ಸಿ.ಟಿ.ರವಿ ಆರೋಪ ಮಾಡುವುದರಲ್ಲಿ, ಮಾತು ತಿರುಚುವುದರಲ್ಲಿ ಎಕ್ಸ್​ಪರ್ಟ್: ಡಿ.ಕೆ.ಸುರೇಶ್

ಬಿಜೆಪಿ ನಾಯಕರು ಪದೇ ಪದೆ ಹೆಣ್ಣು ಮಕ್ಕಳ ಮೇಲೆ ಹೀಗೆ ನಡವಳಿಕೆ ತೋರಿಸುತ್ತಿರುವುದಕ್ಕೆ ಕಡಿವಾಣ ಹಾಕಬೇಕು ಎಂದು ಸಿ.ಟಿ.ರವಿ ಪ್ರಕರಣ ಸಂಬಂಧ ಮಾಜಿ ಸಂಸದ ಡಿ.ಕೆ.ಸುರೇಶ್ ಪ್ರತಿಕ್ರಿಯೆ ನೀಡಿದರು.

ಬೆಂಗಳೂರು: ಸಿ.ಟಿ.ರವಿ ಏನು ಬೇಕಾದರು ಆರೋಪ ಮಾಡುತ್ತಾರೆ. ಆರೋಪ ಮಾಡುವುದರಲ್ಲಿ ಮತ್ತು ಮಾತು ತಿರುಚುವುದರಲ್ಲಿ ಅವರು ಎಕ್ಸ್​ಪರ್ಟ್ ಎಂದು ಮಾಜಿ ಸಂಸದ ಡಿ.ಕೆ.ಸುರೇಶ್ ಆರೋಪಿಸಿದರು.

ಸದಾಶಿವನಗರ ನಿವಾಸದ ಬಳಿ ಮಾತನಾಡಿದ ಅವರು, ರಾಹುಲ್ ಗಾಂಧಿ ಅವರನ್ನು ಡ್ರಗ್ ಅಡಿಕ್ಟ್ ಅಂದಿದ್ದೂ ಆಯ್ತು. ಇವರನ್ನು ಕೊಲೆಗಡುಕ ಅಂದಿದ್ದೂ ಆಯ್ತು. ಅವರು ಮತ್ತೊಂದು ಪದ ಬಳಕೆ ಮಾಡಿದ್ದೂ ಆಯ್ತು. ನೀವು ಅದು ಯಾವುದನ್ನೂ ಖಂಡಿಸುತ್ತಾ ಇಲ್ಲ. ನೀವು ಚರ್ಚೆ ಮಾಡುತ್ತಿರುವುದು ಸಿ.ಟಿ.ರವಿ ಅರೆಸ್ಟ್ ಮಾಡಿರುವುದನ್ನು ಎಂದರು.

ಗೌರವಯುತವಾಗಿ ಆಗಿರುವ ತಪ್ಪಿಗೆ ರಾಜ್ಯದ ಮಹಿಳೆಯರ ಕ್ಷಮೆ ಕೇಳುವುದು ಒಳಿತು ಅನ್ನೋದು ನನ್ನ ಭಾವನೆ. ಅವರ ಮನೆಯಲ್ಲೂ ಮಹಿಳೆಯರಿದ್ದಾರೆ. ಬಿಜೆಪಿಯಲ್ಲಿ ಲಂಗುಲಗಾಮು ಇಲ್ಲ ಅನ್ಸುತ್ತೆ. ಅದಕ್ಕೋಸ್ಕರ ಈ ರೀತಿ ಹೇಳಿಕೆಗಳು ಪದೇ ಪದೆ ಬರುತ್ತದೆ. ನಡೆದ ಘಟನೆ ಬಿಜೆಪಿಗೆ ಶೋಭೆ ತರುತ್ತಾ?. ಆರ್​ಎಸ್ಎಸ್ ಹೇಳಿದ ಸಂಸ್ಕೃತಿ ಇದೇನಾ?. ಏಕೆ ಪದೇ ಪದೆ ಬಿಜೆಪಿ ನಾಯಕರು ಈ ರೀತಿ ಹೆಣ್ಣು ಮಕ್ಕಳ ಮೇಲೆ ಮತ್ತು ಹೆಣ್ಣು ಮಕ್ಕಳ ಜೊತೆ ನಡೆದುಕೊಳ್ಳುವ ರೀತಿ ನೀತಿಗಳನ್ನು ಜನರು ಗಮನಿಸಬೇಕು ಎಂದರು.

