ന്യൂഡൽഹി:ഹരിയാന നിയമസഭാ തിരഞ്ഞെടുപ്പിന് മുന്നോടിയായി ഒളിമ്പിക്‌സ് ഗുസ്‌തി താരങ്ങളായ വിനേഷ് ഫോഗട്ടും ബജ്‌രംഗ് പുനിയയും കോൺഗ്രസിൽ ചേർന്നു. കോൺഗ്രസ് ആസ്ഥാനത്തെത്തി താരങ്ങള്‍ മുതിർന്ന നേതാക്കളുമായി കൂടിക്കാഴ്‌ച നടത്തി. ഒക്ടോബർ അഞ്ചിന് നടക്കുന്ന ഹരിയാന നിയമസഭാ തിരഞ്ഞെടുപ്പിൽ ഇരുവരും മത്സരിക്കുമെന്നാണ് റിപ്പോർട്ട്. നേരത്തെ രണ്ട് ദിവസം മുമ്പ് ഇരുവരും രാഹുൽ ഗാന്ധിയെ നേരിൽ കണ്ടിരുന്നു. ഇതിന് പിന്നാലെയാണ് താരങ്ങള്‍ കോൺഗ്രസിൽ ചേർന്നത്. പാര്‍ട്ടി അധ്യക്ഷന്‍ മല്ലികാർജുൻ ഖാർഗെ, ജനറൽ സെക്രട്ടറി കെസി വേണുഗോപാൽ എന്നിവരുമായി ഇരുവരും ചര്‍ച്ച നടത്തി.
കോൺഗ്രസിൽ ചേരുന്നതിന് മണിക്കൂറുകൾക്ക് മുമ്പാണ് വിനേഷ് ഫോഗട്ട് റെയിൽവേ ജോലി രാജിവെച്ചത് സമൂഹമാധ്യമമായ എക്‌സിലൂടെ അറിയിച്ചത്. ഇന്ത്യൻ റെയിൽവേയെ സേവിച്ചത് തന്‍റെ ജീവിതത്തിലെ അവിസ്‌മരണീയവും അഭിമാനകരവുമായ സമയമാണെന്ന് താരം പറഞ്ഞു.