्थानिकांनी दिली ताकीत : हिरानंदानी इस्टेट भागातील नागरिकांनी आता या अवैध घुसखोरी विरोधात स्थानिक कार्यालय आणि व्यापारी आस्थापनाना पत्र देऊन कामगारांची माहिती घेण्याचं आवाहन केलं आहे. जर अशाप्रकारे पडताळणी नसेल तर त्यांना नोकरी न देण्याचं आवाहन शिवसेनेचे (शिंदे) स्थानिक नेते प्रवीण नागरे यांनी केलं आहे.
कोण कोण राहतं या परिसरात : मंत्री उदय सामंत, प्रताप सरनाईक, यांच्यासह राजन विचारे, नजीब मुल्ला, अनेक आयपीएस अधिकारी, माजी पोलीस महासंचालक या परिसरात राहतात.
हेही वाचा -
