വാഹനാപകടത്തിൽ ഒരുകുടുംബത്തിലെ മൂന്ന് പേർ മരിച്ചു; സംഭവം ഡൽഹി-മുംബൈ എക്‌സ്‌പ്രസ് ഹൈവേയില്‍ - ACCIDENT IN RAJASTHAN

അഹമ്മദാബാദിൽ നിന്നും ഹരിദ്വാറിലേക്ക് കാറിൽ യാത്ര ചെയ്‌തിരുന്ന കുടുംബമാണ് അപകടത്തില്‍ പെട്ടത്.

ദൗസ (രാജസ്ഥാൻ) :രാജസ്ഥാനിലെ ദൗസയിൽ വാഹനാപകടത്തിൽ ഒരുകുടുംബത്തിലെ മൂന്ന് പേർ മരിച്ചു. നാല് കുട്ടികള്‍ ഉള്‍പ്പെടെ ആറ് പേര്‍ക്ക് പരിക്ക്. ഡൽഹി-മുംബൈ എക്‌സ്‌പ്രസ് ഹൈവേയില്‍ ബഡാ ഗ്രാമത്തിന് സമീപമാണ് അപകടം ഉണ്ടായത്. ഹരിദ്വാറിലേക്ക് കാറിൽ യാത്ര ചെയ്‌ത കുടുംബത്തിലെ അംഗങ്ങളാണ് മരണപ്പെട്ടത്.

അതിവേഗത്തിൽ വന്ന ട്രക്ക് കാറിൽ ഇടിക്കുകയായിരുന്നു. ഹസ്‌മു പട്ടേൽ, ഭാര്യ സീമാബെൻ, മോഹൻ ഭായ് എന്നിവരാണ് മരിച്ചത്. "മരിച്ചവരുടെ മൃതദേഹങ്ങൾ ബാൻഡികുയി സബ് ജില്ലാ ആശുപത്രിയിലെ മോർച്ചറിയിൽ സൂക്ഷിച്ചിരിക്കുകയാണെന്ന് ബാൻഡികുയി പൊലീസ് അറിയിച്ചു. അതേസമയം, പരിക്കേറ്റവരെ ദൗസ ജില്ലാ ആശുപത്രിയിൽ പ്രവേശിപ്പിച്ചു.

അമ്മയുടെ ചിതാഭസ്‌മം നിമജ്ജനം ചെയ്യാൻ അഹമ്മദാബാദിൽ നിന്ന് ഹരിദ്വാറിലേക്ക് കാറിൽ പോകവെയാണ് കുടുംബം അപകടത്തില്‍ പെടുന്നത്. പൊലീസ് പറയുന്നതനുസരിച്ച്, കുടുംബം സഞ്ചരിച്ച കാറിന് മുന്നിലേക്ക് ഒരു പശു എത്തുകയായിരുന്നു. ഇതിനെ അരികിലേക്ക് മാറ്റി റോഡില്‍ നില്‍ക്കവെയാണ് ട്രക്ക് പിന്നില്‍ നിന്നും ഇടിക്കുന്നത്. ദമ്പതികൾ ഉൾപ്പെടെ മൂന്ന് പേരും സംഭവസ്ഥലത്ത് തന്നെയാണ് മരിച്ചതെന്നും ഡ്യൂട്ടി ഓഫീസർ ജവാൻ സിങ്‌ പറഞ്ഞു.