രാജസ്ഥാന്‍: നാല് ദിവസം മുന്‍പ് കാണാതായ ബ്യൂട്ടി പാര്‍ലര്‍ ഉടമയുടെ മൃതദേഹം കണ്ടെത്തി. ജോധ്‌പൂര്‍ സ്വദേശിയായ അനിതയുടെ മൃതദേഹം ആറ് കഷണങ്ങളാക്കി കുഴിച്ചുമൂടിയ നിലയിലാണ് കണ്ടെത്തിയത്. കുടുംബ സുഹൃത്തായ ഗുല്‍ മുഹമ്മദ് ആണ് കൊലപാതകത്തിന് പിന്നിലെന്ന് പൊലീസ് അറിയിച്ചു.
അനിതയെ കാണാനില്ലെന്ന പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് മൃതദേഹം കണ്ടെത്തിയത്. മൊബൈല്‍ ഫോണും കോള്‍ ലിസ്‌റ്റും കേന്ദ്രീകരിച്ച് നടത്തിയ പരിശോധനയില്‍ അനിതയെ അവസാനമായി വിളിച്ചത് ഗുല്‍ മുഹമ്മദാണെന്ന് കണ്ടെത്തി. തുടര്‍ന്ന് നടത്തിയ അന്വേഷണത്തില്‍ ഗുല്‍ മുഹമ്മദിന്‍റെ ഭാര്യയാണ് കൊലപാതക വിവരം വെളിപ്പെടുത്തിയത്.
കൊലപാതകം നടക്കുന്ന ദിവസം താന്‍ വീട്ടിലില്ലായിരുന്നു. തിരിച്ചെത്തിയപ്പോള്‍ അനിതയെ കൊലപ്പെടുത്തിയെന്നും വീടിന് പുറകില്‍ കുഴിച്ചിട്ടെന്നും ഗുല്‍ മുഹമ്മദ് പറഞ്ഞതായി ഭാര്യ വെളിപ്പെടുത്തി. ഈ വിവരത്തിന്‍റെ അടിസ്ഥാനത്തില്‍ നടത്തിയ തെരച്ചിലില്‍ അനിതയുടെ ശരീര ഭാഗങ്ങള്‍ പൊലീസ് കണ്ടെത്തുകയായിരുന്നു.