ചണ്ഡീഗഢ്: പാരീസ് ഒളിമ്പിക്‌സിൽ പങ്കെടുത്ത പഞ്ചാബിൽ നിന്നുള്ള 19 താരങ്ങളെ പഞ്ചാബ് മുഖ്യമന്ത്രി ഭഗവന്ത് മാൻ ആദരിച്ചു. വെങ്കല മെഡൽ നേടിയ ഹോക്കി ടീമിലെ 8 കളിക്കാർക്ക് ഒരു കോടി രൂപ വീതവും ഒളിമ്പിക്‌സിൽ പങ്കെടുത്ത മറ്റ് 11 കളിക്കാർക്ക് 15 ലക്ഷം രൂപ വീതവും നൽകി.
ഇന്ത്യ ടീമിന് ബ്രിട്ടനെതിരേ മത്സരം ഉണ്ടായിരുന്ന ദിവസം എനിക്ക് രണ്ട് റാലികൾ ഉണ്ടായിരുന്നു. ഞാൻ റെസ്റ്റ് ഹൗസിൽ മൊബൈലിൽ മത്സരം കാണുകയായിരുന്നുവെന്ന് മുഖ്യമന്ത്രി പറഞ്ഞു. പഞ്ചാബിൽ ഒരു വലിയ ഹോക്കി ടൂർണമെന്‍റ് സംഘടിപ്പിക്കുന്നതിനെക്കുറിച്ച് ആലോചിക്കുന്നുണ്ട്. ഇതിനായി ഹോക്കി ഇന്ത്യയുമായി സംസാരിക്കും. ഇന്ത്യൻ ടീമിനെ സ്പോൺസർ ചെയ്യാനും ആഗ്രഹിക്കുന്നുണ്ട്. എന്നാൽ 2036 വരെ ഈ ഉത്തരവാദിത്തം ഒഡീഷയ്ക്കാണ്.
ഹോക്കി ടീമിലെ നാല് താരങ്ങൾ പഞ്ചാബ് പോലീസിലുണ്ടെന്ന് മുഖ്യമന്ത്രി ഭഗവന്ത് മാൻ പറഞ്ഞു. കളിക്കാർക്ക് ജോലിയും ഇതിനകം ജോലിയിലുള്ള താരങ്ങൾക്ക് പ്രമോഷനും സർക്കാർ നൽകും. ഹോക്കി താരങ്ങളെ മയക്കുമരുന്നിനെതിരെ ബ്രാൻഡ് അംബാസഡർമാരാക്കും. മദ്യം ഉപേക്ഷിച്ച് കായിക വിനോദങ്ങളിലേക്ക് തിരിയാൻ ആളുകളെ ബോധ്യപ്പെടുത്തും.
സംസ്ഥാനത്ത് ഗെയിം സോണുകൾ സൃഷ്ടിക്കുമെന്നും മുഖ്യമന്ത്രി പറഞ്ഞു. മഹൽപൂരിൽ ഫുട്ബോൾ, സുനത്തിൽ ബോക്‌സിങ്, ജലന്ധറിൽ ഹോക്കി, ലുധിയാനയിൽ അത്ലറ്റിക്‌സ് എന്നിവയ്ക്കായി സോണുകൾ സൃഷ്ടിക്കും. പഞ്ചാബ് സർക്കാർ കായികരംഗത്ത് വാതിലുകൾ തുറന്നിടുമെന്നും മുഖ്യമന്ത്രി വ്യക്തമാക്കി.
Also Read:പ്രീമിയര്‍ ലീഗില്‍ ലിവര്‍പൂളിനും ആഴ്‌സണലിനും ആസ്റ്റണ്‍ വില്ലയ്‌ക്കും വിജയത്തുടക്കം - English Premier League