ಬಿಜೆಪಿ ನಾಯಕರು ಪದೇ ಪದೆ ಹೆಣ್ಣು ಮಕ್ಕಳ ಮೇಲೆ ತೋರಿಸುವ ನಡವಳಿಕೆ ನೋಡಿದರೆ ಬಹುಶಃ ಅವರ ಮನೆಯಲ್ಲಿ ಅವರ ತಾಯಿ, ಹೆಂಡತಿ ಮತ್ತು ಹೆಣ್ಣು ಮಕ್ಕಳಿಗೂ ಗೌರವ ಕೊಡಲ್ಲ ಅಂತ ಕಾಣಿಸುತ್ತೆ. ಈಗಾಲಾದರು ಅವರಿಗೆ ಕಡಿವಾಣ ಹಾಕಬೇಕು.‌ ಒಬ್ಬನೇ ಒಬ್ಬ ನಾಯಕ ಈ ಹೇಳಿಕೆಯನ್ನು ಖಂಡಿಸಲು ಬಿಜೆಪಿಯವರಲ್ಲಿ ಮಾತುಗಳು ಇಲ್ಲ. ರಾಜ್ಯದ ಜನಪ್ರತಿನಿಧಿಗಳು ಈ ರೀತಿ ಮಾತನಾಡಿರುವುದಕ್ಕೆ ಕ್ಷಮೆಯಾಚಿಸುವ ಸೌಜನ್ಯವೂ ಆ ನಾಯಕನಿಗೆ ಇಲ್ಲ ಎಂದು ಟೀಕಿಸಿದರು.

ನ್ಯಾಯಾಂಗ ತನಿಖೆ ಅಥವಾ ಸಿಬಿಐ ತನಿಖೆಗೆ ಒತ್ತಾಯ ವಿಚಾರವಾಗಿ ಮಾತನಾಡಿ, ಸಿಬಿಐ ಅನ್ನೋದು ಬಿಜೆಪಿಯವರಿಗೆ ಮನೆಯೊಳಗಿನ ಸರಕು ಅಂತ ಅನ್ನಿಸುತ್ತೆ. ಮನೆ ಕೆಲಸದವರನ್ನು ಉಪಯೋಗಿಸುವಂತೆ ಸಿಬಿಐ ಅವರನ್ನು ಬಳಸುತ್ತಿರುವ ಪ್ರವೃತ್ತಿ ಎದ್ದು ಕಾಣುತ್ತಿದೆ. ಅಂಬೇಡ್ಕರ್ ಮೇಲಿನ ಹೇಳಿಕೆಯನ್ನು ಮರೆಮಾಚಲು ಬಿಜೆಪಿಯವರು ಕುತಂತ್ರವನ್ನು ಮಾಡುತ್ತಿದ್ದಾರೆ. ಸಿ.ಟಿ. ರವಿ ಕೆಲವೆಲ್ಲಾ ವಿಚಾರದಲ್ಲಿ ಪ್ರಚಲಿತರು. ಅವರ ಜೊತೆ ಒಡನಾಟ ಇಟ್ಟುಕೊಂಡವರೆಲ್ಲ ಬಹಳ ಇತಿಹಾಸ ಇರುತಕ್ಕಂತವರು ಎಂದು ಆರೋಪಿಸಿದರು.

ನನಗೆ ಏನಾದರು ಆದರೆ ಡಿ.ಕೆ.ಶಿವಕುಮಾರ್ ಕಾರಣ ಎಂಬ ಸಿ.ಟಿ. ರವಿ ಹೇಳಿಕೆ ವಿಚಾರವಾಗಿ ಪ್ರತಿಕ್ರಿಯಿಸಿ, ಎಸ್​​ಪಿಜಿ ಭದ್ರತೆ ತೆಗೆದುಕೊಳ್ಳಲಿ. ಇಲ್ಲವಾದರೆ ಕರ್ನಾಟಕ ಪೊಲೀಸರ ರಕ್ಷಣೆ ಪಡೆದು ಹಿಂದೆ ಒಂದು ವ್ಯಾನ್ ಮುಂದೆ ಒಂದು ವ್ಯಾನ್ ಹಾಕಿ ಓಡಾಡಲಿ‌. ಬೇಡ ಅಂದವರು ಯಾರು?. ರಾಜ್ಯ ಪೊಲೀಸರ ಮೇಲೆ ನಂಬಿಕೆ ಇಲ್ಲಾಂದ್ರೆ ಎಸ್ ಪಿಜಿ ರಕ್ಷಣೆ ಕೇಳಲಿ. ಯಾರ ಮೇಲಾದರೂ ಬೇಕಾದರು ಗುಂಡು ಹಾರಿಸಲಿ ಎಂದು ಡಿಕೆ ಸುರೇಶ್​ ಲೇವಡಿ ಮಾಡಿದರು.

ಇದನ್ನೂ ಓದಿ: ನನ್ನನ್ನು 4 ಜಿಲ್ಲೆಗಳಲ್ಲಿ 11 ಗಂಟೆಗೂ ಹೆಚ್ಚು ಕಾಲ ಅಲೆದಾಡಿಸಿದ್ರು, ಮಾನಸಿಕವಾಗಿ ಕುಗ್ಗಿಸುವ ಕೆಲಸ ಮಾಡಿದ್ರು: ಸಿ.ಟಿ.ರವಿ

ಇದನ್ನೂ ಓದಿ: ತಕ್ಷಣವೇ ಸಿ.ಟಿ.ರವಿ ಬಿಡುಗಡೆಗೆ ಆದೇಶಿಸಿ 'ಜನಪ್ರತಿನಿಧಿಗಳಾಗಿ ಆರೋಪಿ‌, ದೂರುದಾರರ ವರ್ತನೆ ದುರದೃಷ್ಟಕರ‌' ಎಂದ ಹೈಕೋರ್ಟ್‌