അഹമ്മദാബാദ്: ഇന്ത്യന്‍ പ്രീമിയര്‍ ലീഗില്‍ (IPL 2024) മുംബൈ ഇന്ത്യന്‍സിന്‍റെ ക്യാപ്റ്റനായുള്ള അരങ്ങേറ്റ മത്സരത്തിനായിരുന്നു ഹാര്‍ദിക് പാണ്ഡ്യ (Hardik Pandya) തന്‍റെ പഴയ ടീം കൂടിയായ ഗുജറത്ത് ടൈറ്റന്‍സിനെതിരെ (Gujarat Titans) ഇറങ്ങിയത്. മത്സരത്തില്‍ ടോസ് നഷ്‌ടപ്പെട്ട് ആദ്യം ബാറ്റ് ചെയ്യാന്‍ ഇറങ്ങിയ ഗുജറാത്തിനെതിരെ ആദ്യ ഓവര്‍ എറിയാനെത്തിയത് ഹാര്‍ദിക് പാണ്ഡ്യയായിരുന്നു. നേരത്തെ ഗുജറാത്ത് ടൈറ്റന്‍സിലുള്ളപ്പോഴും ആദ്യ ഓവര്‍ എറിയുക എന്നത് 30-കാരനായ പാണ്ഡ്യ തന്‍റെ അവകാശമാക്കി വച്ചിരുന്നു.
മുംബൈയില്‍ സ്റ്റാര്‍ പേസര്‍ ജസ്‌പ്രീത് ബുംറയെ (Jasprit Bumrah) മാറ്റി നിര്‍ത്തിയായിരുന്നു ഹാര്‍ദിക് ആദ്യ ഓവറില്‍ പന്തെടുത്തത്. ആദ്യ ഓവറില്‍ തന്നെ താരം 11 റണ്‍സ് വഴങ്ങുകയും ചെയ്‌തു. ഹാര്‍ദിക് പന്തെറിയാന്‍ എത്തിയപ്പോള്‍ തന്നെ കമന്‍ററി ബോക്‌സില്‍ വിമര്‍ശനം ഉയര്‍ന്നു. ഇംഗ്ലണ്ട് മുന്‍ നായകന്‍ കെവിന്‍ പീറ്റേഴ്‌സണും (Kevin Pietersen) ഇന്ത്യയുടെ ഇതിഹാസ താരം സുനില്‍ ഗവാസ്‌കറുമായിരുന്നു (Sunil Gavaskar) ഇതേക്കുറിച്ച് സംസാരിച്ചത്.
ജസ്‌പ്രീത് ബുംറ എന്തുകൊണ്ട് ആദ്യ ഓവര്‍ എറിയുന്നില്ലെന്നും താരത്തിന് ആദ്യ ഓവര്‍ നല്‍കാത്തത് എന്തുകൊണ്ടാണെന്ന് തനിക്ക് മനസിലാവുന്നില്ലെന്നും പീറ്റേഴ്‌സണ്‍ പറഞ്ഞപ്പോള്‍ ശ്രദ്ധേയമായ മറുപടിയാണ് ഗവാസ്‌കര്‍ നല്‍കിയത്. ആ ചോദ്യം ഏറെ മികച്ചതും പ്രസക്തവുമാണെന്നുമായിരുന്നു ഗവാസ്‌കര്‍ പറഞ്ഞത്. വിഷയത്തില്‍ ഇന്ത്യയുടെ മുന്‍ താരം ഇര്‍ഫാന്‍ പഠാനും (Irfan Pathan) പ്രതികരിച്ചിരുന്നു.
ബുംറ എവിടെയെന്ന് തന്‍റെ എക്‌സ് അക്കൗണ്ടിലൂടെ താരം ചോദിക്കുകയായിരുന്നു. മത്സരത്തില്‍ ബുംറ തകര്‍പ്പന്‍ പ്രകടനം നടത്തിയപ്പോള്‍ ഹാര്‍ദിക് അടി വാങ്ങുകയും ചെയ്‌തിരുന്നു. നാല് ഓവറില്‍ വെറും 14 റണ്‍സ് മാത്രം വഴങ്ങിയ ബുംറ മൂന്ന് വിക്കറ്റുകള്‍ വീഴ്‌ത്തിയിരുന്നു. 3.50 ആയിരുന്നു ഇക്കോണമി.