'പേപ്പർ വാങ്ങാൻ പോലും പണമില്ല'; എഐ ക്യാമറ പിഴ നോട്ടിസ് തപാൽ വഴി അയക്കുന്നത് നിർത്തി കെൽട്രോൺ - AI Camera

പിഴ നോട്ടിസ് അയക്കണമെങ്കിൽ നോട്ടിസ് ഒന്നിന് 20 രൂപ നൽകണമെന്നും കുടിശിക അടച്ചുതീർക്കണമെന്നും സർക്കാരിന് കത്തയച്ച് കെൽട്രോൺ

തിരുവനന്തപുരം:എഐ ക്യാമറകൾ വഴി കണ്ടെത്തുന്ന മോട്ടോർ വാഹന നിയമ ലംഘനങ്ങളുമായി ബന്ധപ്പെട്ട പിഴ നോട്ടിസ് തപാൽ വഴി അയക്കുന്നത് നിർത്തി കെൽട്രോൺ. മോട്ടോർ വാഹന വകുപ്പും കെൽട്രോണും തമ്മിലുള്ള കരാർ പ്രകാരം പ്രതിവർഷം 25 ലക്ഷം പിഴ നോട്ടിസുകളാണ് അയക്കേണ്ടത്. എന്നാൽ ഏപ്രിൽ ആയപ്പോഴേക്കും 25 ലക്ഷം കഴിഞ്ഞുവെന്നും ഇതിനാലാണ് തപാൽ വഴി പിഴ നോട്ടിസ് അയക്കുന്നത് നിർത്തിയതെന്നും സേഫ് കേരള പ്രോജെക്‌ട് ഹെഡ് രാജ്‌കുമാർ ഇടിവി ഭാരതിനോട് പറഞ്ഞു.

ഇനിമുതൽ പിഴ നോട്ടിസ് അയക്കണമെങ്കിൽ നോട്ടിസ് ഒന്നിന് 20 രൂപ നൽകണമെന്നും 6 മാസത്തെ കുടിശികയായ 20 കോടി രൂപ ഉടനടി നൽകണമെന്നും ആവശ്യപ്പെട്ട് സർക്കാരിന് കത്തയച്ചതായും രാജ്‌കുമാർ പറഞ്ഞു. എന്നാൽ കത്തിന് ഇതുവരെ മറുപടി ലഭിച്ചിട്ടില്ല.

നിലവിൽ എഐ ക്യാമറ കണ്ടെത്തുന്ന നിയമ ലംഘനങ്ങൾക്ക് ഇ-ചലാൻ മാത്രമാണ് അയക്കുന്നത്. 2023 ജൂൺ 5 മുതലാണ് പിഴ ഈടാക്കാൻ ആരംഭിച്ചത്. ഗതാഗത കമ്മിഷണറോട് പേപ്പർ വാങ്ങാൻ പോലും പണമില്ലെന്ന് അറിയിച്ചാണ് നോട്ടിസ് അയക്കുന്നത് കെൽട്രോണ്‍ നിർത്തിയത്.

ഇതുവരെ 339 കോടിയുടെ നിയമ ലംഘനങ്ങളാണ് കണ്ടെത്തിയത്. എന്നാൽ ഇതിൽ 62.5 കോടി മാത്രമാണ് ഖജനാവിൽ എത്തിയത്. തുടക്കത്തിൽ പ്രതിമാസം ഒന്നര ലക്ഷം നിയമലംഘനങ്ങളാണ് ഉണ്ടായിരുന്നതെങ്കിൽ ഇപ്പോൾ അത് 4-5 ലക്ഷം വരെയായി.